Ez 24 - Kaqchiquel Bible

Ri k'ambel-tzij chirij jun bojo'y

¹ Toq xtz'aqet yan beleje' juna' chi oj uk'uan-el pa Babilonia, chupan ri q'ij lajuj chire ri ik' lajuj, jari' toq ri Jehová xubij chuwe:

² Rat Ezequiel, tatz'ibaj k'a re rajlabal re q'ij re' roma ri rey richin Babilonia xa xuteq rubixik chi tichapatej ri oyowal chiri' pa tinamit Jerusalem.

³ Kach'on rik'in k'ambel-tzij kik'in ri awinaq roma e yakatajineq chuwij y tabij chike chi tikiya' pa q'aq' jun bojo'y ri banon rik'in q'eqapueq, ri ruchulun-ri'. K'ari' tikiya' ya' chupan.

^4-5 Tibekik'ama-pe jun ti jebelej karne'l, tikikamisaj y tikibana' ruchojmil pa peraj. K'ari' ri jebelej taq peraj ti'ij tikiya-qa pa bojo'y. Tikiya-qa ri ra' y ri rij racheq ri chikop y chuqa' tikiya-qa ri jebelej taq baq. K'ari' tikibana' k'iy q'aq' chuxe', richin chi niroqo jebel ri baq rik'in.

⁶ Yin Jehová ri yibin. Toq'ex ruwech ri tinamit Jerusalem roma ek'o janila kamisanela' chiri'. Ri tinamit ri' achi'el xa ta jun bojo'y ri banon rik'in q'eqapueq y ruchulun-ri' ri kan man nel ta chik. Y ri winaqi' xke'elesex-el chupan ri Jerusalem achi'el niban rik'in ri ti'ij toq nelesex-el chupan ri bojo'y y ri bojo'y nik'oje' kan keri'.

⁷ Y ri kamisanela' kan xaxe nikiben ri kamik y kan man nikich'ob ta juba' yekewaj kan, achi'el toq nikamisex jun chikop pa ruwi' jun abej ri kan nibiyin kan rukik'el y man nikamisex ta pan ulew richin nimuq ta kan juba' ri kik'.

⁸ Yin xinya' q'ij richin xk'oje' kan ri kik' pa ruwi' ri abej y man xmuq ta kan. Y re' kan xtik'atzin richin natabel chi xiyek woyowal y richin ninya' rutojbalil pan iwi'.

⁹ Roma ri' kere' k'a ninbij yin: Toq'ex ruwech ri tinamit kamisanel, roma ri' yin xtinya' k'iy si' chuchi' ri tinamit richin nujin q'aq'.

¹⁰ Kan xtinya' k'a k'iy si' chuxe' ri bojo'y richin keri' kan nichaq'aj jebel ri ti'ij k'a toq xtik'is na ri ruya'al y k'a xkek'at na ri baq.

¹¹ Toq man jun chik k'o chupan ri bojo'y kan tik'oje' kan pa ruwi' q'aq', k'a toq ri kaqapueq xtikaqer na pa q'aq'. K'ari' xtich'ajch'ojir kan jebel y xtel-el ri ruchulun-ri'.

¹² Xa man jun xuq'ajuj xch'ajch'ojirisex ri bojo'y ri', roma ni ta pa q'aq' man xch'ajch'ojir ta.

¹³ Kan nutijon-pe nuq'ij iwik'in rix aj-Jerusalem richin nich'ajch'ojirisaj-iwi' chire ronojel ri imak, jak'a rix man iya'on ta q'ij. Jak'a toq xtiqaqa ri woyowal pa ruwi' ri itinamit, k'ari' xkixch'ajch'ojir.

¹⁴ Ja yin Jehová ri yibin y kan xtinbenbana' ri xinbij. Kan xapon yan ri q'ij richin ninben. Kan man jun k'a xtinjoyowaj ruwech y man xtintzolij ta wi' chuwij roma ri itzel rubanobal. Yin xtinbenya' ri rutojbalil-mak pa ruwi', yin Jehová ri yibin, xcha'.

Ri rukamibal ri rixjayil ri Ezequiel

¹⁵ Chirij ri', ri Jehová xch'on chik wik'in chiri' pa Babilonia y xubij chuwe:

¹⁶ Rat Ezequiel, wakami xtinwelesaj-el ruk'aslen ri awixjayil, ri kan janila nawajo'. Jak'a rat kan man xkatoq' ta chirij, kan man xtibiyin ta ri ruya'al runaq'-awech roma rija'.

¹⁷ Jak'a pan ewel ninya' q'ij chawe chi yajiq'ijo'x chirij. Man tak'ut chi yabison ni man tawelesaj ri kuchubel-ajolon, ni ri axajab. Chuqa' man tatz'apej apalej, ni man tatej q'utun richin bis, xcha' ri Jehová chuwe.

¹⁸ Ronojel k'a ri xbix chuwe, yin xintzijoj chike ri nuwinaq ri nimaq'a', jak'a ri tiqaq'ij xken-qa ri wixjayil. Y ri pa ruka'n q'ij chire ri rukamik ri wixjayil, yin xinben k'a ronojel achi'el ri rubin ri Jehová chuwe.

¹⁹ K'ari' ri nuwinaq xkik'utuj chuwe ri achike nel chi tzij ronojel re' y achike nuk'en-pe chike ri yitajin chubanik.

²⁰ Y yin xinbij chike, ri Jehová kere' xubij chuwe:

²¹ Stape' janila nikajo' ri wachoch ri k'o pa Jerusalem y kan janila kikuquban kik'u'x rik'in, yin kan xtinya' jun nimalej ruk'ayewal pa ruwi'. Y ri imi'al y ri ik'ajol ri xe'iya' kan pa Jerusalem xa xkekamisex.

²² Y rix xtibebana' achi'el ri xinben yin chire ri Ezequiel: Man xtitz'apej ta ri ipalej retal richin bis, ni man xtitej ta q'utun richin bis.

²³ Man xtiwelesaj ta ri kuchubel-ijolon, ni ta ri ixajab. Chuqa' man xtijiq' ta oq'ej. Xa kan xkixbek'is roma ri imak y kan junan k'a xkixjilon chi'iwonojel.

²⁴ Ri xinben rik'in ri Ezequiel, re' kan xtok k'a jun retal chiwe rix y rix kan xtiben k'a ronojel ri xuben rija'. Y toq ronojel k'a re' xtik'uluwachitej, k'ari' xtiwetamaj chi ja yin Jehová ri ink'o pa ruwi' ronojel, xcha' ri Dios.

²⁵ Y ri Dios xubij chuwe chi xtrelesaj-el ri rachoch ri achoq ik'in kikuquban kik'u'x ri nuwinaq y achoq ik'in yekikot-wi. Chuqa' xtrelesaj k'a ri kik'aslen ri kimi'al-kik'ajol.

²⁶ Chupan k'a ri q'ij ri' xtipe jun nuwinaq aj-Jerusalem ri animajineq-pe richin xtoruya' rutzijol chuwe.

²⁷ Chuqa' xubij chuwe chi yin xkik'atzin chik richin jun retal y man xkitikir ta xkich'on. Jak'a chupan ri q'ij ri' xkitikir xkich'on chik jun bey y xkitikir k'a xkitzijon rik'in ri ya'ol rutzijol. Y rik'in ri' ri nuwinaq ri ek'o wik'in chiri' pa Babilonia xtiketamaj k'a chi ja ri Jehová ri qajaw.