1 Crón 20 - Kaqchiquel Bible

¹ Xbanatej k'a chi pa nabey ik' chire ri juna', toq ri e rey yebe pa taq labal. Jari' toq ri Joab xeruk'uaj-el ri aj-labal pa kiruwach'ulew amonita y kan xekik'is. Xkisutij k'a rij ri tinamit Rabá y xkich'ek chuqa'. Jak'a ri David xa k'o kan pa Jerusalem.

² Chirij ri' ri David xbe richin xberelesaj-pe ri ru-corona ri rey richin ri tinamit ri' y xutz'et chi kan janila ralal. Nipajon k'a jubama oxk'al wolajuj libra, y banon rik'in q'anapueq; kan ek'o jebejoj taq abej chirij. Re' xya'ox pa rujolon ri David. Keri' chuqa' kan xekimej k'a pe chuwi-kiq'a' ri etzelanel kichin ronojel ri k'o rejqalen.

³ Y chuqa' xekik'uaj-el konojel ri winaqi' y xekiya' pa kowilej taq samaj rik'in qupibel-che' y rik'in ikej. Chuqa' xkisamajij ri ulew. Keri' k'a xuben ri David chike konojel amonita. K'ari' ri David y ri aj-labal xetzolej pa Jerusalem.

Oyowal kik'in nima'q taq kipalen achi'a'

⁴ Chirij ronojel re' xbanatej chik jun oyowal kik'in ri aj-Filistea chiri' pa tinamit Guézer. Ri Sibecai ri aj-Husá kan xukamisaj k'a jun chike ri achi'a' nim rupalen rubini'an Sipai.

⁵ Y xbanatej chik jun oyowal kik'in ri aj-Filistea. Y jun chike ri israelita rubini'an Elhanán ruk'ajol ri Jaír, xukamisaj k'a ri Lahmí, ri rach'alal kan ri Goliat ri aj-Gat. Ri rukum ri achin ri', kan achi'el ri k'i'r richin ri nima'q taq kembel.

⁶ Chuqa' xbanatej jun chik oyowal chiri' pa Gat, y k'o k'a jun achin nim rupalen k'o kablajuj ruwi-ruq'a' y kablajuj ruwi-raqen.

⁷ Re achin re' xuyoq' ri tinamit Israel; y roma ri' xkamisex roma ri Jonatán ruk'ajol ri Simá, ri rach'alal ri David.

⁸ Konojel re achi'a' re' e aj-Gat, y xech'akatej pa ruq'a' ri David y pa kiq'a' ri e aj-raqen.