Wuj Richin Bix Chire ri Dios 108 - Kaqchiquel Bible

Ch'owen richin jun k'utunik*f100*

¹ Jare' k'o ri wánima chawech y kan man xtinjel ta chik ri nuch'obonik. Kan xtinbixaj k'a ri abi', y re' jun ruwaq'ijaj chuwe yin.

² Ninchojmirisaj k'a wi' richin yibixan y yenchojmirisaj ri q'ojom, nimaq'a' yan yik'astej richin ninben.

³ Nimalej ajaw, kan xtinya' k'a aq'ij chikikojol ri ruwach'ulew. Xtinbixaj ri abi' chikikojol ri winaqi'.

⁴ Ri ajoyowanik rat Jehová kan más nim chuwech ri kaj. Ronojel ri naben kan nuq'i' ri kaj.

⁵ Tak'utu' ri nimalej abanobal pa ruwi' ri kaj. Tak'utu' ri ak'ojlemal pa ruwi' chijun ri ruwach'ulew.

⁶ Richin chi yekolotej ri ye'ajowan awichin, ke'akolo' k'a rik'in ri awijkiq'a', y tak'uluba-pe ri nuch'abel.

⁷ Ri Dios kan kere' rubin chupan ri rachoch: Yin kan xkikikot; kan ninch'er chike ri nuwinaq, ri Siquem y ri taq'aj richin Sucot.

⁸ Ri ruwach'ulew Galaad y ri Manasés kan e wichin yin. Ri ruwach'ulew ri k'o pa xaman kan achi'el jun tobel jolomaj chuwe yin, ri Judá ri k'o pa xokon, kan jari' ri nuya'on richin nuq'et-tzij.

⁹ Ri Moab xa kan achi'el k'a jun ruk'ojelibal-ya' richin ninch'ej waqen. Ri Edom kan wichin chik yin, y kan xkikikot k'a chirij ri ruwach'ulew Filistea toq xtich'akatej, xcha' ri Dios.

¹⁰ Man jun xqojuk'uan richin niqaben oyowal chikij ri tinamit sutin kij chi tz'aq. Man jun xtuk'uan qichin richin niqaben oyowal chirij ri ruwach'ulew Edom.

¹¹ Roma rat Jehová, oj amalin kan, y man at beneq ta chik kik'in ri aj-labal.

¹² Tabana' utzil, qojato' pa kiq'a' ri e etzelanel qichin, roma ri kito'onik ri achi'a' xa kan man jun rejqalen.

¹³ Wi rat qa-Dios atk'o qik'in, roj xtiqaben nima'q taq banobel. Rat xke'axeq' k'a ri e etzelanel qichin.