Wuj Richin Bix Chire ri Dios 140 - Kaqchiquel Bible

Ch'owen rik'in ri Dios richin nito'ox ri David*f122*

¹ Nimalej Jehová, tabana' utzil kinakolo' chikiwech ri winaqi' e itzel. Kinachajij chikiwech ri kamisanela'.

² Re winaqi' re', xa kan xaxe ri etzelal ri nikich'ob pa taq kánima. Ronojel q'ij nikinojij achike chi etzelal nikiben.

³ Ri kaq' kan achi'el k'a ri raq' ri kumetz. Kan achi'el k'a ri ya' kamisanel richin ri kumetz, keri' rubanon ri pa kichi'.

⁴ Nimalej Jehová, kinakolo' chikiwech ri winaqi' e itzel. Kinajech'ej chikiwech ri kamisanela', roma nikajo' nikiq'et chuwaqen.

⁵ Ri kinimirisan-ki' e kewalon kan pikbel pa nubey yin. Rije' kiya'on achi'el ya'l pa nubey. Nikajo' k'a nikiq'et chuwaqen; roma ri' e kiya'on kan re pikbel re'.

⁶ Jak'a yin kan nujachon-wi' pan aq'a' rat Jehová. Tabana' utzil, tawak'axaj ri nuch'owen y tajoyowaj nuwech.

⁷ Jehová, rat at nimalej nukolonel. Rat kan yinachajij k'a chupan ri q'ij richin oyowal.

⁸ Tabana' utzil man taya' chike ri winaqi' e itzel ri nikirayij rije'. Man taben chike chi yebe pa jotol, richin chi man nikinimirisaj-ki'.

⁹ Man taya' q'ij chi ri e etzelanel wichin yinkich'ek. Tabana' chike chi ri ch'abel ri yekibila', chikij ta k'a rije' xtiqaqa-wi.

¹⁰ Xtiqaqa ta k'a pa kiwi' rije' ri racheq-q'aq'; kan xkeya'ox ta k'a pa q'aq'. Xkek'aq ta k'a chupan jul ri nej qajineq rupan ri akuchi man jun bey xketikir xke-el-pe.

¹¹ Ri winaqi' e tz'ukuy tzij kan man ta k'a xkejike' chuwech re ruwach'ulew. Ri etzelal, jari' ta ri xtitzeqeliben kichin ri kamisanela'.

¹² Jak'a ri e poqonatajineq, yin wetaman chi rat Jehová kan ye'ato'. Y ri yetz'ilox, naq'et tzij pa kiwi' rik'in ruchojmilal.

¹³ Kan qitzij chi ri choj kik'aslen kan xtikiya' aq'ij. Ri choj yebiyin chawech kan xkebek'oje' awik'in richin q'asen.