Ez 31 - Kaqchiquel Bible

Ri rey richin Egipto nijunamex rik'in jun tiox-che'

¹ Toq xtz'aqet yan julajuj juna' chi xojk'amer-pe pa Babilonia, chupan ri nabey q'ij chire ri rox ik', ri Jehová xch'on chik wik'in y xubij chuwe:

² Rat Ezequiel, tawak'axaj re': Taya' re jun rutzijol re' chire ri rey richin Egipto y chuqa' chike ri ruwinaq: Ri iwajawaren rix kan ik'owineq chik ruwi' ri ruchuq'a' chuwech chijun ruwach'ulew. Y roma ri' tiwak'axaj k'a re jun etamabel-tzij re':

³ Rix aj-Egipto, ix achi'el jun tiox-che' ri k'o chiri' pa juyu' Líbano: Y ri che' ri' kan jebel ruq'a' y kan janila nim ri rumujal, y nej ri rujotolen y ri rutum napon k'a pa sutz'.

⁴ Ri ya' janila xuto' richin xk'iy-q'anej, y ri alaxibel-ya' xuben chi xnimer-q'anej. Kan janila k'iy raqen taq ya' richin xkiya'aj ri ruxe'. Y chuqa' janila k'iy raqen taq ya' kichin ri ch'aqa' chik che' ri ek'o chiri'.

⁵ Y roma janila ya' rik'in kan janila k'a xk'iy; chikiwech ri ch'aqa' chik che' ri ek'o pa taq juyu'. Ri ruq'a' kan janila xek'iyer y kan janila xenimer.

⁶ Y jalajoj k'a kiwech aj-xik' taq chikopi' ri xkiben kisok pa taq ruq'a'; y jalajoj kiwech chikopi' ri ek'o pa k'echelaj ri xe'alan chuxe' ri che' ri', y chuxe' ri rumujal kan e k'iy k'a tzobaj winaqi' xek'oje'.

⁷ Kan jebel ok ri che' y janila nej jotol chikaj. Chuqa' janila nima'q taq ruxaq roma ri ruxe' k'o chunaqaj jun jebelej ya'.

⁸ Kan man jun tiox-che' ri k'o pa qejoj ri kan nik'ases, nijunamatej rik'in re jun tiox-che' re'. Y chuwech rija' kan man jun che' ri k'o ta janila ruq'a'. man jun chik che' achi'el ri ruq'a' ri ek'o re jun tiox-che' re'. Man jun che' ri k'o pa qejoj ri kan nik'ases ri nijunamatej rik'in ri jebelej rubanik rija'.

⁹ Ja yin Jehová ri xibanon jebel ok chiwe, chuqa' ja yin ri xibanon chiwe chi janila xnimer ri iwajawaren. Ri ch'aqa' chik che' ri ek'o pa qejoj ri kan nik'ases kan nikajo' nikijunamaj-ki' iwik'in.

¹⁰ Roma ri che' ri' kan janila k'a xk'iy, ri rutum xapon k'a pa sutz' y kan janila k'a xk'iy; y roma ri' kan xunimirisaj-ri'.

¹¹ Rix ix achi'el ri che' ri' y roma ri' yin Jehová kan xkixinwetzelaj y kan xtinya' q'ij richin xkixtzaq pa ruq'a' jun aj-raqen kichin tzobaj winaqi' e richin ch'aqa' chik ruwach'ulew, richin xtikiben iwik'in ri ruk'amon richin ri rutojbalil ri imak, roma ri itzel ri ye'iben ri chiri'.

¹² Jak'a ri itzel taq winaqi' ri' xtibekitorij ri che' ri' y xtikipunuba' kan pa kiwi' ri juyu' y ri ruq'a' xkeq'aj y xkebeqaqa kojol taq juyu' y pa taq siwan. Y konojel ri tinamit ri xemujan chuxe' ri che' ri', xa xke'animej y xtikimalij kan.

¹³ Y ri jalajoj kiwech aj-xik' taq chikopi' ri yexik'an pa kaq'iq', xtikiben kisok pa ruwi' ri ruche'el ri che' punul pan ulew. Y ri jalajoj kiwech chikopi' ri e richin k'echelaj, kan xtikiben chuqa' kisok ri pa taq ruq'a' ri che' ri'.

¹⁴ Y re' xtibanatej chi kan man jun chik ruwach'ulew xtinimer-q'anej achi'el re jun che' re', stape' kan chuchi' ya' k'o-wi. Konojel k'a ruwach'ulew k'o chi yek'is; achi'el yeken ri winaqi' y k'o chi yemuq chuxe' ulew y nibekimolo-ki' chiri' akuchi ek'o-wi ri ch'aqa' kaminaqi', keri' xtibanatej kik'in rije'.

¹⁵ Chupan ri q'ij ri', toq ri che' ri' xtitorix, jari' toq yin Jehová xtinben chi roma bis xkechaqi'j ri raqen taq ya' y ronojel ya' ri yebiyin. Chuqa' roma k'a ri che' ri' xtinben chire ri juyu' Líbano richin xtibison janila y konojel che' ri ek'o pa taq juyu' xkemayamo-qa.

¹⁶ Toq yin xtink'is ri ruwach'ulew ri', ri ch'aqa' chik ruwach'ulew kan xkesilon roma xibinri'il. Y toq xtitorix ri che' ri' k'ari' xkekikot ri ch'aqa' chik che', ri xek'is ojer ri xek'oje' pa qejoj ri kan nik'ases y ri ek'o chiri' pa juyu' Líbano.

¹⁷ Chuqa' ri winaqi' ri xkikuquba-kik'u'x iwik'in kan xkeken richin xtikik'ul-ki' kik'in ri xeken pan oyowal.

¹⁸ Rix aj-Egipto y ri i-rey, ri iruwach'ulew xuben achi'el ri che' ri más jebel ok y janila nim chikiwech ri ch'aqa' chik che' richin ri qejoj ri kan nik'ases. Man rik'in ri' xtinben chi ri iruwach'ulew xtik'is, achi'el ri ch'aqa' chik che' richin ri qejoj ri' ri xetorix yan. Xa kan junan xkixk'oje' chikikojol ri kaminaqi' ri man xkiya' ta nuq'ij y chuqa' ri xeken pan oyowal, xcha'.