2 Crón 12 - Kaqchiquel Bible

¹ Toq ri Roboam xjike' ri ruq'atbal-tzij y xuna' richin xk'oje' ruchuq'a', xa kan man xutaqej ta chik ri rupixa' ri Jehová y chuqa' keri' xkiben konojel ri winaqi' ri ek'o chupan ri q'atbel-tzij.

² Rije' xa xkimalij kan ri Jehová, y roma ri' chupan ri ro' juna' chire q'atbel-tzij richin ri Roboam, xapon-q'anej ri Sisac rey richin Egipto richin xberubana' oyowal pa ruwi' ri Jerusalem,

³ e ruk'uan-el 1,200 carruaje e richin oyowal, e 60,000 achi'a' ri yech'oke' chirij kiej y janila chi aj-labal ri kan man e ajlatel ta; konojel re' e peteneq chupan ri ajawaren richin Egipto e kachibilan-pe winaqi' libio, suquieno y winaqi' etíope.

⁴ Xeruch'ek k'a ri tinamit ri tz'apen-kij chi tz'aq ri e richin ri ajawaren Judá, y xapon k'a pa tinamit Jerusalem.

⁵ K'ari' ri Semaías ri q'alajirisey ruch'abel ri Dios xbe rik'in ri Roboam, y ri e tata'al richin ri Judá ri kimolon-ki' pa Jerusalem roma ri oyowal ri nuben ri Sisac. Y xubij k'a ri Semaías chike: Ri Jehová nubij chi roma rix ximalij kan rija', keri' chuqa' rija' xkixrumalij kan pa ruq'a' ri Sisac, xcha' ri Semaías.

⁶ Ri e tata'al y ri rey janila xkiqasaj-ki' richin xkiya' chikij ri kimak y xkibij chi kan qitzij wi ri nubij ri Jehová.

⁷ Y toq ri Jehová xerutz'et chi rije' janila xkiqasaj-ki' chuwech, jari' toq xubij chire ri Semaías: Roma xkiqasaj-ki' chinuwech, man xkenk'is ta; xa kan chi'anin k'a xkento', y man xtinkusaj ta ri Sisac richin ninwelesaj ri woyowal chirij ri Jerusalem.

⁸ Jak'a xa xkebeyuqe' pa samaj rik'in rija', y keri' xtikitz'et k'a ri rukojol toq yinkisamajij yin y toq yekisamajij ri ch'aqa' chik rey kichin ch'aqa' chik ruwach'ulew, xcha' ri Jehová chire.

⁹ Toq ri Sisac, rey richin Egipto, xok chupan ri tinamit Jerusalem, ri aj-labal richin Egipto xkik'uaj-el ronojel ri beyomel richin ri rachoch ri Jehová, y chuqa' ronojel ri beyomel richin ri rachoch ri rey. Chuqa' xekik'uaj k'a el ri tobel ri e banon rik'in q'anapueq ri rubanon kan ri rey Salomón. Kan ronojel k'a ri k'o rejqalen ri k'o chiri' pa Jerusalem xkik'uaj-el.

¹⁰ Y roma ri' ri rey Roboam xeruben kik'exel ri tobel ri xe'uk'uex-el; xeruben k'a rik'in q'enq'oj-pueq, y richin xechajix xerujech pa kiq'a' ri aj-raqen ri yechajin richin ri rachoch rija'.

¹¹ Y kan xaxe k'a toq ri rey nibe pa rachoch ri Jehová, jari' toq ri achi'a' ri chajinela' ri chiri' yekikusaj k'a ri tobel ri', y chirij ri' xa yebekiyaka' chik kan pa kik'ojelibal.

¹² Roma k'a xuqasaj-ri' ri Roboam chuwech ri Jehová, roma ri' xik'o-el royowal chirij y man xuya' ta q'ij chi xk'is ta jumul ri k'o rik'in. Man rik'in ri' kan k'a k'o na k'iy utz ri xk'oje' kan pa ruwach'ulew Judá.

¹³ Ri Roboam kan xk'oje' k'a ruchuq'a' chupan ri ruq'atbal-tzij pa Jerusalem. K'o k'a kawineq jun rujuna' toq xuchop nuq'et-tzij y wuqlajuj juna' xq'aton-tzij chiri' pa Jerusalem; tinamit ri kan rucha'on ri Jehová chikikojol ri tzobaj richin ri Israel richin nik'oje' chiri' y niya'ox ruq'ij. Y ri rute' aj-Amón, y rubini'an Naamá.

¹⁴ Ri Roboam kan xuben k'a ri itzel y kan man xubij ta ránima richin xukanoj ri Jehová.

¹⁵ Ri ch'aqa' chik natabel richin ri Roboam, ri pa rutikeribel y pa ruk'isibel chire ri ruk'aslen, xtz'ibatej kan chupan ri wuj ri richin ri q'alajirisey ruch'abel ri Dios rubini'an Semaías y chupan ri wuj richin ri Iddo, ri nitz'eton ri peteneq chiqawech. Y chijun k'a ri kik'aslen ri Roboam y ri Jeroboam, kan jantape' xk'oje' labal chikikojol.

¹⁶ Y toq ri Roboam xken, xmuq chupan ri tinamit richin ri rey David y ja ri Abiam ri ruk'ajol ri xk'oje' kan pa ruk'exel.