Wuj Richin ri Q'axanri'il 20 - Kaqchiquel Bible

Ri ya' ri xel-pe chupan jun nimalej abej

¹ Y toq xq'ax yan juba' juna', ri winaqi' israelita xe'apon chik jun bey pa tz'iran ruwach'ulew Sin, chupan ri nabey ik' chire ri juna'. Y chiri' pa tinamit Cadés xek'oje-qa. Y xken k'a kan ri María y xmuq kan chiri'.

² Y ri winaqi' xa maneq kiya' chiri' y roma ri' xkimol-ki' y xeyakatej chik jun bey chirij ri Moisés y chirij ri Aarón.

³ Y kan xkichop k'a chi oyowal ri Moisés y xkibij chire: Xa más ta utz xojken kan, toq ri Jehová xerukamisaj ri qach'alal.

⁴ ¿Achike roma xojak'en-pe chupan re tz'iran ruwach'ulew re', xaxe richin chi yojken kan wawe' roj y ri qawej?

⁵ ¿Y achike roma toq rix xojiwelesaj-pe pan Egipto y xojik'en-pe wawe' ri akuchi janila itzel? Xa man utz ta richin niqaben-qa ri qatiko'n y chuqa' maneq qawíkix, uva ni qa-granada. Chuqa' maneq qaya' richin niqaqum, xecha'.

⁶ Y ri Moisés y ri Aarón xekiya' k'a kan ri kiwinaq y xebe k'a chuchi' ri rachoch ri Jehová, y kexukuk xeqaqa pan ulew. Jari' toq ri Jehová xuk'ut-ri' chikiwech, y kan xuq'alajirisaj k'a ri' chupan ri ruk'ojlemal.

⁷ Jari' toq ri Jehová xch'on k'a rik'in ri Moisés y xubij chire:

⁸ Tachapa' ri ch'ame'y, y rat awachibilan ri awach'alal Aarón ke'imolo' konojel ri iwinaq chuwech ri nimalej abej ri k'o chiri'. K'ari' kan chikiwech konojel ri winaqi' ri' kach'on chire ri abej y xtibeq'ejej-pe ya'. Y keri' k'a xtaben chi xtibe'el-pe ya' richin ke'uk'ya' ri awinaq y chuqa' richin ke'uk'ya' ri kawej, xcha'.

⁹ Jari' toq ri Moisés xberuk'ama-pe ri ch'ame'y ri k'o kan chiri' pa rachoch ri Jehová, achi'el ri xbix chire.

¹⁰ Y rija' rachibilan ri Aarón kan jari' k'a xekimol konojel ri kiwinaq ri chiri' chuwech-apo ri nimalej abej. K'ari' ri Moisés xch'on kik'in y xubij chike: ¡Tiwak'axaj k'a rix winaqi' ri ipaban-iwi' chuwech ri Jehová! ¿Ninimaj rix chi roj kan niqaben chi nel-pe ya' chupan re abej re' richin chi niqum rix?, xcha' ri Moisés chike.

¹¹ Y jari' toq ri Moisés xutzeqej k'a ri ruch'ame'y y xuk'osij ka'i' mul ri abej. Y kan jari' xbechoxcho-pe ya' chupan ri abej; y xe'uk'ya' k'a konojel ri winaqi', y xe'uk'ya' chuqa' ri kawej.

¹² Kan jari' toq ri Jehová xubij chire ri Moisés y chire ri Aarón: Roma rix xa man xikuquba' ta ik'u'x wik'in, y xa maneq nuq'ij xiben chuwe chikiwech ri winaqi', roma ri' xa kan man ja ta k'a rix ri xkixukusan-apo re winaqi' re' chupan ri ruwach'ulew ri kan kichin rije', xcha'.

¹³ Ja ya' re' ri xubini'aj Meribá, roma ja ri chiri' toq ri winaqi' xkich'ojij kiya' chire ri Jehová; y chiri' chuqa' toq rija' kan xuk'ut-ri' chikiwech chi kan k'o-wi ruq'ij-ruk'ojlen.

Ri israelita man xetikir ta xeq'ax pa ruwach'ulew Edom

¹⁴ Toq ri Moisés y ri ruwinaq ek'o k'a chiri' pa tinamit Cadés, rija' xeruteq k'a uk'uey rutzijol k'a rik'in ri rey richin ri ruwach'ulew Edom, y kere' k'a ri xuteq-el rubixik chire: Roj ri awach'alal, ri oj rijatzul kan ri Israel, niqabij k'a chawe: Kan awetaman k'a chi roj ronojel ruwech ruk'ayewal ri qaq'axan-pe re xojoqaqa k'a re wawe'.

¹⁵ Rat awetaman chi ri qati't-qamama' xebe-qa k'a pan Egipto, y xojk'oje' chiri' janila k'iy juna'. Awetaman chuqa' chi ri winaqi' aj chiri' kan janila xojkiya' pa tijoj-poqonal roj, kan achi'el chuqa' xkiben-el kik'in ri qati't-qamama';

¹⁶ y roma ri' toq roj xojch'on k'a rik'in ri Jehová y rija' kan xrak'axaj ri qach'abel. Xuteq k'a jun ángel richin xojrelesaj-pe pan Egipto y wakami ojk'o wawe' pa Cadés, tinamit ri k'o chunaqaj ri k'ulba't richin ri aruwach'ulew.

¹⁷ Niqak'utuj k'a utzil chawe richin naya' ta q'ij chiqe richin yojq'ax-el juba' chupan ri aruwach'ulew. Man xqojq'ax ta chupan ulew ri samajin chik, ni chupan tiko'n richin uva, ni man xtiqaqum ta el qaya' pa taq i-pozo. Xa kan choj k'a xtiqak'uaj-el ri nima-bey; kan man xqojbe ta pa qijkiq'a' ni ta pa qajxokon. Keri' k'a niqaben richin niqaq'axaj-el chijun ri aruwach'ulew, xcha-el.

¹⁸ Jak'a ri rey richin Edom xa xubij: Rix man xkixq'ax ta chupan re nuruwach'ulew; roma wi kan xtiben chi yixpe kere', yin xkiyakatej chi oyowal chiwij e wachibilan ri aj-labal ri ek'o wik'in, xcha' ri rey.

¹⁹ Y ri achi'a' israelita ri e taqon-el xkibij: Xa kan choj k'a xtiqak'uaj-el ri nima-bey; y wi roj y ri qawej xtiqaqum-el ri ya' ri k'o iwik'in, xa kan xtiqatoj k'a kan chiwe. Ri niqajo' roj xaxe taya' q'ij chiqe richin yojq'ax-el re wawe', xecha'.

²⁰ Jak'a ri rey richin Edom man xuya' ta q'ij chike richin xeq'ax-el chiri'. K'ari' rija' y janila chi aj-labal xeyakatej k'a chikij ri winaqi' israelita.

²¹ Y roma rija' kan man xuya' ta q'ij chike ri winaqi' israelita richin chi yeq'ax chupan ri ruruwach'ulew, roma ri' rije' xkijel kibey y k'a nej chik xebesutin-pe.

Ri rukamibal ri Aarón

²² Y toq konojel ri winaqi' israelita xkiya' kan ri tinamit Cadés, xkichop k'a bey y xe'apon k'a ri akuchi k'o-wi ri juyu' rubini'an Hor,

²³ ri k'o chiri' pa relebel-q'ij chire ri ruk'ulba't ri ruwach'ulew Edom. Y toq rije' ek'o chiri' chunaqaj ri juyu' ri', jari' toq ri Jehová xch'on rik'in ri Moisés y rik'in ri Aarón y xubij:

²⁴ Rat Aarón yabeken yan, y man xkatok ta chupan ri ruwach'ulew ri nusujun chike ri awinaq israelita, roma rix ix ka'i' xiq'ej ruwi' ri nuch'abel, ri chiri' akuchi xk'oje-wi kan ri ralaxbel-ya' Meribá.

²⁵ Wakami, rat Moisés ke'ak'uaj k'a el ri Aarón y ri Eleazar ri ruk'ajol y kixjote-el pa ruwi' ri juyu' Hor.

²⁶ K'ari' tawelesaj ri tzieq richin sacerdote chirij ri Aarón y taya' chirij ri Eleazar, roma ri Aarón xa kan xtibeken k'a kan ri chiri', xcha' ri Jehová.

²⁷ Y ri Moisés kan xuben k'a achi'el ri xubij ri Jehová chire. Xejote' k'a el pa ruwi' ri juyu' Hor y konojel k'a ri kiwinaq e kitzuliben-el.

²⁸ Y toq xe'apon el, ri Moisés xrelesaj k'a ri tzieq richin sacerdote chirij ri Aarón y xuya' chirij ri Eleazar, ri ruk'ajol. Chiri' k'a xken-wi kan ri Aarón, y k'ari' ri Moisés y ri Eleazar xeqaqa-pe.

²⁹ Y toq ri winaqi' xkitz'et chi ri Aarón man xtzolej ta chik pe, chi'anin k'a xq'ax chikiwech chi xa xken kan, y roma ri' konojel winaqi' xek'oje' k'a pa bis juwineq lajuj q'ij.