2 Rey 24 - Kaqchiquel Bible

¹ Chirij re' ri Nabucodonosor, rey richin Babilonia, xok chupan ri ruwach'ulew Judá, y ri Joaquim kan xk'oje' k'a chuxe' rutzij ri Nabucodonosor. Jak'a toq xtz'aqet oxi' juna', ri Joaquim xa xujel ri ruch'obonik y xyakatej chirij.

² Y ri Jehová xeruteq tzobaj aj-labal aj-Babilonia, aj-Siria, aj-Moab y aj-Amón chirij ri Joaquim richin nikik'is ri Judá, kan achi'el xubij ri Jehová roma ri q'alajirisey ruch'abel.

³ Kere' xkik'uluwachij ri winaqi' aj-Judá, kan achi'el xubij ri Jehová, richin xerelesaj-el chuwech roma ri mak ri xuben ri Manasés.

⁴ Y chuqa' rija' xuben chi xbiyin kikik'el ri winaqi' ri maneq kimak. Roma ri' ri Jehová man xukuy ta ri rumak.

⁵ Ri ch'aqa' chik ri xuben ri Joaquim chupan ri ruq'atbal-tzij y ronojel ri samaj ri xuben, tz'ibatel kan chupan ri wuj richin ri kibanobal ri rey richin Judá.

⁶ Y toq ri Joaquim xken, ja ri Joaquín ri ruk'ajol xok kan rey pa ruk'exel.

⁷ Y ri rey richin Egipto man jun bey chik k'a xel-el pa ruwach'ulew, roma ri rey richin Babilonia xumej kan ri ulew ri nitiker-pe rik'in ri raqen-ya' richin Egipto, napon k'a rik'in ri raqen-ya' Éufrates, y ja rija' ri xchajin.

Toq ri ch'aqa' chik aj-Judá xe'uk'uex-el pa Babilonia

⁸ Ri Joaquín k'o k'a waqxaqlajuj*f9* rujuna' toq xok kan rey, y xaxe oxi' ik' xuq'et-tzij pa ruwi' ri Judá. Ri rute' rubini'an Nehustá rumi'al ri Elnatán, aj-Jerusalem.

⁹ Y ri Joaquín xa ja ri itzel ri xuben chuwech ri Jehová Dios, kan achi'el ri xuben ri Joaquim ri rutata'.

¹⁰ Je q'ij ri', toq ri Nabucodonosor rey richin Babilonia xeruteq-pe aj-labal richin nokich'aka' ri tinamit Jerusalem, y xkisutij-rij.

¹¹ Y toq ri achi'a' ri' kisutin chik rij ri tinamit, ri Nabucodonosor xapon-q'anej kik'in.

¹² Y jari' toq ri Joaquín xujech-ri' pa ruq'a' ri Nabucodonosor, e rachibilan-el ri rute', ri rusamajela', ri aj-raqen pa kiwi' ri aj-labal y ri ch'aqa' chik aj-raqen richin rija'. Re' xbanatej chupan ri ruwaqxaq juna' richin ri q'atbel-tzij richin ri Nabucodonosor.

¹³ Y ri aj-Babilonia xekik'uaj-el ri beyomel richin ri rachoch ri Jehová y richin ri rachoch ri Joaquín. Chuqa' xekiwulaj-el ronojel ri samajibel ri banon rik'in q'anapueq ri rubanon kan ri Salomón, richin xekik'uaj-el. Ronojel re' xbanatej achi'el rubin ri Jehová.

¹⁴ Y ri Nabucodonosor xeruk'uaj-el konojel winaqi' aj-Jerusalem: Ri aj-labal y ri aj-raqen ri ek'o pa kiwi' rije' y ri achi'a' ri jalajoj ruwech kisamaj. Konojel k'a ri aj-Jerusalem ri xe'uk'uex-el, e 10,000. Y xaxe chik ri winaqi' ri man jun k'o kik'in ri xek'oje' kan chupan ri ruwach'ulew Judá.

¹⁵ Ri Nabucodonosor xeruk'uaj pa Babilonia ri Joaquín, ri rute', ri e rixjayil, ri e aj-raqen richin rija' y ri achi'a' ri kan k'o janila kiq'ij chuwech ri ruwach'ulew ri'. Kan xerelesaj-el chiri' pa Jerusalem y xeruk'uaj-el k'a pa Babilonia.

¹⁶ Xeruk'uaj k'a e 7,000 aj-labal, y e 1,000 achi'a' ri jalajoj ruwech kisamaj.

Ri q'atbel-tzij richin ri Sedequías

¹⁷ K'ari' ri rey richin Babilonia xuben rey chire ri Matanías ri ruch'utitata' ri Joaquín, y xujel kan ri rubi' y xubij Sedequías chire.

¹⁸ Y ri Sedequías k'o k'a juwineq jun rujuna' toq xok kan rey, y xq'aton-tzij julajuj juna' pa ruwi' ri Judá chiri' pa Jerusalem. Ri rute' rubini'an Hamutal rumi'al ri Jeremías ri aj-Libná.

¹⁹ Y ri Sedequías kan ja ri itzel xuben chuwech ri Jehová, achi'el xuben ri Joaquim.

²⁰ Ri Sedequías xyakatej chirij ri rey richin Babilonia. Y jari' ri xbanon chi xyakatej royowal ri Jehová pa ruwi' ri Jerusalem y ri Judá, y xuben chi kan xeruk'is.