Wuj Richin Bix Chire ri Dios 99 - Kaqchiquel Bible

Ri Jehová ja rija' ri rey

¹ Ri Jehová ja rija' ri rey. Roma ri' kan tik'oje' k'a rukiy rija' chikiwech ri tzobaj winaqi' richin ri ruwach'ulew. Rija' kan tz'uyul k'a chikikojol ri querubín richin nuq'et-tzij. Y roma ri' chijun ri ruwach'ulew kan nisilon.

² Ri Jehová k'o nimalej ruchuq'a' chupan ri tinamit Sión. Chuqa' keri' rubanon pa kiwi' ri ch'aqa' chik tinamit.

³ Kan tibixex k'a ri rubi' roma rija' kan janila nim y kan k'o rukiy. Kan man jun chik k'o achi'el rija'.

⁴ Ri rey kan niqa' chuwech ri ruchojmilal. Kan ja rija' ri yoyon re ruchojmilal re' pan Israel. Kan xuben k'a ri ruchojmilal y ri q'atoj-tzij pa kiwi' ri winaqi' israelita.

⁵ Tinimirisaj ruq'ij ri Jehová ri qa-Dios. Kan tixuku-timeja-iwi' chuwech, roma kan xaxe-wi rija' ri loq'olej.

⁶ Ri Moisés y ri Aarón kan jeri' ri xe'ok ru-sacerdote, Ri Samuel jari' ri nich'on pa kiwi' ri winaqi' rik'in rija'. Rije' kan xech'on k'a rik'in ri Jehová, y rija' kan xerak'axaj k'a pe.

⁷ Chupan k'a jun sutz' pa'el chikaj xch'on kik'in. Ri pixa' ri xuya' rija' chike, kan jari' ri xkitaqej.

⁸ Jehová ri at qa-Dios roj, rat kan xak'uluba' k'a pe ri kich'abel. Rat kan xatok k'a chike rije', jun Dios ri kan kuyunel, stape' xaya' tijoj-poqonal pa kiwi' rije' roma ri kimak.

⁹ Tinimirisaj ruq'ij ri Jehová ri qa-Dios. Tiqasaj k'a iwi' chuwech rija', roma ri Jehová ri qa-Dios roj kan loq'olej-wi.