Wuj Richin Bix Chire ri Dios 11 - Kaqchiquel Bible

Kuqubabel-k'u'x rik'in ri Jehová*f8*

¹ Rik'in ri Jehová nukuquban-wi nuk'u'x. ¿Achike roma nibij chuwe: katanimej, kabiyin pa taq juyu' achi'el nuben jun aj-xik' chikop?

² Roma, ri e banoy etzelal kan kinaban chik ri kich'ab, richin chi pan ewel yekiq'ijuj ri choj kik'aslen.

³ Wi ta ri ruch'abel ri Dios nitzaq, ¿achike k'a xtuben ri choj ruk'aslen?

⁴ Ri Jehová chupan k'a ri loq'olej rachoch k'o-wi; chila' chikaj k'o-wi ri rutz'uyubal richin nuq'et-tzij, rija' kan rutzuliben k'a pe ronojel ri nikiben ri winaqi'.

⁵ Ri Jehová kan yerutejtobej k'a ri choj kik'aslen, jak'a ri aj-maki' y ri niqa' chikiwech yekamisan, kan yerixowaj.

⁶ Pa kiwi' ri e banoy etzelal xtuben chi xtiqaqa q'aq' y chuwilej-abej; kan xtuteq k'a pe jun k'aten laj kaq'iq' ri kan xkeruk'et jare' ri ruk'amon richin nikik'ul rije'.

⁷ Ri Jehová kan choj y niqa' chuwech ri ruchojmilal; roma ri' ri choj kik'aslen kan xtikitz'et ruwech rija'.