Ex 17 - Kaqchiquel Bible

Ri abej ri xel-pe ya' chupan

¹ Ri tinamit israelita eqal-eqal k'a xebiyin ri chiri' pa tz'iran ruwach'ulew rubini'an Sin, roma kan ja ri Jehová ri nibin toq k'o chi nikichop-el bey y toq k'o chi yepa'e' richin ye'uxlan. Y jun q'ij xe'apon ri chiri' pa Refidim y xe'uxlan-qa chiri'. Jak'a ri chiri' kan maneq k'a ya' richin nikiqum.

² Y roma ri' toq ri winaqi' xkich'ojij k'a kiya' chire ri Moisés, jak'a ri Moisés xubij chike: ¿Achike roma toq xa chuwe yin nich'ojij-wi ri iya'? ¿Y achike roma toq rix nich'ob chi ri Jehová man nitikir ta nuya' iya' richin niqum?, xcha' chike.

³ Y ri winaqi' kan janila k'a xchaqi'j kichi' ri chiri' y xa xexebexot chirij ri Moisés y xkibij chire: ¿Achike roma xojawelesaj-pe pan Egipto, xaxe richin yojken kan roma chaqi'j-chi'ij qonojel roj, ri qalk'ual y ri qawej?, xecha'.

⁴ Jari' toq ri Moisés xch'on chik rik'in ri Jehová y xubij chire: ¿Achike k'a xtinben rik'in re tinamit re'? Roma rije' xa kan jari' ek'o chik richin chi yinkikamisaj chi abej, xcha'.

⁵ Y ri Jehová xubij chire ri Moisés: Katik'o-el chikiwech ri awinaq y ke'ak'uaj-el awik'in rat ri achi'a' ri k'o kiq'ij ri ek'o pa kiwi' rije'. Chuqa' tak'uaj-el ri ach'ame'y ri achoq ik'in xaneq-wi ri raqen-ya' Nilo y kabiyin.

⁶ Yin xkinik'o k'a el chawech y xkibek'oje' pa ruwi' ri nimalej abej ri k'o chiri' pan Horeb. K'ari' rat xtak'osij ri nimalej abej ri' y chiri' xtel-pe ya' richin nikiqum ri awinaq. Y ri Moisés kan keri' k'a xuben chikiwech ri achi'a' ri k'o kiq'ij chikikojol ri israelita.

⁷ Y rije' xkibij Masá y Meribá*f7* chire ri abej ri'. Keri' xubini'aj ri chiri' roma ri koyowal ri israelita y roma xkitejtobej ri Jehová y xkibij: ¿Kan k'o k'a ri Jehová chiqakojol, o xa maneq?, xecha'.

Oyowal kik'in ri e rijatzul kan ri Amalec

⁸ Toq ri israelita k'a ek'o na chiri' pa Refidim, jari' toq xebeyakatej-pe ri e rijatzul ri Amalec chikij.

⁹ Y ri Moisés xubij k'a chire ri Josué: Chua'q ke'acha' k'a achi'a' chiqakojol, richin chi yixbe pan oyowal chikij ri e rijatzul ri Amalec y yin xkibek'oje' pa ruwi' ri juyu' y nink'uaj ri ch'ame'y richin ri Dios, xcha'.

¹⁰ Y ri Josué kan xuben k'a achi'el ri xubij ri Moisés chire, xyakatej-el e rachibilan ri achi'a' y xkichop k'a oyowal kik'in ri e rijatzul ri Amalec, y ri Moisés, ri Aarón y ri Hur xebek'oje' k'a pa ruwi' ri juyu'.

¹¹ Y xk'uluwachitej k'a, chi toq ri Moisés yeruyek ri ruq'a' chikaj, ri israelita yebe k'a chikij y yekich'ek, jak'a toq ri Moisés xa nuqasaj-qa ri ruq'a', ri e rijatzul ri Amalec yepe chikij y yekich'ek.

¹² Y toq ri ruq'a' ri Moisés xekos, xepe ri Aarón y ri Hur xbekik'ama-pe jun abej richin rutz'uyubal ri Moisés; y ri Moisés kan xtz'uye' k'a y ri Aarón y ri Hur, xkitemej ri ruq'a': Ri jun xutemej ri jun ruq'a' y ri jun chik xutemej ri jun chik ruq'a' y keri' ri ruq'a' ri Moisés xek'oje' k'a chikaj k'a toq xqaqa na qa ri q'ij.

¹³ Y keri' ri Josué y ri achi'a' ri e beneq rik'in, xekikamisaj k'a chi espada konojel ri e rijatzul ri Amalec.

¹⁴ Y ri Jehová xubij chire ri Moisés: Tatz'ibaj ronojel re' chupan jun wuj richin natabel y tabij chire ri Josué chi yin kan xkenk'is jumul ri rijatzul kan ri Amalec richin man jun bey chik xkenatex, xcha' ri Jehová.

¹⁵ Y ri Moisés xupaba-q'anej jun porobel ri chiri' y xukanoj jun rubi'. Y ri rubi' ja ri Jehová ri Achi'el ri Tzieq Richin K'exewach, ri Uk'uayon Qichin.*f8*

¹⁶ Y xubij k'a ri Moisés: Roma ri e rijatzul ri Amalec xkiyek kiq'a' chirij ri q'atbel-tzij richin ri Jehová, roma ri' rija' kan jantape' k'a xtuben labal chikij ri e kijatzul, ri xkepe chi wiq chi tanaj, xcha'.