Os 8 - Kaqchiquel Bible

Ri tinamit Israel xuq'ej ruwi' ri tununri'il rik'in ri Dios

¹ Ri Dios nubij: Kan taxupuj k'a ri trompeta; ri etzelanel kan achi'el k'a kot ri peteneq pa ruwi' ri ruwach'ulew Israel. Roma ri israelita xa xkiq'ej ruwi' ri tununri'il ri qabanon kik'in. Xa man xkitaqej ta ri nupixa'.

² K'ari' xkesik'in ri israelita wik'in y xtikibij: Qa-Dios roj, roj kan oj atinamit rat, xkecha'.

³ Ri tinamit Israel xa man xrajo' ta k'a ri utz, roma ri' kan ja ri e etzelanel richin ri xketzeqeliben richin.

⁴ Rije' xkich'okoba' k'a ri ki-rey richin nik'oje' pa kiwi', ri xa man ja ta yin xicha'on chikiwech. Xekikanoj k'a qa aj-raqen chikikojol, jak'a yin man xinwetamaj ta. Rik'in ri saqipueq y ri q'anapueq xekibanala-qa ri ki-dios. Ronojel re' xuben chike richin chi xpe wululen chikij.

⁵ Rix aj-Samaria, ri ruwachibel ri achij wákix ri xiben, jari' k'a ri xixjik'on kan wik'in yin. Yin kan yakatajineq k'a woyowal chiwij rix. ¿K'a janipe' k'a xtich'ajch'ojirisaj-iwi' rix israelita?

⁶ Re wachibel re' kan richin chuqa' ri Israel. Re' xa achin xbanon richin, xa kan xtik'ajix k'a roma xa man dios ta.

⁷ Ri israelita xkitik k'a kaq'iq'; xtikiwachij k'a surkum. Man jun k'a ruwech tiko'n xtikik'ol chire ri ruwi' trigo, kan man xtiban ta k'a k'ej; y wi ta xtiban ri k'ej, xa winaqi' e aj juk'an chik xketijo-el.

⁸ Ronojel ri k'o chuwech ri ruwach'ulew Israel xa xk'is-el xa kan xtitz'et koma ch'aqa' chik ruwach'ulew, achi'el jun bojo'y ri man jun nik'atzin-wi.

⁹ Rije' xa xejote-q'anej pan Asiria, achi'el nuben jun bur richin k'echelaj, ri kan ruyon nrajo' nik'oje'. Ri aj-Israel kan xkiya' k'a sipanik richin xjunamatej-kiwech kik'in ch'aqa' chik winaqi'.

¹⁰ Stape' kan xkiyala' sipanik chike ri tinamit, yin xa kan k'a xkenmol na richin chi nikina' ri ralal ri ejqa'n ri xtiya'ox pa kiwi' koma ri rey y ri e tata'al.

¹¹ Ri tinamit Israel kan janila k'a k'iy porobel xeruben-q'anej, kan janila k'iy porobel richin xkinimirisaj ri kimak.

¹² Yin kan jantape' k'a xink'ut chikiwech ri nupixa', jak'a rije' xa xkiben chire chi achi'el xa man niq'ax ta chikiwech.

¹³ Toq yekisujula' kamelabel chinuwech yin, xa kan xekitijila' k'a qa ri ti'ij richin kamelabel. Re' kan man xqa' ta chinuwech yin. Wakami kan xtinwajlaj k'a ronojel ri kimak, kan xtinya' k'a ri tojbalil pa kiwi', y kan xtinben chike richin xketzolej chik pan Egipto.

¹⁴ Ri aj-Israel xa xkimestaj k'a ri banayon kichin, kan xkipabala' k'a q'anej jay kichin q'atbel-tzij. Ri aj-Judá xekiyakala' k'a q'anej tinamit ri sutin-kij chi tz'aq. Jak'a yin kan xtinya' k'a ruq'aq'al ri kitinamit y kan xkeruk'is k'a q'aq' ronojel ri jay ri xekipabala-q'anej, ncha' ri Dios.