Wuj Richin Bix Chire ri Dios 106 - Kaqchiquel Bible

Ri kiyakatajinenri'il ri israelita

¹ Kan tinimirisaj ruq'ij ri Jehová. Tiya' ruq'ij ri Jehová, roma rija' kan janila jebel, roma ri rajowabal kan richin q'asen.

² Ri nima'q taq rubanobal ri Jehová man jun nitikir nitzijon roma man e ajlatel ta. ¿Achike ta k'a xtitzijon ri ruruwaq'ijaj rija'?

³ Jebel ruwa-kiq'ij ri nikitaqej ri ruchojmilal. y ri jantape' nikiq'et-tzij pa ruchojmilal.

⁴ Kinoqaqa k'a chi'ak'u'x, nimalej nu-Dios toq xke'akol ri ch'aqa' chik chike ri nuwinaq. Katanpe wik'in richin yinakol toq xke'ato' rije',

⁵ richin kan xtintz'et k'a ri utzilej k'aslen kik'in ri ch'aqa' chik ri e acha'on; y richin yikikot kik'in ri kan e awichin rat.

⁶ Roj kan yojmakun k'a achi'el xemakun ri qati't-qamama'. Kan xeqabanala' k'a ri itzel taq banobel. Xeqabanala' k'a banobel ri man e utz ta.

⁷ Ri qati't-qamama' toq k'a ek'o na pan Egipto, kan man xq'ax ta chikiwech ri meyel taq abanobal rat Jehová, kan man xoqaqa ta chikik'u'x ri janila chi joyowanik ri xaya' pa kiwi'. Y xa kan xkipaba' k'a ki' chawech chiri' chuchi' ri Kaqa-Palou.

⁸ Man rik'in ri' ri Jehová kan xerukol roma ri rajowabal richin chi xtitz'etetej ri ruchuq'a' rija'.

⁹ Xuch'olij ri Kaqa-Palou y xuchaqirisaj rupan. K'ari' xuben chike ri qati't-qamama' chi xeq'ax chupan ri siwan ya' ri', achi'el xa ta pa tz'iran ruwach'ulew e beneq-wi.

¹⁰ Ri chiri' xerukol k'a pa kiq'a' ri e etzelanel kichin. Xerelesaj k'a el chikiwech ri e yakatajineq chikij.

¹¹ Ri ya' kan xumuq k'a kij ri e etzelanel kichin. Kan man jun k'a chike rije' ri xk'ase' ta kan.

¹² K'ari' rije' xkikuquba' kik'u'x rik'in ri ruch'abel. K'ari' xkibixaj ri rubi'.

¹³ Man rik'in ri', xa kan chi'anin k'a xkimestaj-qa ri nimalej rubanobal ri Jehová. Man xkinimaj ta k'a ri rupixa' rija'.

¹⁴ Xa kan xkijech k'a ki' chubanik ri itzel taq rayibel ri chiri' pa tz'iran ruwach'ulew. Xa kan xkitejtobej k'a ri Dios ri chiri'.

¹⁵ Ri Dios kan xuya' k'a chike ri xkik'utuj chire, jak'a chirij ri' xuteq k'a ruk'ayewal pa kiwi' rije'.

¹⁶ Xch'upun kik'u'x chirij ri Moisés chiri' akuchi ek'o-wi-qa, keri' chuqa' xkiben chire ri Aarón, ri kan cha'on roma ri Jehová.

¹⁷ Roma ri' xjaqatej ri ruwach'ulew y xubeq' ri Datán, chuqa' xerubeq' ri Abiram y konojel ri rachibil.

¹⁸ Xpe k'a ri ruxaq q'aq' chila' chikaj pa kiwi' ri winaqi' ri'. Ri q'aq' ri' kan xeruporoj k'a konojel ri itzel taq winaqi' ri'.

¹⁹ Ri qati't-qamama' xkiben k'a ruwachibel jun alaj achij wákix chiri' pan Horeb. Kan xkiya' k'a ruq'ij ri wachibel ri xa ya'erisan pa q'aq'.

²⁰ Keri', xa xkijel k'a ri ruk'ojlemal ri Jehová, xkijel rik'in ruwachibel jun wákix ri xa q'ayis nutej.

²¹ Xkimestaj k'a kan ri Dios ri nikolon kichin, ri xbanon nima'q taq banobel pan Egipto,

²² stape' rija' xbanon meyel taq banobel chupan ri ruwach'ulew richin ri Cam; banobel ri man jun bey e tz'eton chiri' pa Kaqa-Palou.

²³ Ri Jehová kan xrajo' chi xeruk'is ta konojel ri qati't-qamama'. Jak'a ri Moisés ri rucha'on rija', kan xch'on k'a pa kiwi' rije', richin chi xuqasaj ruwi' ri royowal, richin man xerukamisaj ta.

²⁴ Stape' keri', ri winaqi' xa kan xketzelaj k'a ri ruwach'ulew ri kan rayixel. Man xkikuquba' ta kik'u'x rik'in ri ruch'abel rija'.

²⁵ Xa xkichop yexebexot pa taq kachoch. Man xkiya' ta k'a kixikin chire ri ruch'abel ri Jehová.

²⁶ Roma ri' kan xujikiba' rutzij chi xkerukamisaj chiri' pa tz'iran ruwach'ulew.

²⁷ Xerutaluj pa ch'aqa' chik tinamit, y chiri' xerukamisaj-wi chikikojol ri winaqi' ri'.

²⁸ Ri israelita xa xkisamajij ri dios Baal-peor. Xkitej ri sipanik ri e sujun chik chikiwech ri dios ri maneq kik'aslen.

²⁹ Kan xkiyek k'a royowal ri Dios rik'in ri itzel taq kibanobal. Y roma ri' kan xpe k'a ri kamik chikikojol.

³⁰ Jari' k'a toq ri Finees xyakatej, y xpa'e' chikikojol ri ruwinaq y ri Dios, richin chi ri Dios man xeruk'is ta. Rik'in ri' xtane' ri nima-ruk'ayewal ri'.

³¹ Roma re banobel re' ri Finees choj xk'ulun chuwech ri Dios. Y re' kan xk'oje' kan richin q'asen.

³² Ri israelita kan xkiyek k'a royowal ri Jehová chiri' rik'in ri alaxibel-ya' Meribá. Koma rije' xmakun ri Moisés;

³³ roma kan xkipaba-ki' chuwech ri Dios. Y ri Moisés xch'on k'a y man xuch'ob ta ri xubij.

³⁴ Chuqa' ri israelita man xekik'is ta k'a ri winaqi' richin ri ruwach'ulew Canaán, ri xubij ri Jehová chi kekik'isa' kan jumul.

³⁵ Pa ruk'exel chi xekik'is, xa xkitun-ki' kik'in. Xa xekibanala' k'a ri kibanobal ri winaqi' ri',

³⁶ y xekisamajij ri ki-dios. Jare' xbanon chike chi xpe wululen chikij.

³⁷ Xekisuj k'a richin kamelabel ri kik'ajol. Ri kimi'al xekijech pa kiq'a' ri itzel taq espíritu.

³⁸ Xekikamisaj k'a ri kalk'ual ri xa man jun kimak. Xekisuj k'a chikiwech ri wachibel ri e kibanon ri aj-Canaán. Y roma ri' xkitz'ilobisaj k'a ri ruwach'ulew ri' rik'in ri kik'.

³⁹ Rik'in ri banobel ri' xe'ok man e ch'ajch'oj ta ri israelita. Kan achi'el k'a jun ixoq itzel ruk'aslen, keri' xkiben rije' kik'in ri dios ri'.

⁴⁰ Roma ri' xyakatej royowal ri Jehová pa kiwi'. Y kan xeretzelaj, stape' kan e richin rija'.

⁴¹ Xerujech k'a pa kiq'a' winaqi' ri man nikitzeqelibej ta rija'. Y keri' k'a ri e etzelanel kichin xek'oje' pa kiwi'.

⁴² Xetz'ilox k'a koma ri e etzelanel kichin. Kan xkitej k'a poqon pa kiq'a'.

⁴³ Ri Jehová kan k'iy k'a mul xerukol ri israelita, jak'a rije' xa chaq xkipaba-ki' chuwech y man xkinimaj ta ri rupixa'. Roma ri kimak kan xqasex kiq'ij.

⁴⁴ Man rik'in ri' rija' kan xrak'axaj k'a toq xesik'in-q'anej rik'in, y rija' kan xeruto' toq ek'o pa tijoj-poqonal.

⁴⁵ Kan xuch'ob pa ruwi' ri jikibel-tzij ri rubanon kik'in. Y roma ri janila chi rajowabal kan ja ri utz ri xuben kik'in.

⁴⁶ Xuben k'a chike ri winaqi' ri e uk'uayon-el kichin pa ximonri'il, chi xkijoyowaj kiwech.

⁴⁷ Ri winaqi' israelita xkibij k'a: Jehová qa-Dios roj, qojakolo' k'a. Qojawelesaj-el chikikojol ri winaqi' ri man yatkitzeqelibej ta rat, Qojamolo' chik richin niqanimirisaj ri loq'olej abi', richin chi rik'in kikoten xtiqaya' aq'ij, yecha'.

⁴⁸ Nimalej aq'ij Jehová ri qa-Dios; kan keri' k'a tibe-q'ij tibe-seq. Qonojel roj tiqabij: Kan keri' wi, tinimirisex ruq'ij ri Jehová.