2 Crón 7 - Kaqchiquel Bible

Ri ruk'ojlen ri Dios xunojisaj ri rachoch

¹ Toq ri Salomón xtane-qa chire ri ruch'owen rik'in ri Jehová, xbeqaqa-pe q'aq' chila' chikaj y xuk'is ri kamelabel y konojel ri chikopi' ri e ya'on pa ruwi' ri porobel, y ri ruq'ij-ruk'ojlen ri Jehová xunojisaj ri rachoch,

² y roma ri' ri e sacerdote man xetikir ta xe'ok chupan.

³ Toq xkitz'et konojel ri israelita ri q'aq' y ri ruq'ij-ruk'ojlen ri Jehová ri xqaqa-pe chupan ri rachoch, xexuke-qa y xkiqasaj-ki' k'a pan ulew, y kere' nikibij: Tiya' ruq'ij ri Jehová, roma rija' kan janila utz, ri rujoyowanik kan richin q'asen, xecha'.

Ri Salomón xusuj kamelabel chuwech ri Jehová

⁴ Chirij ronojel re', ri rey y konojel ruwinaq israelita xekisuj kamelabel chuwech ri Jehová.

⁵ Y ri Salomón xerusuj k'a richin kamelabel e 22,000 nima'q taq awej y 120,000 kokoj taq awej. Keri' k'a xkiben ri rey y konojel israelita toq xkijech ri k'ak'a' rachoch ri Dios.

⁶ Y ri e sacerdote kan jari' ek'o pa taq kisamaj. Chuqa' ri e levita nikiq'ojomaj jalajoj kiwech taq q'ojom richin nikiya' ruq'ij ri Jehová. Y re q'ojom re' kan ja ri rey David banayon kan richin nikibixaj rubi' ri Jehová rik'in ri bix ri nubij: Roma ri rujoyowanik ri Jehová kan richin q'asen, yecha'. Y ri e sacerdote ek'o-apo chikiwech y nikixupuj ri ki-trompeta. Y konojel ri winaqi' e pa'el-apo kik'in.

⁷ Y chupan chuqa' ri q'ij ri', ri rey xuch'er chuqa' ri ruwa-jay ri k'o-apo chuwech ri rachoch ri Jehová, richin chiri' xerusuj ri chikopi' ri yeporox chijun, ri sipanik richin jalajoj ruwech ixin y ri kiq'anal chikopi' ri xesuj richin nuq'alajirisaj chi junan kiwech rik'in ri Jehová. Y ri' k'o chi xban chuwa-jay roma ri porobel ri banon rik'in q'enq'oj-pueq ko'ol ok y man nuben ta ronojel ri kamelabel ri'.

⁸ Y ri Salomón xunimaq'ijuj k'a ri nimaq'ij richin ri taq jay banon rik'in ruq'a-che'. Y kan konojel k'a ri winaqi' israelita ek'o-apo chiri'; ri winaqi' ri' e peteneq k'a pa ronojel tinamit, nitiker-pe pa xaman chiri' pa tinamit Hamat y napon-qa pa xokon k'a chuchi' ri raqen-ya' richin ri ruwach'ulew Egipto. Wuqu' k'a q'ij xenimaq'ijun chuwech ri Jehová Dios.

⁹ Y ri nimaq'ij richin ri taq jay banon rik'in ruq'a-che' xkiben toq q'axineq chik ri wuqu' q'ij richin ri nimaq'ij richin ri k'ak'a' rachoch ri Jehová. Y chirij ri ka'i' semana richin nimaq'ij, k'a xenimaq'ijun chik na jun q'ij.

¹⁰ Y chirij chik ri nimaq'ij ri', chupan ri q'ij juwineq oxi', chire ri ruwuq ik', ri Salomón xerutaluj-el ri winaqi', richin xebe chi taq kachoch rik'in kikoten pa taq kánima roma ri xuben ri Jehová rik'in ri ánima David, rik'in ri Salomón y rik'in ri rutinamit Israel.

Ri Jikibel-tzij ri xuben ri Dios rik'in ri Salomón

¹¹ Ri Salomón xk'achoj chire ri rachoch ri Jehová, y ri rachoch rija', y ronojel ri k'o chi xban pa rachoch ri Jehová y chupan ri rachoch rija'; kan ronojel k'a utz xuben chuwech.

¹² Jari' k'a toq ri Jehová xuk'ut-ri' chuwech ri Salomón pa jun chaq'a', y xubij chire: Yin xinwak'axaj ri ak'utunik y xincha' re wachoch re', re akuchi xtisuj-wi kamelabel chinuwech yin.

¹³ Toq rix ri ix nutinamit xkixmakun chinuwech, yin xtintz'apej ri kaj richin man nuben ta chik job, o xkenteq-pe sak' pa taq tzobaj richin nikik'is ri tiko'n o xtinteq-pe jun nima-yabil pan iwi'.

¹⁴ Jak'a wi rix ri kan ik'uan ri nubi', kan xtiqasaj-iwi' chinuwech y xkixch'on wik'in y xkinikanoj y man niben ta chik itzel, yin kan xkixinwak'axaj k'a ri chila' chikaj, y kan xtinkuy ri imak y xtinkol ri iwulew.

¹⁵ Yin kan xtinwak'axaj k'a ri ach'owen y ri utzil ri xak'utuj chuwe re wawe' pa wachoch.

¹⁶ Y chuqa' xincha' y xinwurtisaj re wachoch re akuchi ink'o-wi, y ri akuchi ninatex ri nubi' richin q'asen, kan xtinchajij y xtik'oje' pa wánima.

¹⁷ Y wi rat xkabiyin chinuwech rik'in chojmilal y rik'in ronojel awánima achi'el xuben ri David ri atata' y kan naben ri nubin chawe yin y nataqej k'a ronojel nupixa',

¹⁸ yin xtinjikiba' ri aq'atbel-tzij pa ruwi' ri ruwach'ulew Israel richin q'asen achi'el ri xinbij chire ri David ri atata'. Wi keri' kan beneq k'a ruwech xtik'oje' jun chike ri awijatzul chupan ri q'atbel-tzij richin Israel.

¹⁹ Jak'a wi rix y ri iwijatzul xtijech'ej kan iwi' wik'in yin, y wi man xtitaqej ta ronojel ri nupixa' ri nuya'on chiwe, y xa xke'isamajij ri ch'aqa' chik dios y kan xtiya' kiq'ij,

²⁰ wi keri' xtiben, yin xkixinwelesaj-el chupan re ruwach'ulew re nuya'on chiwe. Y ri itinamit Israel kan xtitze'ex y chuqa' itzel rutzijoxik xtiban koma ri winaqi' kichin ch'aqa' chik tinamit chuwech re ruwach'ulew. Chuqa' re jay re akuchi niya-wi nuq'ij, xa kan xtinmalij kan.

²¹ Y stape' wakami re wachoch kan jun nimalej jay, rik'in juba' jun q'ij ri winaqi' ri xkeq'ax xa jun wuluwik jay ri xtikitz'et. Xtikimey y xtikik'utula' chikiwech: ¿Achike roma kere' xuben ri Jehová rik'in re ruwach'ulew re'? ¿Y Achike roma kere' xuben chire re jay re kan richin rija'?, xkecha'.

²² Y rije' xa xtikibij: Xa roma xkimalij kan ri Jehová ri ki-Dios, ri xelesan-pe kichin ri kite-kitata' pa ruwach'ulew Egipto, y xa xekik'amala-apo ch'aqa' chik dios richin xkiya' kiq'ij y richin xekisamajij. Xa roma ri' ri Jehová xuya-pe pa kiwi' re ruk'ayewal re', xkecha'.