Wuj Richin ri K'uxla'anik 2 - Kaqchiquel Bible

¹ Roma ri royowal ri Jehová, kan xuq'equmarisaj ri tinamit Sión, kan xuben chire chi achi'el xa ta k'a chila' chikaj xberuk'aqa-pe k'a pan ulew. Ri rubanon kan, ri Sión kan jari' ri qajineq chuwech, jak'a re wakami kan man niqaqa ta chuk'u'x roma ri royowal.

² Xuben k'a chi kan man jun chik jay richin ri Judá ri xpa'e' ta kan. Xeruwulaj ronojel ri jay richin tobel richin ri ruwach'ulew Judá. Xeruqasaj k'a pan ulew ri ajawaren y ri e tata'al.

³ Rik'in ri royowal xrelesaj k'a ri uchuq'a' ri k'o qik'in. Chuqa' kan man xojruto' ta chik toq xeyakatej ri e etzelanel qichin chiqij. Ri royowal ri xyakatej chiqij roj, kan achi'el ri q'aq' ri nuk'is ronojel ri k'o chunaqaj.

⁴ Ri Dios kan xok k'a achi'el jun etzelanel qichin; xuchojmirisaj k'a ri ruk'aqbal-ch'ab richin chi xojruq'ijuj. Kan xuk'is k'a ronojel ri kan jebel rubanon, ri royowal kan xuya' k'a pe pa qawi' achi'el jun q'aq'.

⁵ Ri Jehová kan xok k'a achi'el jun etzelanel, kan xuwulaj k'a jumul ri qatinamit Israel. Xeruwulaj k'a ronojel nima'q taq jay; xeruk'is ri jay richin tobel. Xunimirisaj k'a ri bis y ri q'axo'n pa ruwi' ri Judá.

⁶ Ri rachoch rija' kan xuwulaj k'a el, achi'el niban chire jun ti mo'k ri k'o chupan ri tiko'n. Xuwulaj k'a el ri akuchi niban-wi molojri'il. Ri Jehová xrelesaj k'a el chupan ri tinamit Sión ri nimaq'ij y ri q'ij richin uxlanen. Roma ri royowal kan xerixowaj k'a kan ri rey y ri e sacerdote.

⁷ Ri Jehová kan xumalij k'a kan ri porobel ri k'o pa rachoch. Xuben kan chire ri rachoch chi kan man jun rejqalen. Xujech k'a pa kiq'a' ri e etzelanel qichin, ri rachoch ri rey. Ri e etzelanel qichin kan xkiraqala' k'a kichi' chupan ri rachoch ri Jehová; achi'el xa ta ja ri q'ij richin nimaq'ij xkiben chupan.

⁸ Ri Jehová kan xuben chi xwulex-el ri tz'aq chirij ri tinamit Sión, Xuben chi kan achi'el xa ta xretaj richin xuk'is ronojel. Ri tinamit kan xmalin-xmalin kan; roma ri tz'aq xa kan xetzaq k'a qa.

⁹ Ri che' richin ri okibel xetzaq y xemuqutej yan; y ri ch'ich' ri e q'ebalon chirij xa xetalutej. Ri rey y ri e tata'al ek'o nej chupan ri ximonri'il, chikikojol ri winaqi' ri maneq Dios chikiwech. Ri pixa' ri xya'ox chiqe xa maneq chik, y ri e q'alajirisey ruch'abel ri Dios kan man jun chik ri xk'ut chikiwech.

¹⁰ Ri rijita'q taq achi'a' richin ri tinamit xetz'uye' k'a pa poqolaj, y kan man jun chik k'a nikibij. Xkiya' k'a poqolaj pa kijolon, y xkikusaj qirix taq tzieq. Keri' chuqa' ri xtani' kan xkiqasaj-ki' k'a pan ulew.

¹¹ Ri woq'ej kan nuk'is k'a ruchuq'a' ri runaq'-nuwech. Ri nupan kan achike na k'a nuben roma ri q'axo'n. Kan niq'axon ri wánima roma nintz'et ri tijoj-poqonal ri nikik'owisaj ri nuwinaq; roma ri ak'uala' y ri neneya' e punupuxineq pa taq bey richin ri tinamit.

¹² Nikik'utuj k'a chire ri kite' akuchi k'o-wi ri kiway y ri ki-vino. Yekamiyaj k'a qa pa taq bey achi'el nikiben ri winaqi' ri e sokotajineq. Kan chuwa-kik'u'x k'a ri kite' yeken-wi-qa.

¹³ Man jun yitikir ninben richin yixinto', rix nuwinaq aj-Jerusalem. Man jun yitikir ninbij richin ninkuquba' ik'u'x. Ri tinamit kan man jun bey chik xtibe pa jotol, roma ri wululen. Y roma ri' ¿achike ta k'a xtitikir xtelesan ri q'axo'n ri k'o iwik'in?

¹⁴ Ri achi'a' ri xkibananej chi e q'alajirisey ruch'abel ri Dios, xa tz'ukuj-tzij ri xkiben, y ri xkibij xa man jun rejqalen. Rije' man xkiq'alajirisaj ta ri imak, richin xtzolin ta pe ik'u'x, y man ta xixbe pa ximonri'il. Ri xkiq'alajirisaj chiwech xa xixruk'uaj chik kan pa jun bey.

¹⁵ Konojel ri winaqi' ri yeq'ax keri' qik'in, kan yojkitze'ej kan. Chuqa' yexuban y nikisiloj ri kijolon chiqij. Ri e etzelanel qichin yetze'en y nikibij: Jak'a tinamit re' ri nikibij chi kan janila jebel, Kan jare' ri ruwaq'ijaj richin chijun ruwach'ulew, yecha'.

¹⁶ Konojel k'a ri e etzelanel qichin nikijeq pa kichi' chiqij; yojkitze'ej y nikiqach'ech'ila' key chiqij. Y nikibij chi yojkik'is jumul. Y chuqa' nikibij chi ja q'ij re' ri koyoben, y chi wakami kan xojqaqa pa kiq'a'. Rije' xkitz'et k'a ri qak'uluwachin.

¹⁷ Ri Jehová kan xuben k'a ri rubin-pe pa qawi'. Kan xutaqej k'a ri ruch'abel ri xubij-pe chiqij ri ojer kan. Xuk'is k'a ronojel y man xujoyowaj ta qawech. Xunimirisaj k'a ri kuchuq'a' ri nich'upun kik'u'x chiqij.

¹⁸ Rix aj-Sión, rik'in k'a ronojel iwánima kixch'on rik'in ri qajaw. Kan kixoq' k'a chuwech chi paq'ij chi chaq'a'. Man kixuxlan, ni man ke'uxlan ri runaq' taq iwech.

¹⁹ Ri pa taq chi'aq'a', kixyakatej y tiraqa' ichi'. Toq nokoq'a-pe, kan tijaqa' ri iwánima chuwech ri qajaw. Tiyaka' ri aq'a' chuwech richin nik'utuj utzil pa kiwi' ri iwalk'ual, ri yeken-qa roma wayjal pa taq bey richin ri tinamit.

Ri winaqi' aj-Jerusalem nikibij:

²⁰ Nimalej Jehová, tabana' utzil tatz'eta' y tach'obo' chi kan man jun chik achoq pa ruwi' aya'on-wi re jun ruk'ayewal re'. ¿Kan xkekitej kami qa ri teja' ri taq kal, ri k'a yetz'uman na? ¿Kan xtaya' ta kami q'ij richin yekamisex ri e sacerdote y ri e q'alajirisey ri ach'abel chupan ri awachoch?

²¹ Chi ak'uala', chi rijita'q e punupuxineq kan pa taq bey. Ri xtani' y ri alaboni' xekamisex kan chi espada. Roma ri awoyowal, xateq k'a pe ri kamik chiqij. Xe'akamisaj k'a konojel y man xajoyowaj ta kiwech.

²² Xak'en k'a pe janila ruk'ayewal pa qawi', kan achi'el toq nikimol-ki' ri janila chi winaqi' pa jun nimaq'ij. Chupan ri q'ij richin ri awoyowal, kan man jun k'a xtikir xukol-ri' chawech. Ri etzelanel qichin kan xeruk'is k'a konojel winaqi' ri e nuk'iytisan-pe ri winaqi' ri nuya'on-pe tijonik chike, wakami xa xeken yan.