Ez 33 - Kaqchiquel Bible

Ri Ezequiel xok achi'el chajinel pa ruwi' ri Judá

¹ Ri Jehová xch'on chik wik'in y xubij chuwe:

² Rat Ezequiel, kach'on kik'in ri awinaq y taya' re jun rutzijol re' chike: Toq yin xtinben chi xtipe jun labal pa ruwi' jun ruwach'ulew. Ri winaqi' richin ri ruwach'ulew ri' xtikiya' jun chajinel.

³ Y wi ri chajinel ri' nutz'et chi peteneq ri oyowal, kan jari' nuxupuj ri trompeta richin nuya' rutzijol chiwe.

⁴ Jak'a ri wineq ri xrak'axaj jebel ri trompeta toq xq'ajan y xuben chi achi'el man xrak'axaj ta, kan xtapon k'a ri kamik rik'in y rija' xtrejqalej ri rukamik.

⁵ Roma xa xrak'axaj ri trompeta y xa xuben chi man xrak'axaj ta, kan xtrejqalej k'a ri rumak, jak'a ri nixupun ri trompeta man jun rumak roma kan xuya' rutzijol.

⁶ Jak'a wi ri chajinel nutz'et chi peteneq ri oyowal y man xuxupuj ta ri trompeta richin chi xuya' rutzijol chike ri winaqi' y xtikamisex jun rik'in espada, re wineq re' xken, jak'a ri chajinel ri' kan xtrejqalej ri rukamik ri xken, xkacha' chike.

⁷ Jak'a rat ri xatincha' chikikojol ri winaqi' richin at okineq jun chajinel pa ruwi' ri nutinamit Israel, ja rat ri xkak'ulun ri ninbij y rat xkaya'on rutzijol chike ri awinaq ri ninwajo' ninbij chike.

⁸ Rik'in juba' yin ninbij chawe chi ri wineq ri rujachon-ri' chubanik etzelal, kan xtiken. Wi rat man jun xabij chire ri wineq ri' richin nuchojmirisaj ta ri ruk'aslen, rija' xtiken k'a y chawe rat xtinch'ojij-wi ri rukik'el.

⁹ Jak'a wi rat xaya' rutzijol chire y rija' man xuchojmirisaj ta ri ruk'aslen, rija' kan xtiken k'a roma ri rumak. Jak'a rat man xtawejqalej ta ri rukamik.

¹⁰ Rat Ezequiel, ri awinaq israelita nikibij chi janila k'iy ri kimak kejqalen y roma k'a ri kimak ri' xa kichapon yek'is-qa. Y nikik'utuj ri achike k'a yetikir nikiben richin yek'ase'.

¹¹ Jak'a yin Jehová ninbij chi man ninwajo' ta chi niken jun wineq, stape' rujachon-ri' chubanik etzelal. Ri ninwajo' yin chi nujel ta ri ruk'aslen y xtiyaloj xtik'ase'. Roma ri' tabij chike chi tikiya' kan ri itzel k'aslen richin man yeken ta.

¹² Roma ri' rat Ezequiel, taya' chike ri awinaq re jun rutzijol re': Wi k'o ta jun wineq ri utz ruk'aslen y niyakatej chuwij, ronojel ri utz rubanon-pe man jun rejqalen y man xtikolotej ta kan chire ri rutojbalil. Y wi ta jun wineq ri k'o ta jun rumak y nuya' kan ri itzel rubanobal, man rik'in ta k'a ri itzel ruk'aslen rubanon-pe, man jari' ta ri xtikamisan richin. Y wi ta ri utz ruk'aslen nimakun, ri utz ri xuben ojer kan, man jun chik xtuq'ajuj richin chi roma ta ri' man ta xtiken.

¹³ Wi ta yin ninjikiba' chi xtik'ase' jun wineq ri choj ruk'aslen, jak'a wi ri wineq ri' nuchop itzel banobel, man nitikir ta nukuquba' ruk'u'x rik'in ri utz rubanobal richin nik'ase'. Kan man xtiya'ox ta rejqalen ronojel ri utz rubanon-pe y xa xtiken k'a roma ri itzel rubanobal.

¹⁴ Rik'in juba' ninbij chire jun wineq ri rujachon-ri' chubanik ri etzelal chi rija' kan xtiken roma ri itzel rubanobal. Jak'a wi rija' xa nitzolej k'a pe ruk'u'x y nuya' kan ri itzel k'aslen y nuchop k'a rubanik ri utz,

¹⁵ re wineq re' kan xtik'ase'. Nel chi tzij chi wi rija' xuya' méro pa qajik y xuk'ul jun retal, k'o chi nutzolij ri retal ri'. Wi rija' k'o releq'an, k'o chi nutzolij ri releq'. Chuqa' k'o chi nuben achi'el nubij chupan ri pixa' y man nuben ta chik itzel taq banobel.

¹⁶ Wi rija' nuben kere', kan xtik'ase' roma xuben ri utz y man jun bey chik xtoqaqa chinuk'u'x ri rumak ri rubanalon-pe.

¹⁷ Jujun chiwe rix israelita nibij k'a chi yin man pa ruchojmilal ta ri ninben, xa jak'a rix ri man pa ruchojmilal ta ri niben.

¹⁸ Wi jun wineq choj ruk'aslen nuya' ta kan ri utzilej k'aslen ri ruk'uan y nuchop ta rubanik itzel banobel, re wineq re' kan xtiken roma kan itzel ri yeruben.

¹⁹ Jak'a wi jun wineq ri itzel ruk'aslen nuya' ta kan ri itzel rubanobal y nuben ri utz, rija' kan xtik'ase'.

²⁰ Rix winaqi' israelita kan ye'ikamuluj k'a rubixik y nibij chi yin Jehová xa kan man pa ruchojmilal ta ri ninben. Jak'a yin kan chi'ijujunal k'a xtinq'et-tzij pan iwi'. Wi rix xtiben utz, yin xtinya' urtisanik pan iwi'. Jak'a wi xtiben itzel, yin kan xtinya' rutojbalil ri imak, xcha' ri Dios.

Ri winaqi' ri ek'o pa Judá kan jantape' yemakun

²¹ K'o k'a jun q'ij jun achin xanimej-pe ri chiri' pa Jerusalem y xapon wik'in, toq xtz'aqet kablajuj juna' chi xojk'amer-pe pa Babilonia, chupan ri ro' q'ij chire ri ik' kablajuj. Y rija' xutzijoj chuwe chi ri tinamit Jerusalem xch'akatej pa kiq'a' ri e etzelanel qichin.

²² Jak'a ri aq'a' toq man jani tapon ri uk'uayon ri rutzijol chuwe, ri Jehová xutzeqej yan ri ruq'a' pa nuwi' richin xitikir xich'on chik jun bey. Y ri nimaq'a' toq xoqaqa ri achin ri niya'on rutzijol chuwe xich'on rik'in.

²³ Chirij re' ri Jehová xch'on wik'in y xubij chuwe:

²⁴ Ri awinaq ri k'a ek'o na chiri' pa Judá, ri ek'o pa taq tinamit ri e wulatejineq chik kan, nikich'ob chi ri Abraham xa ruyon-ok y man rik'in ri' xok rajaw ri ruwach'ulew. Roma ri' rije' nikich'ob chi roma rije' e janila e k'iy kan xketikir chuqa' xtikichinaj ri ruwach'ulew ri'.

²⁵ Jak'a yin ninbij chi rije' nikitej ti'ij ri k'a ruk'uan na kik', nikiya' kiq'ij wachibel y yekamisan. Man rik'in ri' nikajo' richin nok kan kichin ri ruwach'ulew ri'.

²⁶ Kan nikikuquba' kik'u'x rik'in ri kikamisabal; yekiben banobel ri yenwixowaj yin y konojel ri achi'a' yekikanola' ch'aqa' chik ixoqi'. Man rik'in ri' nikajo' richin nok kan kichin ri ruwach'ulew ri'.

²⁷ Taya' k'a re rutzijol re' chike: Chi'iwonojel rix ri ixk'o kan pa taq tinamit ri e wulatejineq, kan xkixkamisex. Y rix ri ixk'o pa taq juyu', xtinben chiwe chi xkixtij koma ri k'uxunela' taq chikopi'. Y rix ri iwewan-iwi' kojol taq jul xkixken k'a roma yabil.

²⁸ Kan xtinben k'a chire ri iruwach'ulew richin xtok jun tz'iran y xtinwelesaj ri iwuchuq'a' ri achoq ik'in inimirisan-iwi'. Ronojel ri juyu' xke'ok tz'iran, richin man jun chik wineq xtiq'ax chiri'.

²⁹ Toq yin xtinwulaj ri ruwach'ulew y xtinben kan tz'iran chire roma ri imak ri kan yenwixowaj, jari' toq xtiwetamaj k'a chi ja yin Jehová, xkacha' chike.

³⁰ Jak'a rat Ezequiel, ri awinaq ri ek'o chiri' pa Babilonia yetzijon chikiwech rije' pan awi' rat toq ek'o chunaqaj ri tz'aq richin ri tinamit y toq nikik'ul-ki' chuchi' taq kachoch. Y noqaqa chikik'u'x chi yepe awik'in rat richin nokak'axaj ri nuch'abel.

³¹ Keri' ri nutinamit yepe y yetz'uye-apo chawech, achi'el ri kibanon-pe richin nokak'axaj ri nuch'abel. Jak'a xa man nikak'axaj ta, ni man nikiben ta. Rije' nikibij chi yinkitzeqelibej, jak'a xa beneq kik'u'x chirij ri méro.

³² Rije' nikiben chawe chi at achi'el xa ta at jun bixanel richin ajowabel ri jebel ok nibixan y naq'ojomaj arpa. Y roma ri', stape' xtikak'axaj k'a ri ach'abel, xa man jun xtuk'en-pe chike.

³³ Jak'a toq xtibanatej ronojel ri xabij chike, k'ari' xtiketamaj k'a chi k'o jun qitzij q'alajirisey nuch'abel chikikojol, xcha' chuwe.