Apocalipsis 3 - Kaqchiquel Bible

Ri rutzijol ri xya'ox chike ri qach'alal ri ek'o pa Sardes

¹ Y xubij chik k'a chuwe chi tintz'ibaj el chire ri ángel kichin ri molaj nimanela' ri chiri' pa Sardes y tabij-el; chi ri k'o wuqu' espíritu richin ri Dios y ri wuqu' ch'umila' rik'in kere' nubij: Yin wetaman ronojel ri ibanobal y wetaman chi nibix chiwe chi k'o ik'aslen, jak'a chinuwech yin xa ix kaminaqi'.

² Roma ri', kan tuna' iwech jebel y titija' q'ij niben ri utz ri k'a ek'o na pa taq ik'aslen y xa nik'is yan qa. Roma nutz'eton chi ri ichapon rubanik xa man niqa' ta chuwech ri Dios.

³ Toqaqa chi'ik'u'x ri tijonik ri ik'ulun, titzeqelibej y titzolej-pe ik'u'x. Roma wi xa man xkixk'ase' ta; xkipe pan iwi' achi'el jun eleq'om y man xtinabej ta k'a achike ramaj toq xkinoqaqa.

⁴ Man rik'in-wi-ri, ri chiri' pa Sardes k'a ek'o jujun ri man kitz'ilobisan ta ri kitziaq.Y jere' k'a ri xkebiyin wik'in yin, kikusalon seq taq tzieq, roma jari' ruk'amon chike.

⁵ Ri xtich'akon, kan xtinwiq k'a rik'in seq taq tzieq. Y man xtinwelesaj ta ri rubi' chupan ri wuj ri richin k'aslen. Y kan xtinbij k'a chire ri Nata' y chike ri ángel, chi ri wineq kan wichin yin.

⁶ Roma ri', ri k'o rak'axabal kan trak'axaj k'a ri nubij ri Loq'olej Espíritu chike ri molaj nimanela', kacha' chike, xcha' chuwe.

Ri rutzijol ri xya'ox chike ri qach'alal ri ek'o pa Filadelfia

⁷ Y xubij chik k'a chuwe chi tintz'ibaj el chire ri ángel kichin ri molaj nimanela' ri chiri' pa Filadelfia, y tinbij-el; chi ri Loq'olej, ri qitzij y ri uk'uayon ri llave ri nujeq ruchi' ri rajawaren ri rey David, ri toq nujeq man jun nitz'apen y toq nutz'apej man jun nijaqon, kere' nubij.

⁸ Yin wetaman ronojel ri ibanobal, roma ri' kan nujaqon jun ruchi-jay chiwech, ri man jun nitikir nitz'apen. Stape' juba' ok iwuchuq'a' k'o, kan ninimaj ri nubij ri nuch'abel y man jun bey iwewan chi iniman ri nubi'.

⁹ Roma ri' xtinben chi xkexuke' chiwech ri jun tzobaj winaqi' ri e richin ri Satanás ri nikibij chi e judío y xa man qitzij ta. Kere' xtinben chike richin tiketamaj chi yin kan yixinwajo'.

¹⁰ Y roma kan itaqen rik'in koch'onik ri nubij ri nuch'abel; yin kan xkixinchajij k'a chuwech ri ruk'ayewal ri xtipe pa ruwi' ri ruwach'ulew richin yetejtobex konojel ri winaqi'.

¹¹ Kan chi'anin k'a xkipe chik jun bey, y roma ri' kan tichajij jebel ri k'o iwik'in, richin chi man jun xtelesan chiwe ri i-corona.

¹² Ri xkech'akon xtinben chike chi xke'ok achi'el jun pilar richin ri rachoch ri nu-Dios y chiri' xkek'oje-wi jantape'. Y chikij k'a rije' xtintz'ibaj ri rubi' ri nu-Dios y ri rubi' ri rutinamit rija', ri k'ak'a' Jerusalem ri niqaqa-pe chila' chikaj. Y chiri' chuqa' xtintz'ibaj ri k'ak'a' nubi' yin.

¹³ Roma ri' ri k'o rak'axabal kan trak'axaj k'a ri nubij ri Loq'olej Espíritu chike ri molaj nimanela', kacha' chike, xcha' chuwe.

Ri rutzijol ri xya'ox chike ri qach'alal ri ek'o pa Laodicea

¹⁴ Y xubij chik k'a chuwe chi tintz'ibaj el chire ri ángel kichin ri molaj nimanela' ri chiri' pa Laodicea, y tinbij-el; chi ri kan qitzij, ri qitzij rutz'eton ronojel ri nubij, ri kan k'o pe nabey chuwech ri rutikeribel ronojel ri k'o, kere' nubij:

¹⁵ Yin wetaman ronojel ri ibanobal. Wetaman chi ni man ix tew ta ni man ix meq'en ta más ta utz xa ta ixmeq'en o ix tew.

¹⁶ Jak'a roma xa ix liloj, ni man ix meq'en ta y ni man ix tew ta, xa kan xkixinxa-el.

¹⁷ Rix kan nibij chi k'o iméro, chi ix beyoma' y man jun chik ri nik'atzin chiwe. Jak'a man iwetaman ta chi rix xa tijoyowex iwech. Xa ix meba'i', xa man jun k'o iwik'in, xa ixch'anel, y chuqa' ix moyi'.

¹⁸ Roma ri' ninbij chiwe chi kan tiloq'o' k'a q'anapueq ri k'o wik'in yin ri kan k'owisan chik pa q'aq' richin keri' kan yixok qitzij beyoma'. Chuqa' kan tiloq'o' k'a ri seq tzieq richin chi nukuch ri ik'ix. Y tiloq'o' chuqa' ri aq'om richin niya' pa taq runaq'-iwech richin yixtzu'un chik jebel.

¹⁹ Yin kan yench'olij y yenpixabaj ri yenwajo'. Roma ri' rix kan rik'in k'a ronojel iwánima titzolej chik pe ik'u'x wik'in y tiya' kan ronojel ri imak.

²⁰ Roma yin kan jare' k'a ink'o chik chuchi' ri iwachoch y yinoyon chik apo. Achike k'a ri xtak'axan-pe wichin y nujeq ri ruchi' jay chinuwech, xkinok-apo rik'in, xkiwa' rik'in y rija' xtiwa' wik'in yin.

²¹ Achike k'a ri xtich'akon, kan xtinya' k'a q'ij chire richin chi nitz'uye' junan wik'in. Kan achi'el ri xban chuwe yin toq xich'akon, y xitz'uye' rik'in ri Nata' Dios.

²² Roma ri', ri k'o rak'axabal kan trak'axaj k'a ri nubij ri Loq'olej Espíritu chike ri molaj nimanela', kacha' chike, xcha' ri Jesús.