Wuj Richin Bix Chire ri Dios 103 - Kaqchiquel Bible

Bix roma ri urtisanik ri nuya' ri Dios*f98*

¹ Yin kan jantape' xtinnimirisaj ruq'ij ri Jehová. Kan rik'in k'a chijun nuk'aslen xtinimirisaj ri loq'olej rubi' ri Dios.

² Yin kan jantape' xtinnimirisaj ruq'ij ri Jehová. Kan man xtinmestaj ta k'a ri rutzil ri ruya'on pa nuwi'.

³ Ja rija' ri nikuyun ronojel ri qamak. Ja rija' ri nik'achojirisan ronojel ri qaq'axo'n.

⁴ Ja rija' ri nikolon qichin chuwech ri kamik. Ri rutzil y ri rujoyowanik ri nuya' chiqe kan achi'el k'a jun corona nuben pa qajolon.

⁵ Ja rija' niya'on chiqe ronojel ri utz, richin nuben k'ak'a' chiqe, y nik'oje' k'ak'a' quchuq'a', achi'el ri kot.

⁶ Ri Jehová kan nuq'et k'a tzij pa ruchojmilal. Kan yeruto' ri yetz'ilox.

⁷ Ri ojer kan xuk'ut k'a ri rubey chuwech ri Moisés. Ri nima'q rubanobal xuk'ut chikiwech ri ánima qati't-qamama'.

⁸ Ri Jehová kan joyowanel y koch'onel-wi. Kan man chi'anin ta nipe royowal, y kan janila nim ri rujoyowanik.

⁹ Rija' man jantape' ta yojruch'olij; ri royowal man nibe ta ruwech.

¹⁰ Rija' man ruya'on ta k'a chiqe roj ri ruk'ayewal ri ruk'amon chi nuya'. Ni man ruya'on ta k'a pa qawi' ri rutojbalil ri qamak.

¹¹ Ri rajowabal rija' kan janila nim pa qawi' roj ri niqaqasaj-qi' chuwech. Ri kaj y ri ruwach'ulew man yetikir ta nikitemej ri nimalej rajowabal rija'.

¹² Ri qamak kan nej k'a xrelesaj-el chiqe roj. Kan achi'el k'a ri nej rukojol ri relebel-q'ij rik'in ri qajbel-q'ij.

¹³ Ri Jehová kan nujoyowaj k'a qawech roj ri niqaya' rejqalen rija'. Kan achi'el k'a jun tata'aj ri nujoyowaj kiwech ri ralk'ual.

¹⁴ Keri' nuben roma rija' retaman chik ri qabanikil roj. Rija' retaman chi roj xa maneq quchuq'a' y xa rik'in poqolaj oj banon-wi.

¹⁵ Ri ruk'aslen ri wineq xa achi'el ok ri q'ayis; nisijan achi'el nisijan ri kotz'i'j,

¹⁶ y toq niq'ax ri kaq'iq' pa ruwi', xa nik'is-qa. Ri akuchi xtike-wi xa kan man jun chik xtitz'eton.

¹⁷ Jak'a ri rujoyowanik ri Jehová, pa kiwi' ri k'o rukiy chikiwech, kan richin tibe-q'ij tibe-seq. Y ri ruchojmilal ri nuben kan niyaloj richin jantape'.

¹⁸ Ronojel re' nuben pa kiwi' ri nikitaqej ri rujikibel-tzij, y pa kiwi' ri jantape' k'o chikik'u'x ri rupixa' ri Dios.

¹⁹ Ri Jehová kan k'a chila' chikaj k'o-wi ri rutz'uyubal richin niq'aton-tzij. Rija' kan nuq'et k'a tzij pa ruwi' ronojel.

²⁰ Tinimirisaj k'a ruq'ij ri Jehová, rix ri ix samajela' aj-chikajil; rix ri kan rik'in uchuq'a' niben ri nubij chiwe, richin ninimaj ri rutzij.

²¹ Tinimirisaj ruq'ij ri Jehová, chi'iwonojel ri ixk'o chila' rik'in; chi'iwonojel ri ix nima'q taq rusamajela' rija'.

²² Chijun ri rusamaj ri Jehová, kan tikiya' ruq'ij-ruk'ojlen rija', xabakuchi chire ri rajawaren. Yin kan jantape' xtinnimirisaj ruq'ij ri Jehová.