Ez 8 - Kaqchiquel Bible

Ri mak ri xeban pa Jerusalem

¹ Xk'uluwachitej k'a chi chupan ri ro' q'ij chire ri ruwaq ik' richin ri ruwaq juna' toq oj eleneq-pe pa qaruwach'ulew. Yin Ezequiel in tz'uyul k'a pa wachoch y ri achi'a' ri k'o kiq'ij richin ri Judá e tz'uyul-apo chinuwech. Jari' toq ri ruchuq'a' ri Jehová xoqaqa pa nuwi'.

² Y xintz'et k'a jun achi'el wineq. Y kere' k'a ri rubanik: Ri xerupan ri pa jotol-q'anej kan achi'el jun saqil ri kan nirepelun achi'el nirepelun ri q'enq'oj-pueq. Y ri pa xulan-qa kan achi'el q'aq'.

³ Y ri wineq ri' xuya' k'a pe ri ruq'a' chuwe y xirujik'-el chirusumal-nuwi' y rik'in uchuq'a' xirutzeqej-el chikaj. Y pa jun achi'el achik' xiruk'uaj k'a pa rachoch ri Jehová ri k'o k'a pa Jerusalem, ri akuchi k'o-wi ri okibel ri k'o pa xaman chire ri ruwa-jay ri k'o-apo. Y chiri' k'o jun ruwachibel jun dios ri kibanon ri winaqi', ri niyako royowal ri Jehová.

⁴ Y xintz'et k'a chi chiri' k'o-wi ri ruk'ojlemal ri Jehová, xa kan junan rubanik rik'in ri xk'utumej chinuwech pa nabey.

⁵ K'ari' ri Jehová xubij chuwe chi kitzu'un kela' pa xaman. Y yin kan xitzu'un k'a y xintz'et ri wachibel ri niyako royowal ri Jehová ri chiri' akuchi k'o-wi ri porobel.

⁶ Y xubij: Rat Ezequiel, ¿natz'et kami la nikiben ri awinaq israelita? Ri banobel ri' kan man niqa' ta chinuwech yin y re' nuben chuwe richin ninya' kan ri wachoch. Y pa ruwi ri'; xa kan ek'o chik ch'aqa' ri kan más e k'ayew, xcha'.

⁷ Y xeri' xiruk'uaj-el ri akuchi k'o-wi ri okibel ri richin ri ruwa-jay, ri richin ri rachoch ri Dios y chiri' xintz'et chi teq'el ri tz'aq.

⁸ K'ari' ri Dios xubij chuwe chi tinnimirisaj ri teq'el chire ri tz'aq ri'. Yin kan xinnimirisaj k'a ri teq'el ri' y jari' toq xinnabej chi xa jun okibel.

⁹ Y xeri' xubij chuwe chi yinok-apo y nintz'et ri itzel taq banobel ri nikibanala' chiri', ri kan man yeqa' ta chuwech.

¹⁰ Xinok k'a apo y xintz'et k'a ri tz'aq ri k'o chupan, nojineq ruwech rik'in wachibel kichin chikopi' ri e jepejeq y wachibel kichin chikopi' ri man e ch'ajch'oj ta y ronojel ruwech wachibel ri nikiya' kiq'ij ri nuwinaq.

¹¹ Y chikiwech k'a rije' e pa'el-apo e oxk'al lajuj achi'a' ri k'o kiq'ij y pa kinik'ajal rije' k'o ri Jaazanías ruk'ajol ri Safán. Y rije' kan nikiya' k'a kiq'ij ri wachibel ri'. Chikijujunal k'a ri achi'a' ri' kik'uan jun porobel-pom y ri rusibil y ri rujubulil kan nijote-el.

¹² Y ri Dios xubij chuwe: Rat Ezequiel, tatz'eta' k'a ronojel ri yekibanala' pan ewel re achi'a' re' y chikijujunal rije' kan ek'o-apo pa kik'ojelibal ri wachibel richin nikiya' kiq'ij Y kan nikibij-qa chi yin man yentz'et ta y chi yin xenmalij yan kan.

¹³ Katzu'un ke taq ri' y xtatz'et chik más nima'q itzel taq banobel ri kan man utz ta nintz'et yin, xcha'.

¹⁴ Y xiruk'uaj-el pan okibel ri k'o pa xaman chire ri rachoch y xentz'et k'a ixoqi' ri e tz'uyul chiri' y nikoq'ej ruwech ri dios Tamuz.

¹⁵ Xeri' ri Jehová xubij chik chuwe: Rat Ezequiel, katzu'un kela' y kan xtatz'et chik más itzel taq banobel chuwech re', banobel ri kan man utz ta nintz'et yin, xcha'.

¹⁶ Y xiruk'uaj chik el pa ruwa-jay richin ri rachoch. Y ri akuchi niban-wi oken chire ri jay ri' ri chiri' chuwa-jay chunaqaj ri porobel, xentz'et jubama e juwineq wo'o' achi'a' ri kiya'on kan kij chuwech ri rachoch ri Jehová. Y yetzu'un k'a kela' pa relebel-q'ij y kilukuban-qa-ki' k'a pan ulew richin nikiya' ruq'ij ri q'ij.

¹⁷ K'ari' ri Jehová xubij chuwe: Rat Ezequiel, tatz'eta' k'a la nikiben ri awinaq. Rije' kan man nikibij ta chi ri nikiben jun mak. Chuqa' rije' kan e jaqatajineq chupan ri ruwach'ulew richin nikiben etzelal y kan kiyakon k'a janila woyowal.

¹⁸ Y roma ri' yin chuqa' kan xkiyakatej k'a chikij rik'in janila woyowal, y kan man xtinjoyowaj ta k'a kiwech. Stape' xkech'on wik'in rik'in raqoj-chi'ij, yin kan man xkenwak'axaj ta k'a, xcha'.