Wuj Richin Bix Chire ri Dios 127 - Kaqchiquel Bible

Ronojel kan rik'in ri Jehová peteneq-wi*f111*

¹ Wi ta k'o jun wineq nupaba-q'anej jun jay y ri Jehová man ta nuto', xa kan man jun k'a nuq'ajuj chi nisamej ri aj-tz'aq. Wi ta ri chajinela' nikichajij jun tinamit y ri Jehová man ta yeruto', xa kan man jun k'a rejqalen chi yek'ase' ri chajinela' ri'.

² Xa man jun nik'atzin-wi chi janila nimaq'a' yan yixyakatej richin yixsamej, man jun nik'atzin-wi chi yixsamej nej aq'a', roma ri Jehová kan nuya' k'a ri k'atzinel chike ri ralk'ual, ri kan yerajo'.

³ Ri alk'ualaxela' kan jun sipanik ri nuya' ri Jehová chike ri te'ej-tata'aj; kan jun urtisanik chike rije'.

⁴ Jun achin richin labal ri k'o ruch'ab pa ruq'a', man nuxibij ta ri' chikiwech ri etzelanel richin. Keri' chuqa' nuna' jun achin ri yek'oje' ralk'ual pa ruk'ajolil.

⁵ Jebel ruwa-ruq'ij ri achin ri e k'iy ralk'ual xek'oje', achi'el ri achin richin oyowal ri runojisan ri rupeqes rik'in ch'ab. Re tata'aj re' kan man xtik'ixbitej ta k'a chikiwech ri etzelanel richin toq ek'o chikiwech ri e chojmirisey richin ri nibanatej.