2 Crón 20 - Kaqchiquel Bible

Ch'akonik pa kiwi' ri Moab y ri Amón

¹ Chirij k'a ronojel re' ri e rijatzul kan ri Moab y ri Amón xjunamatej-kiwech kik'in ri winaqi' meunita, y xepe richin nokibana' oyowal rik'in ri Josafat.

² Y xbeya'ox k'a rutzijol chire ri Josafat chi e peteneq janila chi aj-labal aj-Edom ri e eleneq-pe pa relebel-q'ij chire ri Tzayi-Choy, y jari' ek'o chik pe pa tinamit Hasesón-tamar, ri chuqa' nibix En-gadi chire.

³ Toq ri Josafat xrak'axaj keri', xuk'en janila rukiy y kan jari' xuk'ulubej ri Jehová; y chuqa' xutaluj rutzijol chupan ri rajawaren chi konojel winaqi' kemewayin.

⁴ Xkimol k'a ki' winaqi' richin ronojel tinamit chupan ri ajawaren richin Judá richin xech'on rik'in ri Jehová y xkik'utuj to'onik chire chupan ri jun oyowal ri'.

⁵ K'ari' ri Josafat xpa'e' k'a chikiwech ri winaqi' ri' chiri' pa Jerusalem chuwech ri k'ak'a' ruwa-jay richin ri rachoch ri Jehová,

⁶ y xch'on rik'in ri Jehová, y xubij: Jehová ri at qa-Dios roj y kichin kan ri qati't-qamama', rat kan k'a chila' k'a chikaj naq'et-pe-tzij pa kiwi' ri q'atbel taq tzij richin ri ruwach'ulew. Pan aq'a' k'a rat k'o-wi ronojel uchuq'a' y kan man jun xtich'akon chawij.

⁷ Dios qichin roj, rat xatelesan-el kichin ri winaqi' ri xek'oje' chuwech re ruwach'ulew re' richin xaya' kan jantape' chire ri Abraham, ri junan awech rik'in y kan awachibil, y chuqa' xaya' chiqe roj ri oj rijatzul kan rija'.

⁸ Roj ri oj rijatzul kan ri Israel kan ojk'o k'a chupan re ruwach'ulew y ri qate-qatata' xkipaba' kan re jun awachoch re' ri akuchi niya'ox-wi aq'ij.

⁹ Y xkibij k'a chi wi k'o ta jun ruk'ayewal xtipe pa qawi' roma ri qamak; stape' labal rik'in espada, o yabil o rik'in juba' jun nimalej wayjal, xqojpe k'a re wawe' chawech chupan re awachoch richin yojch'on awik'in, y xqojawak'axaj k'a y kan xqojakol.

¹⁰ Jak'a re wakami jare' e peteneq richin nokibana' oyowal qik'in ri e rijatzul kan ri Amón, ri Moab y ri winaqi' ri aj chuwi' taq juyu' richin ri Seir. Ri ojer kan toq ri qati't-qamama' xeq'ax-pe chupan ri kiruwach'ulew ri winaqi' ri' toq e eleneq-pe pan Egipto, rat kan man xawajo' ta chi xok-apo ri atinamit Israel chiri'; xa xabij k'a chike chi tikich'ara-ki' kik'in, y man jun itzel tikiben kan chike.

¹¹ Y wakami ja rajel ruk'exel re' ri nikiya' chiqe, chi nikajo' yojkelesaj-el re wawe' chupan re ruwach'ulew ri awichin rat ri xaya' chiqe roj richin xqichinaj.

¹² ¡Nimalej qa-Dios roj! Rat k'a xkaq'aton-tzij pa kiwi' ri winaqi' ri e yakatajineq-pe chiqij, roma roj kan maneq quchuq'a', y rije' kan janila e k'iy; roj man qetaman ta k'a achike ri k'atzinel chi niqaben, y roma ri' kan awik'in k'a rat niqakuquba' qak'u'x chi rat xqojato', xcha' ri Josafat.

¹³ Konojel k'a ri achi'a' ri e apowineq richin ri molojri'il ri' e pa'el-apo chuwech ri Jehová junan kik'in ri kalk'ual y ri kixjayilal kich'elelon taq kal.

¹⁴ Kimolon k'a ki' konojel winaqi', y chikikojol rije' k'o jun achin ri rijatzul kan ri Asaf. Y rija' rubini'an Jahaziel ruk'ajol ri Zacarías, chuqa' rumam ri Benaías; y ri Benaías ruk'ajol kan ri Jeiel, ri ruk'ajol kan ri Matanías. Ri Espíritu richin ri Jehová xpe rik'in ri Jahaziel,

¹⁵ y roma ri' rija' xubij: Tiwak'axaj k'a chi'iwonojel rix ri ix richin ri ajawaren richin Judá, chuqa' rix aj-Jerusalem, y rat rey Josafat. Ri Jehová nubij chiwe chi man tixibij-iwi' y man kixmayamo-qa chikiwech ri janila chi winaqi' ri e peteneq chiwij, roma re labal re' man iwichin ta rix, xa kan richin ri Jehová.

¹⁶ Chua'q xkixbe-qa chikitz'etik ri winaqi' ri', y rije' xkejote-pe chuwa juyu' Sis, y xkebe'iwila' chuchi' ri ti ch'uti'n raqen-ya' ri k'o-pe chuwech ri tz'iran ruwach'ulew richin ri Jeruel.

¹⁷ Man ja ta rix ri xkixbanon oyowal; rix xaxe kixpa'e' chiri' y tiwoyobej, y kan xtitz'et k'a chi ri Jehová xkixrukol. Rix winaqi' aj-Jerusalem y chuqa' rix ri ix richin ri ajawaren richin Judá, man tixibij k'a iwi' y man kixmayamo-qa; kixbiyin k'a chikij ri chua'q, y ri Jehová kan xtik'oje' iwik'in, keri' nubij ri Jehová, xcha' ri Jahaziel chike.

¹⁸ K'ari' ri Josafat xxuke-qa y xulukuba-qa-ri' k'a pan ulew; chuqa' keri' xkiben konojel ri winaqi' ri ek'o-apo chiri' richin xkiya' ruq'ij ri Jehová.

¹⁹ Chirij ri', ri e levita e rijatzul kan ri Quehat y ri e rijatzul kan ri Coré xkichop nikiya' ruq'ij ri Dios richin Israel rik'in bix y kan janila kow xebixan.

²⁰ Ri ruka'n q'ij, xeyakatej nimaq'a' yan richin yebe pa tz'iran ruwach'ulew ri k'o chunaqaj ri tinamit Tecoa, y toq rije' ye'el yan el, ri Josafat xpa'e-q'anej y xubij chike konojel: Kiniwak'axaj chi'iwonojel nuwinaq. Kan tiqakuquba' qak'u'x rik'in ri Jehová ri qa-Dios y keri' kan xtik'oje' k'a quchuq'a'; chuqa' tiqakuquba' qak'u'x kik'in ri q'alajirisey ruch'abel ri Dios y kan utz k'a xtel ronojel chiqawech, xcha' chike.

²¹ Toq xch'on yan kik'in ri ruwinaq, chuqa' xerucha' ka'i-oxi' bixanela', y xubij chike chi tikikusaj-el ri kitziaq ri kan richin nimaq'ij, y ja rije' ri xe'ik'o-el chikiwech ri aj-labal, y nikibixaj k'a: Tinimirisex k'a ruq'ij ri Jehová, roma ri rajowabal y ri rujoyowanik kan richin q'asen, yecha'.

²² Y toq ri bixanela' xkichop-q'anej bixanik rik'in janila kikoten, jari' toq ri Jehová xusech kik'u'x ri e etzelanel kichin y xech'akatej. Xuben k'a chike ri aj-Amón, ri aj-Moab y ri muenita chi xa kiyon rije' xkikamisala-qa ki' chikiwech.

²³ Ri aj-Amón y ri aj-Moab xekikamisala' ri muenita y kan xekik'is k'a; y toq xetane' chikij rije', xa kan chi kachibil-ki' xkikamisala-qa ki'.

²⁴ Toq xe'apon ri aj-Judá akuchi niq'alajin-wi ri tz'iran ruwach'ulew richin yekitzu-qa ri e etzelanel kichin, jari' toq xekitz'et-qa kiyon chik kaminaqi' e li'an kan chiri' pan ulew, y kan man jun xanimej chike.

²⁵ K'ari' ri Josafat y ri achi'a' xebe-qa richin xbekik'ama-pe ri kik'uan ri e etzelanel kichin; y xkil k'a pe janila chi beyomel, jebelej taq tzieq y ch'aqa' chik ri kan k'o rejqalen. Ronojel re' xekik'uaj; kan janila k'a k'iy, y roma ri' kan man xetikir ta xkimol ruchi' pa jun q'ij. K'o chi oxi' q'ij xek'oje' chiri' richin xkimol ruchi' ronojel ri k'o rejqalen ri kichin kan ri e etzelanel kichin.

²⁶ Chupan k'a ri rukaj q'ij xkimol-ki' konojel rije' ri chiri' chupan jun taq'aj kojol juyu' ri k'o chiri' richin xkiya' ruq'ij ri Jehová, y roma ri' xkibij Taq'aj kojol juyu' richin Beracá*f9* chire k'a re wakami roma chiri' xkil-wi urtisanik.

²⁷ Chirij re' xetzolin-pe pa Jerusalem, y ri Josafat ik'owineq-pe chikiwech. Xetzolej-pe rik'in janila kikoten roma kan ja ri Jehová ri xkolon kichin chikiwech ri e etzelanel kichin.

²⁸ Toq xe'apon pa Jerusalem, xebe pa rachoch ri Jehová y xkiq'ojomaj jalajoj ruwech q'ojom achi'el ri salterio, ri arpa y ri trompeta.

²⁹ Toq konojel ruwach'ulew xketamaj chi ja ri Jehová ri xbanon ri oyowal kik'in ri e etzelanel kichin ri aj-Judá, jari' toq xkik'en janila rukiy ri Jehová.

³⁰ Keri' xk'oje' k'a uxlanibel-k'u'x chupan ri q'atbel-tzij richin ri Josafat, roma ri Dios xuben chike ri ch'aqa' chik tinamit, richin man xeyakatej ta pe chirij ri Judá.

Ri rucholik ri q'atbel-tzij richin ri Josafat

³¹ Toq ri Josafat k'o juwineq wolajuj rujuna', jari' toq xuchop nuq'et-tzij pa ruwi' ri ajawaren richin Judá, y juwineq wo'o' k'a juna' xuq'et-tzij pa Jerusalem. Ri rute' rubini'an Azubá, rumi'al kan ri Silhí.

³² Ri Josafat kan xuben k'a ri utz achi'el xuben ri Asá, ri rutata'. Ri rubanobal kan choj xuben chuwech ri Jehová.

³³ Jak'a ri akuchi niya'ox-wi kiq'ij ri wachibel ri ek'o pa ruwi' taq juyu' k'a xeruya' na kan jujun, roma man konojel ta ri winaqi' kijachon ri kánima chire ri Jehová ri ki-Dios ri kati't-kimama'.

³⁴ Ri ch'aqa' chik rubanobal ri Josafat, ri pa rutikeribel k'a pa ruk'isibel chire ri ruk'aslen, xtz'ibatej kan chupan ri wuj richin ri ruch'abel ri Jehú ri ruk'ajol ri Hananí, y re' xtz'ibatej chik kan chupan ri wuj kichin ri rey e richin Israel.

³⁵ Chirij ronojel re banobel re', ri Josafat rey richin Judá xjunamatej-ruwech rik'in ri Ocozías, rey richin Israel, ri kan itzel rubanobal chuwech ri Dios.

³⁶ Xerumol k'a jun tzobaj achi'a' richin xekiben barco richin yebe pa Tarsis, y xekiben k'a chiri' pan Esión-guéber.

³⁷ Y k'o k'a jun q'alajirisey ruch'abel ri Dios ri rubini'an Eliézer aj-Maresá, ruk'ajol ri Dodavahu; xuq'alajirisaj chire ri Josafat re ch'abel re': Ri Dios kan niberuk'isa' ri samaj ri yatajin chubanik, roma xjunamatej-awech rik'in ri Ocozías, xcha'. Y roma ri' ri barco ri' xa xewulatej, y man jun bey xetikir xebe pa Tarsis.