Wuj Richin Bix Chire ri Dios 53 - Kaqchiquel Bible

Ri winaqi' ri yebano etzelal*f51*

¹ Ri winaqi' ri maneq kina'oj nikibij-qa pa kánima chi maneq Dios. Konojel rije' xa q'ayineq chik ri kánima, ronojel ri nikiben kan janila itzel, kan man jun ri nibanon ta ri utz.

² Ri Jehová nitzu'un-pe k'a chila' chikaj pa kiwi' ri winaqi'. Nitzu'un-pe, richin nutz'et wi k'o ta jun aj-na'oj ri nikanon ta richin rija'.

³ Chikijujunal xa xkitzeqelibej chik k'a jun bey, konojel xa xkitz'ilobisaj ri kik'aslen; kan man jun ri nibanon ta ri utz, kan man jun wi k'a.

⁴ ¿Kan maneq ta k'a kina'oj ri yebanon etzelal y kan nikik'is ri rutinamit ri Dios achi'el xa ta ja ri kiway nikitej y kan man nikinataj ta rija'?

⁵ Akuchi ri kan man jun xibinri'il k'o, chiri' xkik'en janila xibinri'il ri winaqi'. Roma ri Dios kan xeruk'is konojel ri e yakatajineq chirij. Kan xek'ixbitej roma ri Dios kan xerixowaj.

⁶ ¡K'ate' ta chiri' pa juyu' Sión xtipe-wi ri qakolotajik! Toq ri Dios xtuben chi xtitzolin-pe ri rutinamit pa ximonri'il, jari' toq xqojkikot roj ri oj rijatzul kan ri Jacob, ri oj rijatzul kan ri Israel.