Wuj Richin ri Esdras 6 - Kaqchiquel Bible

Ri Darío xeruto' ri winaqi' judío

¹ K'ari' ri rey Darío xubij chi tikanox ri wuj chupan ri jay ri akuchi yakon-wi ri beyomel richin Babilonia.

² Y chiri' chupan ri tinamit Ecbatana, chiri' chupan ri rachoch ri rey ri akuchi niq'aton-wi-tzij pa ruwi' ri ruwach'ulew Media, xilitej k'a ri wuj ri' ri akuchi tz'iban-wi ri natabel richin y kere' nubij:

³ Chupan k'a ri nabey juna' toq niq'aton-tzij ri rey Ciro, xuya' k'a re ruchojmilal re' pa ruwi' ri rachoch ri Dios, ri k'o pa Jerusalem, richin tipabex chik q'anej jun bey ri jay ri', ri akuchi nisuj-wi kamelabel. Y kan jebel keban kan chire ri ruxe'. Y ri tz'aq richin ri jay k'o chi nuk'uaj waqlajuj jaj ri rujotolen y waqlajuj jaj ri ruwech.

⁴ Y chuqa' ri tz'aq niban rik'in abej y rik'in tz'alem. Tiya'ox-qa oxi' cholaj abej y k'ari' niya'ox-q'anej jun cholaj tz'alem. Kan keri' tiban chire k'a toq xtik'is-q'anej rubanik ri tz'aq. Y ronojel ri xtikusex chire kan xtitoj k'a rik'in ri rubeyomel ri rey.

⁵ Y pa ruwi' ronojel ri samajibel ri banon rik'in q'anapueq y saqipueq richin ri jay ri', ri xeruk'en-pe ri Nabucodonosor pa Jerusalem y xeruk'uaj pa Babilonia, nik'atzin chi yetzolix pa Jerusalem. Y keya'ox pa ruk'ojelibal pa rachoch ri Dios, nubij chupan ri wuj.

⁶ K'ari' ri Darío kere' ri rubixik ri xubij: Wakami, rat Tatenai ri at aj-raqen pa ruwi' ri ruwach'ulew ri k'o pa qajbel-q'ij chire ri raqen-ya' Éufrates, rat ri Setar-boznai, y ri iwachibil ri e aj-raqen pa kiwi' ch'aqa' chik tinamit ri ek'o chiri': Kixel k'a el chiri'.

⁷ Y tiya' q'ij chi niban chik k'a q'anej ri samaj richin ri rachoch ri Dios. Tiya' q'ij chi ri aj-raqen ri k'o pa kiwi' ri judío y chuqa' ri rijita'q taq achi'a', richin nikipaba' chik q'anej ri rachoch ri Dios ri chiri' pa ruk'ojelibal.

⁸ Y pa ruwi' ri', yin kan ninbij chik el chiwe richin ke'ito' ri e aj-raqen ri ek'o pa kiwi' ri judío: Kan ja rix xkixtojo ri samaj ri' rik'in ri beyomel richin ri ruwach'ulew ri k'o pa qajbel-q'ij chire ri raqen-ya' Éufrates, richin man nitane' ta ri samaj ri'.

⁹ Y pa ruwi' re', kan ronojel k'a q'ij xtiya'ox chike ri ki-sacerdote ri achike nik'atzin richin ri kamelabel, achi'el ri nima-alaji' achija' taq wákix, achija' taq karne'l, alaji' achija' taq karne'l; ronojel re' richin niporox chuwech ri Dios ri rajaw ri kaj. Chuqa' ri trigo, atz'an, vino y aceite; ronojel re' kan tiya'ox chike q'ij-q'ij ri sacerdote.

¹⁰ Rik'in ronojel re' xtikisuj kamelabel ri niqa' chuwech ri ki-Dios, ri rajaw ri kaj, richin rije' yech'on rik'in ri ki-Dios pa ruwi' ri nuk'aslen yin y pa ruwi' ri kik'aslen ri walk'ual.

¹¹ Chuqa' kan yin yibin-el chiwe chi xabachike xtiya'on ruwi' re pixa' re', kan xtelesex-el jun tem chire ri rachoch ri wineq ri' y kan xtipabex ri tem. Y chutza'n ri' xtitzeqebex-wi, y ri rachoch kan jumul xtitorix y xtok kan jun toribel q'ayis.

¹² Y ri ki-Dios ri nikiya' ruq'ij; kan xtrelesaj kik'aslen xabachike wineq, stape' jun rey, y kan xtuk'is ri tinamit wi xtuyoj ri rachoch ri Dios ri k'o chiri' pa Jerusalem. Keri' chuqa' xtiban kik'in ri winaqi' ri xtiya'on ruwi' ri pixa'. Yin ri Darío, xiya'on re pixa' re'. Kan tiban chi'anin ronojel re', xcha-el.

Toq xk'achoj ri rachoch ri Dios

¹³ K'ari' ri Tatenai ri aj-raqen pa kiwi' ri aj-labal richin ri ruwach'ulew ri k'o pa qajbel-q'ij chire ri raqen-ya' Éufrates, y ri Setar-boznai y ri e kach'alal kan xkiben k'a chi'anin, achi'el xbix-pe chike roma ri rey Darío.

¹⁴ Keri' ri aj-raqen ri ek'o pa kiwi' ri judío xkipaba' k'a q'anej ri rachoch ri Dios. Y ri winaqi' kan utz k'a xel chikiwech roma ri tijonik ri xkik'ul kik'in ri Hageo y ri Zacarías ri ruk'ajol ri Idó. Xkipaba' k'a q'anej, y xkik'is achi'el xubij ri ki-Dios ri k'o pan Israel, y achi'el xkibij ri e oxi' rey richin Persia: Ri Ciro, ri Darío y ri Artajerjes.

¹⁵ Re jay re' xk'achoj pa rox q'ij richin ri ik' Adar chupan ri juna' waqi' richin ri ruq'atoj-tzij ri rey Darío.

Ri winaqi' judío xenimaq'ijun

¹⁶ K'ari' ri israelita, ri e sacerdote, ri e levita y ri ch'aqa' chik winaqi' ri xetzolin-pe pa Babilonia, rik'in janila kikoten, xkiben jun nimaq'ij richin nikitikeriba' nikiya' ruq'ij ri Dios chiri' pa rachoch.

¹⁷ Y chupan ri nimaq'ij ri' toq xk'achoj ri rachoch ri Dios, xkisuj k'a wok'al nima-alaji' achija' taq wákix, 200 achija' taq karne'l y 400 alaji' achija' taq karne'l. Y richin kuyubel-mak, xkisuj kablajuj achija' taq tzuntzun richin chikijujunal ri tzobaj richin ri tinamit Israel.

¹⁸ Y ri e sacerdote kan xjach k'a ri samaj pa kiq'a', y kan xkijalala-ki'. Y chuqa' keri' xban kik'in ri e levita richin ri jalajoj ruwech kisamaj ri chiri' pa rachoch ri Dios, achi'el ri tz'ibatel kan chupan ri wuj ri rutz'iban kan ri Moisés.

¹⁹ Chirij ronojel re', ri winaqi' ri xetzolin-pe pa Babilonia xkinimaq'ijuj ri q'ij richin ri Solbelri'il, chupan ri q'ij kajlajuj richin ri nabey ik' chire ri juna'.

²⁰ Ri e sacerdote y ri e levita kan xkich'ajch'ojirisaj k'a ki' achi'el nubij ri pixa'. K'ari' ri e levita xkisuj k'a ri kamelabel richin ri nimaq'ij ri', koma rije', ri e sacerdote y konojel ri ch'aqa' chik winaqi' ri xetzolin pa Jerusalem.

²¹ Konojel k'a israelita ri xetzolin-pe pa Babilonia, xewa' k'a junan kik'in ri kiwinaq ri ek'o kan chiri', ri xkich'er-pe-ki' kik'in ri man e kiwinaq ta ri ek'o chupan ri ruwach'ulew ri', richin nikikanoj ri Jehová ri ki-Dios.

²² Y xkinimaq'ijuj k'a wuqu' q'ij rik'in janila kikoten ri nimaq'ij richin kaxlan-wey ri maneq ch'amilej-q'or rik'in. Chuqa' xenimaq'ijun rik'in kikoten roma ri Jehová xuben chi xujel ri ruch'obonik ri Darío, rey chuqa' richin Asiria, richin xto'on kik'in ri aj-Judá chupan ri samaj richin ri rachoch ri ki-Dios.