Dn 5 - Kaqchiquel Bible

Ri xk'utumej chuwech ri rey Belsasar

¹ Chirij ronojel re' chiri' pa Babilonia, xk'oje' k'a jun rey ri xubini'aj Belsasar. Y re rey re' xuben k'a jun nima-wa'in. Xeroyoj k'a más juba' e 1,000 winaqi' ri k'o kiq'ij richin ri rajawaren y konojel rije' kan xkiqum k'iy vino.

^2-3 Ri rey Belsasar, roma ri ruq'abarik ri kan xik'o ruwi' ri xuben, kan xuteq k'a ruk'amik ri qumbel ri e banon rik'in q'anapueq y saqipueq ri e ruk'amon-pe ri Nabucodonosor chupan ri rachoch ri Dios ri k'o pa Jerusalem, toq rija' xq'aton-tzij. Kan xebek'amer k'a pe ri qumbel ri', y ri Belsasar xuqum vino chupan, e rachibilan ri e rixjayilal, ri e ru-concubina y ri achi'a' ri k'o kiq'ij.

⁴ Yequmun k'a y nikiya' ruq'ij ri ki-dios ri xa e banon rik'in q'anapueq, saqipueq, q'enq'oj-pueq, q'eqapueq, che' y abej.

⁵ Y kan chupan k'a ri ramaj ri', chaq k'ate' k'a xbek'ulun-pe jun ruq'a' wineq ri nitz'iban chuwech ri jay ri akuchi ek'o-wi, chunaqaj ri candelero. Y toq ri rey xutz'et ri q'abaj ri',

⁶ kan jari' k'a toq xjalatej-qa ri ruwech roma xibinri'il y xuchop nibaybot chijun ri ruch'akul, kan xk'is k'a ri ruchuq'a' y man xtikir ta chik xpa'e'.

⁷ K'ari' xsik'in y xubij chi ke'oyox-pe ri etamanela' ri aj-Caldea, ri aj-q'ija' y ri aj-itza'. Y toq ek'o chik chuwech xubij chike: Xabachike k'a ri nitikir nitz'eton re tz'ibanik re' y nubij chuwe ri achike nel chi tzij, kan xtinben k'a chire chi nukusaj ri tzieq q'eqq'oj-keq nitzu'un, y xtinya' jun ichinaj chiruqul ri banon rik'in q'anapueq. Y kan jari' xtok q'atoy-tzij chuwij qa yin, xcha'.

⁸ Konojel rije' xkitz'et ri tz'ibanik ri', jak'a xa man xq'ax ta chikiwech, ni man xetikir ta xkiq'alajirisaj ri nel chi tzij.

⁹ Roma ri' ri rey Belsasar kan más chik k'a xuxibij-ri', y kan seq-seq chik k'a nitzu'un roma xibinri'il.

¹⁰ K'ari' ri rute' ri Belsasar xrak'axaj k'a pe ri raqoj-chi'ij, y roma ri' xok-apo pa jay ri akuchi najin-wi ri nimaq'ij, y xubij k'a chire ri ral: Kan jantape' xkak'ase' rat rey. Man tisach ak'u'x, ni man taxibij-awi'.

¹¹ Roma chupan ri awajawaren kan k'o jun achin ri kan ya'on nojibel chire koma ri e dios. Y chupan ri q'ij toq xk'oje' ri Nabucodonosor, kan xilitej k'a rik'in ri achin ri' ri nojibel y ri etamabel, kan achi'el ri k'o kik'in ri dios. Roma ronojel ri etamabel ri xilitej rik'in, ri Nabucodonosor kan xuben k'a chire chi xok aj-raqen pa kiwi' ri etamanela' aj-Caldea, ri aj-q'ija' y ri aj-itza'.

¹² Ri achin ri' kan jari' ri Daniel, ri rubini'an chuqa' Beltsasar. Rik'in rija' kan k'o k'a ronojel nojibel y etamabel richin nuq'alajirisaj achik', y nubij ri ye'el chi tzij, y kan nuchojmirisaj k'ayew taq banobel. Kan tawoyoj k'a rija', y kan xtuq'alajirisaj k'a chawech ri xtz'ibex kan chuwech ri jay, xcha'.

¹³ Kan jari' k'a xbek'amer-pe ri Daniel, y xapon k'a chuwech ri rey. Y ri rey xubij chire: ¿Ja rat ri' ri Daniel, ri jun chike ri aj-Judá ri e ruk'amon-pe ri Nabucodonosor, pa ruwach'ulew Judá?

¹⁴ Yin xinwak'axaj chi ri e dios kiya'on nojibel awik'in y etamabel, y roma ri' rat yatikir naq'alajirisaj ri e k'ayew.

¹⁵ Xek'amer yan k'a pe chinuwech ri achi'a' ri etamanela' y ri aj-q'ija' richin ta nikitz'et chinuwech ri tz'ibanik ri xban chuwech ri tz'aq, y nikibij ta chuwe ri nel chi tzij. Jak'a xa kan man xetikir ta.

¹⁶ Yin kan xinwak'axaj k'a chi rat kan yatikir naq'alajirisaj achik' y ronojel ri kan e k'ayew. Wakami k'a, wi xkatikir xtatz'et ri tz'ibanik ri xban kan chuwech ri jay y wi xkatikir xtaq'alajirisaj chinuwech ri achike nel chi tzij, kan xkatinwiq k'a rik'in tzieq q'eqq'oj-keq nitzu'un y xtinya' jun ichinaj chi'aqul ri banon rik'in q'anapueq. Y ja rat k'a xkatok q'atoy-tzij chuwij qa yin, xcha'.

¹⁷ Jari' k'a toq ri Daniel xubij chire ri rey: Ri sipanik ri naya' chuwe, xa tik'oje' kan awik'in. Xa kan taya' k'a chike ch'aqa' chik ri nasuj chuwe yin. Man rik'in ri' yin kan xtintz'et k'a ri tz'iban kan chuwech ri jay y xtinbij k'a chawe ri nel chi tzij.

¹⁸ Ri nimalej Dios kan nim-wi ri ruq'ij, y ojer kan ja k'a rija' ri xya'on chire ri Nabucodonosor ri ajawaren, ri ruwaq'ijaj y ronojel nimirinen.

¹⁹ Roma ri nimirinen ri xya'ox chire roma ri Dios, ri winaqi' richin chijun ruwach'ulew, kan xkik'en rukiy y xkiya' ruq'ij. Rija' kan xuben k'a ronojel ri xqa' chuwech: Xerukamisaj ri xrajo' y xuya' q'ij chi yek'ase' ri xrajo'; ch'aqa' xeruya' pa jotol y ch'aqa' xuqasaj kiq'ij.

²⁰ Jak'a toq xunimirisaj-ri' y ri ránima kan xukowirisaj rik'in ri runimirisanen, xa kan xelesex k'a el chupan ri rajawaren, y ronojel ri ruwaq'ijaj kan xelesex chire.

²¹ Xelesex k'a el chikikojol ri ruwinaq, y ri ruch'obonik xa kan xok k'a el achi'el ri kich'obonik ri chikopi'. Y chikikojol k'a ri taq bur aj pa q'ayis xbek'oje-wi. Xutej k'a q'os achi'el kiwaybal ri wákix, y ri ruch'akul kan xmu'e' k'a rik'in ri raxq'ab. Keri' xk'oje', k'a toq xretamaj na chi kan xaxe pa ruq'a' ri nimalej Dios k'o ronojel ajawaren, chi kan xaxe rija' ri ye'ukusan kan ri q'atbel taq tzij chupan ri ajawaren.

²² Jak'a rat rey Belsasar xa man xaben ta achi'el ri xuben ri Nabucodonosor. Xa kan man aqasan ta awi' chuwech ri nimalej Dios, stape' kan awetaman ronojel re'.

²³ Pa ruk'exel chi xaqasaj ta awi', xa kan xanimirisaj-awi' chuwech ri Dios. Roma ri animirisanen kan xateq k'a ruk'amik ri qumbel ri xa e richin ri rachoch ri Dios ri rajaw ronojel, y chupan ri' xaqumun-wi rat, ri achi'a' ri k'o kiq'ij, ri awixjayilal y ri e a-concubina. Pa ruwi' ri' kan xaya' k'a kiq'ij ri dios ri e banon rik'in q'anapueq, saqipueq, q'enq'oj-pueq, q'eqapueq, che' y abej, stape' ri dios ri' xa man yetzu'un ta, ni man ye'ak'ex ta, ni man jun ketaman. Jak'a ri Dios ri achoq pa ruq'a' k'o ri ak'aslen, ri kan rutzuliben ronojel ri abey, kan man jun bey k'a xaya' ruq'ij.

²⁴ Y roma ri', ri nimalej Dios xuteq k'a pe ri jun q'abaj ri xtz'iban kan chuwech ri jay.

²⁵ Jare' k'a ri nubij ri tz'ibanik: MENÉ,*f1* MENÉ, TEKEL, PARSÍN.

²⁶ Ri MENÉ, MENÉ nel chi tzij chi ri q'ij ri ruq'aton-pe ri Dios pa ruwi' ri aq'atbel-tzij xa kan xtz'aqet yan.

²⁷ Ri TEKEL nel chi tzij chi rat xatetex yan k'a pa jun etabel y xnabex chi chupan ri aq'atoj-tzij man ja ta rubanik yatajin.

²⁸ Ri PARSÍN nel chi tzij chi ri ajawaren xelesex yan k'a pan aq'a' rat y xch'ar chikiwech ri aj-Media y ri aj-Persia, xcha' ri Daniel.

²⁹ Chirij ri' ri Belsasar xubij chi tiwiq k'a ri Daniel rik'in jun tzieq q'eqq'oj-keq nitzu'un, y tiya'ox jun ichinaj chiruqul ri banon rik'in q'anapueq. Chuqa' xtalux rutzijol chi ja ri Daniel ri xok kan q'atoy-tzij chirij qa rija'.

³⁰ Jak'a ri Belsasar rey pa ruwi' ri ruwach'ulew Babilonia, xa kan chupan k'a ri aq'a' ri' xkamisex.

³¹ Chirij rija', ja ri Darío, ri aj-Media ri xok kan chupan ri ajawaren; y ri Darío k'o chik k'a oxk'al ka'i' rujuna' toq xapon chupan ri ajawaren.