Wuj Richin Bix Chire ri Dios 64 - Kaqchiquel Bible

Ch'owen chire ri Dios richin ruk'utuxik to'onik*f62*

¹ Nu-Dios yin, tabana' utzil tawak'axaj ri nusujunik. Tachapa' ri nuk'aslen roma kan ninxibij-wi' chikiwech ri e etzelanel wichin.

² Kinawewaj chuwech ri ch'obonik ri nikiben pan ewel ri e banoy taq etzelal, chikiwech ri itzel taq winaqi' ri kimolon-ki'.

³ Ri kaq' re winaqi' re' kan achi'el ri espada ri kan ya-ya' rey, y kan nikik'aqala' poqon taq ch'abel ri kan yesokon, achi'el nik'aq ri ch'ab,

⁴ richin nikibila' ch'abel pan ewel chirij jun wineq ri choj ruk'aslen. Chaq k'ate' nikik'eq poqon taq ch'abel y man nikixibij ta ki'.

⁵ Kan kipaban k'a ki' chupan ri itzel taq kich'obonik, nikiyala' pikbel, k'ari' nikibij-qa ¿achike ta k'a nitz'eton ri niqaben?, yecha-qa.

⁶ Nikinojila' k'a q'anej ri etzelal, y kan jebel ruch'obik nikiben chire. Kan qitzij na wi chi rije' kan janila e nowineq rik'in ri kich'obonik.

⁷ Jak'a ri Dios kan xkerusok k'a rik'in ri ruch'ab rija'. Y kan chaq k'ate' k'a xtiqaqa pa kiwi' jun nima-ruk'ayewal.

⁸ Kan ja ri kaq' rije' ri nibanon chike richin yetzaq. Ri xketz'eton kichin kan xketze'en chikij.

⁹ K'ari' xtik'oje' rukiy ri Dios chikiwech, kan xtikich'ob k'a rij ri rusamaj ri rubanon ri Dios, y k'ari' xtikitzijoj ronojel re banobel re'.

¹⁰ Ri winaqi' choj kik'aslen kan xkekikot rik'in ri Jehová, kan xtikikuquba' k'a kik'u'x rik'in rija', konojel ri ch'ajch'oj kánima.