Wuj Richin Bix Chire ri Dios 20 - Kaqchiquel Bible

Ch'owen pa ruwi' ri ch'akonik*f18*

¹ Ja ri Jehová xtak'axan awichin chupan ri q'ij richin bis; kan ja ri ru-Dios ri Jacob ri xtikolon awichin.

² Kan k'a chupan k'a ri rachoch xtuteq-pe to'onik chawe, y k'a chiri' pa Sión xtuya-pe ri k'atzinel chawe.

³ Kan xtoqaqa ta k'a chuk'u'x ri asipanik ri aya'on chire y ruk'awoman ta k'a ri poron chikop ri asujun chuwech.

⁴ Kan xtuya' ta k'a chawe ri rurayibel ri awánima. Kan xtuben ta k'a chi xtik'achoj ronojel ri ach'obon richin naben.

⁵ Toq rat xkach'akon chikij ri e etzelanel awichin, roj kan xqojkikot k'a, kan pa rubi' k'a ri Dios xtiqatzeqej chikaj ri tzieq retal ch'akonik. Ri Jehová xtuk'uluba' ta k'a pe ronojel ri xak'utuj chire.

⁶ Wakami xinwetamaj, chi ri Jehová kan nuya-wi ch'akonik chire ri rucha'on rija'; kan k'a chila' chikaj xtuk'uluba-pe ri ruch'abel, rik'in ri nimalej ruchuq'a' xtukol.

⁷ Ek'o ri xa rik'in ri ki-carruaje richin oyowal ri nikikuquba' kik'u'x; ch'aqa' chik nikikuquba' kik'u'x rik'in ri kikiej; jak'a roj kan kuqul qak'u'x rik'in ri Jehová ri qa-Dios.

⁸ Rije' xa nik'is ri kuchuq'a' y yetzaq, jak'a roj kan jantape' oj pa'el.

⁹ ¡Jehová, tabana' utzil taya' ch'akonik chire ri rey! ¡Kan qojawak'axaj k'a ri q'ij toq xkatqoyoj!