Wuj Richin ri Esdras 10 - Kaqchiquel Bible

Ri achi'a' xkijech-ki' kik'in ri kixjayilal ri man e israelita ta

¹ Rokik ri Esdras nich'on rik'in ri Dios, nubij ronojel ri kimak y kan noq' xukul chiri' chuwech ri rachoch ri Dios, ri janila chi ruwinaq kan xkimol-apo-ki' chiri': Chi achi'a', chi ixoqi' y chi ak'uala'. Y rije' chuqa' kan xe'oq' roma bis.

² K'ari' ri Secanías, ruk'ajol ri Jehiel y rijatzul kan ri Elam. Xch'on k'a q'anej y xubij chire ri Esdras: Roj kan xojmakun chuwech ri qa-Dios, roma xeqak'en xtani' ri man e qawinaq ta, richin xojk'ule' kik'in. Man rik'in ri', xa kan k'a yojtikir k'a niqachojmirisaj-qi'.

³ Wakami k'a, kan qabana' jun jikibel-tzij rik'in ri qa-Dios, richin k'o chi niqach'er-qi' kik'in ri ixoqi' ri', y kik'in ri ak'uala' ri e alaxineq kik'in rije', achi'el nubij ri Jehová ri qa-Dios chupan ri rupixa'. Y kan tiqabana' k'a achi'el nubij ri pixa'.

⁴ Kayakatej k'a, roma re' kan k'atzinel chi naben, y roj kan xqojk'oje' awik'in. Tatija' k'a aq'ij, y kan tabana' k'a, xcha' ri Secanías chire ri Esdras.

⁵ K'ari' xyakatej-q'anej ri Esdras y xuben chike ri ruwinaq chi xkiya' kitzij ri tata'al kichin ri e sacerdote y ri tata'al kichin ri levita, y chuqa' konojel ri ruwinaq, chi kan kere' k'a tikibana'. Y rije' kan xkiya' kitzij.

⁶ K'ari' ri Esdras xel-pe chiri' chuwech ri rachoch ri Dios, y xbe k'a pa rachoch ri Johanán ruk'ajol ri Eliasib. Y toq xapon k'a rik'in, man xwa' ta ni man xuk'ya' ta, roma kan janila nibison roma ri kimak ri ruwinaq ri e tzolejineq-pe pa Babilonia.

⁷ Y kan xkiya' k'a rutzijol chiri' pa Jerusalem y pa Judá chi konojel ri winaqi' ri e tzolejineq-pe pa Babilonia tikimolo-ki' chiri' pa Jerusalem.

⁸ Y ri achike man xtapon ta chupan ri oxi' q'ij, kan xtimaj ri rulew, y kan xtelesex-el chikikojol ri winaqi' ri xetzolin-pe pa Babilonia.

⁹ Keri' konojel ri achi'a' richin ri ruwach'ulew Judá y ri ruwach'ulew Benjamín xkimol k'a ki' chiri' pa Jerusalem chupan ri oxi' q'ij ri'. Y ronojel re' xbanatej chupan ri q'ij juwineq richin ri ik' beleje'. Y konojel ri winaqi' kan xetz'uye' k'a chiri' chupan ri nima'q ruwech bey richin molojri'il chiri' chuwech ri rachoch ri Dios, y kan yebaybot k'a roma re ch'abel re', y chuqa' roma ri job ri najin.

¹⁰ Y ri sacerdote Esdras xyakatej k'a y xubij chike: Rix kan xixmakun k'a, roma kan xixk'ule-qa kik'in ixoqi' ri man e qawinaq ta, y keri' xnimer k'a q'anej ri mak chiqij.

¹¹ Wakami k'a, tik'utuj kuyubel imak chuwech ri Jehová ri qa-Dios ri chuqa' ki-Dios ri qati't-qamama'. Tibana' k'a ri nrajo' rija', y kan tich'ara' k'a iwi' kik'in ri winaqi' ri kichin ch'aqa' chik ruwach'ulew, y kik'in ri ixoqi' ri man e qawinaq ta, xcha'.

¹² Y konojel k'a ri winaqi' ri ek'o chiri' xkireq kichi' y xkibij: Kan xtiqaben k'a achi'el ri xabij.

¹³ Roma kan janila oj k'iy, y wakami kan janila job najin, roma ri' man yojtikir ta yojk'oje' pa bey. Pa ruwi' re', re samaj re' man xaxe ta k'a richin jun q'ij ni ka'i' q'ij, roma kan janila oj k'iy ri oj qajineq chupan re mak re'.

¹⁴ Más utz xaxe ri tata'al ri yechojmirisan ronojel re'. Keri' konojel ri ek'o chupan re qatinamit, ri xek'ule' kik'in ixoqi' ri man e qawinaq ta, kan xkepe k'a toq xke'oyox. Y kan xkepe kik'in ri q'atoy taq tzij y ri to'onela' richin ri kitinamit. Y toq xtik'achoj ronojel re', k'ari' xtik'o-el ri royowal ri Dios pa qawi' roma re mak re', xecha'.

¹⁵ Xaxe k'a ri Jonatán ruk'ajol ri Asael y ri Jahazías ruk'ajol ri Ticvá man xqa' ta chikiwech ri xbix, y ja k'a ri e levita Mesulam y ri Sabtai kan xekito'.

¹⁶ Konojel k'a ri winaqi' e tzolejineq-pe pa Babilonia kan keri' k'a xkiben. K'ari' ri sacerdote Esdras xeruch'er jujun achi'a' ri e aj-raqen kichin jun jay winaqi'. Y re' xkichop chupan ri nabey q'ij chire ri lajuj ik', y xetz'uye' richin nikitz'et re jun na'oj re'.

¹⁷ Y chupan k'a ri nabey q'ij chire ri nabey ik' chire ri jun chik juna', xk'achoj k'a ri q'atoj-tzij kik'in konojel ri achi'a' ri xek'ule' kik'in ri ixoqi' ri man e kiwinaq ta.

^18-19 Y ri e sacerdote ri e k'ulan kik'in ri ixoqi' ri man e kiwinaq ta xkiya' kitzij chi kan yekijech-el ri kixjayilal, y kan xkisuj k'a jun kamelabel richin nikuyutej kimak. Y chikijujunal xkik'en-pe jun achij karne'l richin ri kamelabel ri'. Jare' ri e sacerdote ri e k'ulan kik'in ri ixoqi' ri man e kiwinaq ta: Ri Maaseías, ri Eliézer, ri Jarib y ri Guedalías; konojel rije' e rijatzul kan ri Josué, ruk'ajol ri Josadac y ri e rach'alal.

²⁰ Ri Hananí y ri Zebadías, e rijatzul kan ri Imer:

²¹ ri Maaseías, ri Elías, ri Semaías, ri Jehiel y ri Ozías, e rijatzul kan ri Harim:

²² Ri Elioenai, ri Maaseías, ri Ismael, ri Natanael, ri Jozabad y ri Elasá, e rijatzul kan ri Pashur:

²³ Ri Jozabad, ri Simí, ri Quelaías chuqa' nibix Quelitá chire, ri Petahías, ri Judá y ri Eliézer, e rijatzul kan ri Leví:

²⁴ Ri Eliasib kijatzul kan ri e bixanela': Ri Salum, ri Télem y ri Urí, kijatzul kan ri e chajinela' richin ri ruchi' ri rachoch ri Dios:

²⁵ Keri' k'a chuqa' ri winaqi' israelita ri ek'o pa xaman: Ri Ramías, ri Jezías, ri Malquías, ri Mijamín, ri Eleazar, jun chik Malquías y ri Benaías, e rijatzul kan ri Parós:

²⁶ Matanías, ri Zacarías, ri Jehiel, ri Abdí, ri Jeremot y ri Elías, e rijatzul kan ri Elam:

²⁷ Ri Elioenai, ri Eliasib, ri Matanías, ri Jeremot, ri Zabad y ri Azizá, e rijatzul kan ri Zatú:

²⁸ Ri Johanán, ri Hananías, ri Zabai y ri Atlai, e rijatzul kan ri Bebai:

²⁹ Ri Mesulam, ri Maluc, ri Adaías, ri Jasub, ri Seal y ri Ramot, e rijatzul kan ri Baní:

³⁰ Ri Adná, ri Quelal, ri Benaías, ri Maaseías, ri Matanías, ri Besalel, ri Binuy y ri Manasés, e rijatzul kan ri Pahat-moab:

³¹ Ri Eliézer, ri Isías, ri Malquías, ri Semaías, ri Simeón, e rijatzul kan ri Harim:

³² Ri Benjamín, ri Maluc y ri Semarías, chuqa' e rijatzul kan ri Harim:

³³ Ri Matenai, ri Matatá, ri Zabad, ri Elifélet, ri Jeremai, ri Manasés y ri Simí, e rijatzul kan ri Hasum:

³⁴ Y konojel winaqi' re' e rijatzul kan ri Baní: Ri Madai, ri Amram, ri Uel,

³⁵ ri Benaías, ri Bedías, ri Queluhu,

³⁶ ri Vanías, ri Meremot, ri Eliasib,

³⁷ ri Matanías, ri Matenai, ri Jaasai,

³⁸ Konojel re winaqi' re' e rijatzul kan ri Binuy: ri Simí,

³⁹ ri Selemías, ri Natán, ri Adaías,

⁴⁰ ri Macnadbai, ri Sasai, ri Sarai,

⁴¹ ri Azarel, ri Selemías, ri Semarías,

⁴² ri Salum, ri Amarías y ri José:

⁴³ Y chuqa' ri Jeiel, ri Matatías, ri Zabad, ri Zebiná, ri Jadau, ri Joel y ri Benaías, e rijatzul kan ri Nebo:

⁴⁴ Konojel re achi'a' re' xek'ule' k'a kik'in ixoqi' ri man e kiwinaq ta; y ek'o k'a chike ri ixoqi' ri' xek'oje' kal kik'in ri achi'a' ri'.