Wuj Richin ri Q'axanri'il 21 - Kaqchiquel Bible

Ri israelita xekich'ek ri aj-Arad

¹ Y pa xokon chire ri ruwach'ulew Canaán k'o k'a jun tinamit rubini'an Arad. Y toq ri rey ri richin ri tinamit ri' xrak'axaj chi ri israelita e peteneq ri pa bey richin ri tinamit Atarim, rija' xyakatej-el y xeberuchapa' chi oyowal y xeruchop kan jujun winaqi' chike rije'.

² Y xeri' ri israelita kan xkibij k'a chire ri Jehová, chi wi xkerujech ri winaqi' ri' pa kiq'a', kan xkekik'is ri kitinamit.

³ Y ri Jehová kan xrak'axaj k'a ri kich'abel rije' toq xekamela'an chuwech y kan xerujech k'a ri winaqi' pa kiq'a' y xekik'is chuqa' ri kitinamit y roma ri' ri tinamit ri' xubini'aj Hormá.*f3*

Toq xban ri kumetz rik'in q'enq'oj-pueq

⁴ Ri israelita xe'el k'a pe ri chiri' rik'in ri juyu' Hor, ri akuchi ek'o-wi-qa y xkik'uaj-el ri bey ri nibe-qa k'a rik'in ri Kaqa-Palou, richin chi nikisutij-rij ri ruwach'ulew Edom y man yeq'ax ta chiri'; jak'a ri israelita xa xkimalij kik'u'x roma janila k'ayew kina'on.

⁵ Roma ri' rije' itzel xech'on chik chirij ri Dios y chirij ri Moisés y xkibij: ¿Achike roma toq xojawelesaj-pe pan Egipto xaxe richin yojken kan wawe' pa tz'iran ruwach'ulew? Roma xa kan maneq k'a qaway, maneq k'a qaya', y re wey re naya' chiqe re wawe' xa nimulun chik qak'u'x roma y kan man yojruchop ta chuqa', xecha'.

⁶ Y kan jari' toq ri Jehová xeruteq-pe itzel taq kumatzi' chikikojol ri winaqi' richin xekiti' y e k'iy k'a chike rije' xeken.

⁷ Roma ri' ri winaqi' xebe k'a rik'in ri Moisés y xkibij k'a chire: Roj kan xojmakun-wi k'a, roma itzel xojch'on chirij ri Jehová y chawij rat. Tabana' utzil kach'on rik'in ri Jehová y tak'utuj utzil chi kerelesaj-el re kumatzi' chiqakojol, xecha'. Y ri Moisés kan xch'on-wi k'a rik'in ri Dios pa kiwi' rije'.

⁸ Y ri Jehová kan jari' xubij-pe chire ri Moisés: Tabana' jun ruwachibel kumetz y tatzukuba' chutza'n jun che'; y xabachike k'a wineq ri nuti' kan kumetz, tutzu' ri wachibel ri' y xtik'ase', xcha' ri Jehová.

⁹ Y ri Moisés kan jari' xuben jun ruwachibel kumetz rik'in q'enq'oj-pueq y xutzukuba' chutza'n jun che'; y toq k'o k'a jun wineq ri nuti' kan kumetz, kan chi'anin k'a nutzu' ri wachibel ri' y nik'ase' kan.

Ri israelita nikisutij ri ruwach'ulew Moab

¹⁰ Chirij ri', ri winaqi' israelita xkichop chik k'a el binen y xe'apon pan Obot y xek'oje-qa chiri'.

¹¹ Y toq xe'el-el ri chiri', xebek'oje' kan ri pan Iié-abarim, ri chiri' pa tz'iran ruwach'ulew, ri k'o-apo chuwech ri ruwach'ulew Moab, ri pa relebel-q'ij.

¹² Xe'el chik el ri chiri', y xebek'oje' ri pa taq'aj chuchi' ri raqen-ya' Zéred.

¹³ Y toq xe'el chik el ri chiri' pa Zéred, xebek'oje' kan k'a chuchi' ri raqen-ya' Arnón, ri k'o chupan ri tz'iran ruwach'ulew. Y ri raqen-ya' Arnón jari' ri k'ulba't richin ri ruwach'ulew Moab, y kichin ri winaqi' amorreo. Y keri' ri israelita xe'apon k'a ri pa kiruwach'ulew ri winaqi' amorreo.

¹⁴ Xa roma ri' toq chupan ri wuj ri e tz'ibatel kan chirij ri labal ri xeruben ri Jehová, nich'on pa ruwi' ri tinamit Vaheb ri k'o pa ruwach'ulew Sufá, y chuqa' ri raqen-ya' Arnón,

¹⁵ ri ch'uti'n raqen-ya', jari' ri ruk'ulba't ri Moab, y napon k'a pa tinamit Ar.

¹⁶ Y toq xe'el-el ri chiri' pa k'ulba't richin ri Moab, xe'apon pa Beer y chiri' k'o-wi ri pozo ri akuchi toq ri Jehová xubij chire ri Moisés chi kerumolo' konojel ri winaqi' richin chi ri Jehová nuya' kiya'.

¹⁷ Ja k'a toq xbanatej ri', jari' toq ri winaqi' israelita xkibixaj k'a re jun bix re': ¡Xabulbu'x-pe ya' chupan ri pozo! ¡Roma ri' yatqak'ul k'a rik'in bix!

¹⁸ Rat pozo ri at banon kan koma ri achi'a' ri kan k'o kiq'ij. Kan ja ri aj-raqen ri ek'o pa ruwi' ri tinamit ri xak'oton kan, kan rik'in ri kich'ame'y xatkik'ot-wi, xecha'. Xeri' ri israelita xe'el-el ri chiri' pa tz'iran ruwach'ulew y xe'apon pa jun chik ruwach'ulew y xkibij Mataná*f4* chire,

¹⁹ y toq xe'el-el ri chiri' pa Mataná, xe'apon pa jun chik ruwach'ulew, y xkibij Nahaliel*f5* chire. Y toq xe'el-el ri pa Nahaliel, xe'apon pa jun chik ruwach'ulew, y xkibij Bamot*f6* chire.

²⁰ Y toq xe'el chik k'a el ri chiri' pa Bamot, xe'apon ri pa taq'aj ri k'o chupan ri ruwach'ulew Moab, pa ruwi-el ri juyu' rubini'an Pisgá ri akuchi niq'alajin chijun ri tz'iran ruwach'ulew.

Ri israelita xech'akon chirij ri rey Sihón

²¹ Y chirij re' ri winaqi' israelita xekiteq k'a el uk'uey rutzijol k'a rik'in ri Sihón, ri rey kichin ri winaqi' amorreo, y xbekibij k'a chire:

²² Roj niqajo' yojq'ax-el chupan ri nima-bey richin ri aruwach'ulew. Jak'a man xqojq'ax ta k'a chupan ulew ri e samajin chik, ni chupan ulew ri tikon kiwech rik'in uva; ni man xtiqaqum ta el chuqa' qaya' ri pa taq i-pozo. Xa kan choj k'a xqojbe chupan ri nima-bey y keri' k'a niqaben richin niqaq'axaj-el chijun ri aruwach'ulew, xecha'.

²³ Jak'a ri Sihón xa man xrajo' ta chi ri israelita xeq'ax ta chiri' pa ruruwach'ulew. Xa pa ruk'exel chi xuya' ta q'ij chike, xa xerumol k'a konojel ri ruwinaq richin oyowal y xeyakatej-el richin xebe k'a pa tz'iran ruwach'ulew richin chi xeberuchapa' chi oyowal ri winaqi' israelita. Y toq xe'apon ri chiri' pa Jahas, jari' toq xekichop chi oyowal.

²⁴ Man rik'in ri', ri israelita xa xech'akon k'a y xekikamisaj chi espada y xok k'a kan kichin rije' ri ruwach'ulew ri', ri nitiker-el rik'in ri raqen-ya' Arnón y napon k'a rik'in ri raqen-ya' Jaboc; ri akuchi nitiker-wi-el ri kiruwach'ulew ri winaqi' amonita. Jak'a man xekich'ek ta roma ri kitinamit rije' kan jebel tz'apen chi tz'aq.

²⁵ Y keri', toq ri israelita xekichop konojel ri tinamit kichin ri winaqi' amorreo, xkiben kichin chike ri tinamit ri' y xek'oje' ri pa taq jay. Chuqa' keri' xkiben rik'in ri tinamit Hesbón y ri taq kokoj tinamit ri ek'o-pe chunaqaj.

²⁶ Ri tinamit Hesbón jari' ri rutinamit kan ri Sihón, ri rey kichin ri winaqi' amorreo. Ri ojer kan rija' kan rubanon-wi labal rik'in ri rey ri xnabeyej-el chuwech ri k'o wakami ri chiri' pa Moab y ruch'akon kan chuwech ronojel ri ruruwach'ulew ri', ri nitiker-el chuchi' ri raqen-ya' Arnón y napon k'a pa xaman.

²⁷ Xa roma ri' ri etamanela' ri yenuk'un ri jebejoj taq tzij, kitz'iban kan: Kixanpe wawe' pa tinamit Hesbón y tiyaka' chik q'anej, kan tibana' chi tibek'ulun chik pe ri rutinamit ri Sihón.

²⁸ Roma ojer kan chupan ri tinamit Hesbón xel-pe q'aq', chupan ri rutinamit ri rey Sihón xbek'ulun-pe ruxaq q'aq'. Xuk'is k'a ri nimalej tinamit Ar ri richin ri ruwach'ulew Moab, xeruk'is k'a ri nima'q taq achi'a' ri ek'o chiri' pan Arnón.

²⁹ ¡Tijoyowex awech rat Moab! Kan xak'is k'a rat tinamit richin ri dios Quemós. Rat Quemós, xa xaya' q'ij chi ri awinaq achi'a' xe'animej, xa xaya' q'ij chi ri e kimi'al rije' xe'uk'uex pa ximonri'il. Xa xe'uk'uex roma ri Sihón, ri rey kichin ri winaqi' amorreo.

³⁰ Jak'a re wakami, roj kan xeqak'is ri aj-Moab. Kan xek'is konojel ri winaqi' ri ek'o pa Hesbón y ri tinamit Dibón. Kan man jun chik wineq ri xqaya' kan ri napon pa tinamit Nófah y pa tinamit Medebá.

³¹ Keri' toq ri israelita xek'oje' kan chuwech ri ruwach'ulew kichin ri winaqi' amorreo.

Ri israelita xech'akon chirij ri Og rey richin Basán

³² Y toq ri Moisés e rutaqon chik el achi'a' richin xbeketamaj kan jebel ri rubanik ri tinamit Jazer y kan e tzolejineq chik pe ri achi'a' ri'; jari' toq ri israelita xekichop ri kokoj taq tinamit ri ek'o chiri', y xekelesaj-el ri winaqi' amorreo.

³³ K'ari' ri israelita xetzolin chik richin xebe pa xaman chire ri ruwach'ulew Basán. Y k'o k'a jun rey ri chiri' rubini'an Og. Y rija' xbeyakatej k'a pe e rachibilan konojel ri aj-labal, richin nibekibana' oyowal kik'in ri israelita.

³⁴ Xeri' ri Jehová xubij chire ri Moisés: Man taxibij-awi' chuwech rija', roma yin xkenjech pan aq'a', e rachibilan konojel ri ruwinaq y chuqa' xtinya' chiwe ri kulew. Xaxe tabana' rik'in achi'el xaben rik'in ri Sihón, rey kichin ri winaqi' amorreo ri xk'oje' kan pan Hesbón.

³⁵ Keri', ri israelita xkikamisaj ri Og, ri e ralk'ual y konojel ri ruwinaq y man jun k'a chike rije' xk'ase' kan y ri kiruwach'ulew xok k'a kan kichin ri israelita.