Wuj Richin Bix Chire ri Dios 87 - Kaqchiquel Bible

Bix pa ruwi' ri tinamit Sión*f88*

¹ Ri Jehová kan xujikiba' k'a ri tinamit Sión pa ruwi' ri juyu' ri kan ch'aron.

² Rija' kan janila nrajo' ri tinamit ri', más ke chuwech ri ch'aqa' chik tinamit richin ri Israel.

³ Rutinamit ri Dios, kan janila k'a k'iy jebelej taq ch'abel ri yebix chawij rat.

Ri Dios nubij:

⁴ Ri ruwach'ulew Egipto*f89* y Babilonia ketaman nuwech. Ri winaqi' aj-Filistea, aj-Tiro y ri aj-Etiopía kan xe'alex-pe chupan ri tinamit Sión.

⁵ Ri tinamit Sión xtibix k'a pa ruwi': Re jun ruwach'ulew re' y la jun chik, pa Sión xe'alex-wi-pe, xkecha'. Re ruwach'ulew re' kan ja ri nimalej Dios xjikiban kichin.

⁶ Ri Jehová xkerajlaj k'a konojel ri ruwach'ulew, y xtutz'ibaj kibi' konojel winaqi' chupan ri ruwuj. Y xtubij k'a chi rije' e aj-Sión, roma chiri' xe'alex-wi-pe.

⁷ Konojel k'a bixanela' y q'ojomanela' ri ek'o chupan ri tinamit ri' xtikibij: Ronojel ri kikoten ri k'o kik'in kan rik'in ri Sión nipe-wi, xkecha'.