Wuj Richin Bix Chire ri Dios 128 - Kaqchiquel Bible

Ri urtisanik richin ri Jehová*f112*

¹ Jebel ruwa-aq'ij rat ri k'o rukiy ri Jehová chawech, ri kan ja ri bey ri niqa' chuwech rija' ri atzeqeliben.

² Kan ja ri ruwech ri atiko'n ri xtatej; xkakikot k'a y kan utz xtel ronojel chawech.

³ Ri awixjayil kan xtuben k'a achi'el ri juwi-uva ri kan janila ruwech. Ri awalk'ual kan achi'el k'a ri taq alaj che' olivo xtikiben chuchi' ri a-mesa.

⁴ Jare' ri urtisanik ri nuk'ul ri achin, ri xtik'oje' rukiy ri Jehová chuwech.

⁵ Kan xkarurtisaj ta pe ri Jehová k'a chupan ri tinamit Sión. Ronojel ta q'ij chire ri ak'aslen xtitz'etetej ta ri rutzil pan awi'.

⁶ Xtatz'et ta na kan ri e kijatzul chik ri awalk'ual. Kan jantape' ta k'a xtik'oje' uxlanibel-k'u'x chupan ri tinamit Israel.