Wuj Richin Bix Chire ri Dios 46 - Kaqchiquel Bible

Ri Dios kan k'o qik'in jantape'*f44*

¹ Ri Dios jari' ri quchuq'a' y rik'in rija' niqato-wi-qi'. Toq k'o ruk'ayewal kan chi'anin k'a yojruto'.

² Roma ri', man xtiqaxibij ta qi', stape' nipe jun silonel, stape' wi ta ri nima'q taq juyu' yetzaq ta pa ruk'u'x ri palou.

³ Stape' ri palou niwajin y nibolqo't ri ruwi', ó kan yesilon ta ri juyu', roma ri royowal ri ya', roj kan man xtiqaxibij ta qi'.

⁴ K'o k'a jun raqen-ya' ri pa rutinamit ri Dios, ri nuben chi kan nik'ases nitzu'un, chiri' chupan ri rachoch ri akuchi k'o-wi rija'.

⁵ Roma chiri' k'o-wi ri Dios, kan man jun xtitikir xtisilon. Ja ri Dios nichajin richin, toq niseqer-pe.

⁶ Ri nima'q taq tinamit kixibin-ki' y man nikil ta achike nikiben ri q'atoy taq tzij. Roma toq ri Dios nich'on kan nik'is-qa ri ruwach'ulew.

⁷ Ri Jehová k'iytisanel richin ronojel jari' ri k'o qik'in roj. Ri nito'on qichin roj kan ja ri ru-Dios kan ri Jacob.

⁸ Kixanpe, titz'eta' ri nima'q taq banobel ri rubanon ri Jehová. Kan nuk'is k'a el ruwech chijun ri ruwach'ulew.

⁹ Ja rija' ri nibanon chi nichup ri labal chuwech chijun ri ruwach'ulew. Yeruq'ajala' k'a ri rute-ch'ab y ri kum. Ri tobel kan yeruporoj pa q'aq'.

¹⁰ Ri Jehová nubij: Kixtane-qa chubanik ri labal y tiwetamaj chi ja yin ri in Dios. xtinimirisex nuq'ij, pa nima'q taq ruwach'ulew, xtiya'ox k'a nuq'ij chuwech re ruwach'ulew.

¹¹ Ri Jehová k'iytisanel richin ronojel, jari' ri k'o qik'in roj. Ri nito'on qichin roj, kan ja ri ru-Dios kan ri Jacob.