Wuj Richin Bix Chire ri Dios 124 - Kaqchiquel BibleJehová kolonel richin ri tinamit Israel*f108* 1 Wi ri Jehová man ta xk'oje' qik'in roj, kere' nikibij ta ri israelita: 2 Wi ri Jehová man ta xk'oje' qik'in roj, toq ri winaqi' xeyakatej chiqij, 3 kan ta keri' oj k'es xojkibeq', toq yakatajineq janila koyowal chiqij. 4 Keri' ri e etzelanel qichin kan ta xojkiqirirej-el achi'el nuben jun raqen-ya', achi'el nuben jun raqen-ya' toq yerumuq ri winaqi'. 5 Keri' xq'ax ta ri nimalej raqen-ya' pa qawi'. 6 Nimalej ruq'ij ri Jehová, roma kan man xuya' ta q'ij chike ri e etzelanel qichin richin xojkik'is, achi'el nikiben ri k'uxunela' taq chikopi' toq nikiwech' ri kiway. 7 Roj xojkolotej kan, achi'el nikolotej jun aj-xik' chikop chuwech jun pikbel ri nuya' kan ri kanonel. Xraq'ach'itej k'a ri kipikbal y roj kan xojkolotej kan. 8 Ri qato'onik roj kan rik'in k'a ri Jehová peteneq-wi, ri xbanon chijun ri kaj y ri ruwach'ulew. |
Kaqchikel Bible © Bible Society in Guatemala, 2003.
Bible Society in Guatemala