Deut 12 - Kaqchiquel Bible

Xaxe jun rachoch ri Dios nik'oje'

¹ Jare' k'a ri pixa' ri ya'on chiwe, ri k'o chi nitaqej rix chijun ri ik'aslen, chupan ri ruwach'ulew ri xtuya' chiwe richin xtiwichinaj kan, ri rusujun chiqe ri Jehová ri qa-Dios roj, ri chuqa' ki-Dios ri qati't-qamama'.

² Chupan ronojel ri tinamit ri xke'ich'ek, xke'iwulaj k'a jumul ronojel ri akuchi nikiya' kiq'ij ri ki-dios; pa ruwi' taq juyu', chuwa taq juyu' y chuxe' che' ri ek'o k'iy kixaq y kiq'a'.

³ Kan tiyojo' k'a el ri kiporobal y ke'ipaxila' ri kiwachibel ki-dios ri e banon rik'in abej. Ke'iporoj k'a ri kiwachibel ri ki-dios Asera y ronojel ri wachibel ri e paban akuchi nikiya-wi kiq'ij ri ch'aqa' chik dios. Tibana' ronojel re' richin man jun chik xtinatan kichin.

⁴ Jak'a ri Jehová ri qa-Dios man jun bey tiya'ox ruq'ij rik'in ronojel re' achi'el nikiben rije'.

⁵ Xtiya' k'a ruq'ij xa kan xaxe k'a ri akuchi xtucha-wi rija', richin chi chiri' ninatex-wi ri rubi' rija'.

⁶ Chiri' k'a xtik'uaj-wi ri isipanik: Ri chikop ri niporox, ri sipanik richin ri jun chire ri lajuj, ri sipanik ri nalex-pe pan iwánima, ri sipanik toq nijikiba-tzij y ri nabey taq kal ri iwawej.

⁷ Kan xkixwa' k'a chiri' chuwech ri Jehová ri qa-Dios; kan xkixkikot k'a chi achijlonel, ixjayilonel y alk'ualaxel, roma ronojel ri samaj ri xiben, ri achoq pa ruwi' xuya-wi urtisanik rija'.

⁸ Kan man tiben k'a chiri' achi'el re niqaben re wawe' roj, re akuchi chiqajujunal niqaben ri achike ri niqa' chiqawech.

⁹ Roma wakami man jani kixapon chupan ri ruwach'ulew richin uxlanenri'il, akuchi xtiberuya-wi ri Jehová ri qa-Dios chiwe richin xtiwichinaj.

¹⁰ Kan napon yan k'a ri q'ij chi xtiq'axaj ri raqen-ya' Jordán y xkixbek'oje' chupan ri ruwach'ulew ri xtiberuya' chiwe. Chiri' rija' kan xtuya' k'a uxlanenri'il chiwe pa kiq'a' ri etzelanel iwichin ri ek'o chi'inaqaj, y kan kuqul k'a ik'u'x xkixk'ase'.

¹¹ K'ari' ri chiri' ri akuchi xtucha' ri Jehová ri qa-Dios richin ninatex ri rubi'. Chiri' k'a xtisuj-wi ronojel re xinbij chiwe.

¹² Y kan xkixnimaq'ijun k'a chuwech ri Jehová ri qa-Dios junan kik'in ri iwalk'ual, ri isamajela' y kik'in ri e levita ri ek'o chi'ikojol roma rije' man jun ulew xtikichinaj kan chi'ikojol.

¹³ Tichajij-iwi' richin man ye'iporoj chikopi' chuwech ri Jehová xabakuchi;

¹⁴ xa kan xaxe k'a ruk'amon nisuj ri akuchi rucha'on-wi rija' chikikojol jun chike ri kitinamit ri itzobaj.

¹⁵ Jak'a man rik'in ri', kan utz k'a nikamisaj ri iwawej y nitej ri ti'ij chupan ri itinamit ri q'ij toq nirayij. Utz nitej ri xa janipe' nusipaj ri Jehová ri qa-Dios chiwe. Titija' k'a chi'iwonojel; ch'ajch'oj o man ch'ajch'oj ta, utz nitej achi'el ri kich'akul ri jalajoj kiwech masat.

¹⁶ Jak'a ri kik' man titej, xa kan titixa-el pan ulew achi'el niben rik'in ri ya'.

¹⁷ Chuqa' man titej chupan ri itinamit ri jun chire ri lajuj chire ri jalajoj ruwech ixin, ri vino, ri aceite, ni ri nabey kal ri iwawej, ni man jun chire ronojel ruwech sipanik, ni ri sipanik ri yakon-q'anej chikaj.

¹⁸ Xa kan xaxe chuwech rija' k'atzinel richin nitij-wi, chiri' akuchi xtucha-wi rija', y re' xtiban iwik'in rix, ri iwalk'ual, ri isamajela' ri e yuqul pa samaj iwik'in y ri e levita ri ek'o chi'ikojol. Kan xkixkikot k'a chuwech ri Jehová roma ri samaj ri xiben-qa roma kan utz xel chiwech.

¹⁹ Man ke'imalij kan ri levita chupan chijun ri ik'aslen chuwech ri ruwach'ulew ri'.

²⁰ Toq ri Jehová ri qa-Dios xtunimirisaj yan ri iruwach'ulew achi'el ri rusujun kan chiwe, y rix kan xtirayij xtitej ri ti'ij, kan titija' xabachike q'ij xa janipe' niwajo'.

²¹ Y wi ri akuchi xucha-wi ri Jehová richin ninatex ri rubi', nej nik'oje' kan chire ri akuchi ixk'o-wi rix, kan utz k'a nikamisaj ri iwákix y ri ikarne'l ri rusipan rija' chiwe, achi'el ri nubin chiwe richin nitej xa janipe' yixtikir, chiri' akuchi ixk'o-wi.

²² Kan achi'el k'a ri ruch'akul ri xabachike ruwech masat niben chire, chi'iwonojel rix utz nitej, stape' ich'ajch'ojirisan-iwi' o ni.

²³ Jak'a man titej ri kik' roma jari' ri kik'aslen ri chikopi'; roma ri' man titej ri ti'ij ri k'a ruk'uan na kik',

²⁴ xa kan titixa' k'a el pan ulew achi'el niben rik'in ri ya'.

²⁵ Kan man titej k'a ni man tiqum ri kik'. Wi xtiben ri nubij ri Jehová ri qa-Dios, kan utz k'a xkixbe rix y ri iwijatzul.

²⁶ Jak'a ronojel sipanik ri ich'aron chire ri Jehová, re' kan xtik'uaj k'a el ri akuchi rucha'on-wi rija'.

²⁷ Kan xtisuj k'a ri chikop ri niporox chijun, ri ti'ij y ri kik' pa ruwi' ri porobel, jak'a ri kich'akul ri chikopi' richin kamelabel kan utz nitej y xaxe k'a ri kik' ri xtitix pa ruwi' ri porobel.

²⁸ Kan tiwak'axaj y kan titaqej k'a ronojel ri xinbij chiwe, richin keri' rix y ri iwijatzul kan utz xkixbiyin richin q'asen, roma kan utz y choj ri niben chuwech ri Jehová ri qa-Dios.

Pixabanik richin man tiya'ox kiq'ij ch'aqa' chik dios.

²⁹ Toq ri Jehová ri qa-Dios xkerelesaj-el chiwech ri nima'q taq tinamit ri akuchi xtiwichinaj-wi kan y xkixk'oje' k'a chiri' chupan ri kiruwach'ulew,

³⁰ kan tichajij-iwi' richin man nitzeqelibej ri ki-dios ri winaqi' ri', roma wi keri' xtiben, kan xkixk'is. Chuqa' man tik'utuj achike rubanik ri ki-dios, ni man ye'itzeqelibej richin niya' kiq'ij.

³¹ Man tiya' ruq'ij ri Jehová achi'el nikiben rije', roma ri itzel kan man nukoch' ta nutz'et rija'. Jari' ri xkiben rije'; richin xkiya' ruq'ij ri ki-dios xekiporola' ri kimi'al-kik'ajol chikiwech.

³² Kan tibana' k'a ronojel ri xinbij chiwe y man tiya' ruwi', ni man jun tiwelesaj kan chire.