1 Crón 18 - Kaqchiquel Bible

¹ Chirij ronojel re', ri David xeruch'ek ri aj-Filistea, y xk'oje' ri ruq'atbal-tzij pa ruwi' ri tinamit Gat y ri kokoj taq rutinamit.

² Chuqa' ri David xeruch'ek ri moabita y xeyuqe' pa samaj rik'in y k'o chi xesamej rik'in rija'.

³ Ri David xuch'ek chuqa' ri rey Hadad-ézer richin ri ruwach'ulew Sobá, ri k'o pa xaman chunaqaj ri tinamit Hamat. Re' xbanatej toq ri Hadad-ézer beneq richin yeberuch'aka' ri ruwach'ulew ri k'o chuchi' ri raqen-ya' Éufrates.

⁴ Y ri David xeruch'ek k'a e 1,000 carruaje e richin oyowal, chuqa' e 7,000 achi'a' ri yech'oke' chirij kiej y e 20,000 aj-labal ri yebe chi kaqen. Rija' jubama chike konojel ri kiej xerutzak'ila' kan ri paten-iboch' richin ri kaqen y xaxe k'a e wok'al kiej ri xerukol kan.

⁵ Xe'apon k'a ri aj-Damasco richin Siria richin nibekito' ri Hadad-ézer, ri rey richin Sobá, jak'a ri David xerukamisaj e 22,000 chike rije'.

⁶ K'ari' ri David xeruya' chajinela' pa Damasco richin Siria, y ri aj-Siria xeyuqe' kan pa samaj rik'in ri David y kan k'o chi xepatanin rik'in. Keri' ri Jehová Dios xeruya' ch'akonik chire ri David, xabakuchi xbe-wi.

⁷ Chuqa' ri David xeruk'en kan ri kitobal banon rik'in q'anapueq ri nikikusaj ri aj-raqen richin ri Hadad-ézer, y xeruk'uaj-el pa Jerusalem.

⁸ Chuqa' ri pa tinamit Tibhat y ri Cun xeruk'en-pe k'iy q'enq'oj-pueq, ri kan e richin ri Hadad-ézer. Y rik'in re' pa ruq'ijul ri rey Salomón xtuben ri nimalej yakbel-ya' richin ri rachoch ri Dios, y chuqa' xkeruben ri ka'i' pilar y ri ch'aqa' chik samajibel richin ri jay ri'.

⁹ Toq ri rey richin ri tinamit Hamat, rubini'an Toi, xrak'axaj chi ri David xeruch'ek kan ri aj-labal ri e richin ri Hadad-ézer,

¹⁰ xuteq-el ri ruk'ajol rubini'an Adoram rik'in ri rey David. Y xeruk'uaj-el ronojel ruwech samajibel e banon rik'in q'anapueq, saqipueq y banon rik'in q'enq'oj-pueq richin xerusipaj kan chire, y richin xberumatioxij kan chire roma xuch'ek ri Hadad-ézer. Xberumatioxij kan chire ri David roma ri Toi kan rubanon-pe labal rik'in ri Hadad-ézer, jak'a man tikirineq ta ruch'akon.

¹¹ Ronojel re' ri xbeya'ox kan chire ri rey David, xujech chire ri Jehová, achi'el ri xuben kik'in ri xrelesaj-pe chuwi-kiq'a' ri winaqi' edomita, moabita, amonita, amalecita y ri aj-Filistea.

¹² Y xeri' ri Abisai ral ri Seruiá y ri aj-labal, xekikamisaj e 18,000 winaqi' edomita ri chuwa-taq'aj, rubini'an Atz'an.

¹³ Y ri David xeruya' kan chajinela' chijun ri ruwach'ulew Edom. Y keri' konojel ri aj chiri' xeyuqe' pa samaj rik'in ri David. Ri Jehová kan xuya' k'a ch'akonik pa ruq'a' ri David xabakuchi xbe-wi.

¹⁴ Ri David xq'aton k'a tzij chupan chijun ruwach'ulew Israel; kan choj y kan pa ruchojmilal ri xuben rik'in ri tinamit.

¹⁵ Y ri aj-raqen pa kiwi' ri aj-labal ja ri Joab ral ri Seruiá; ri Josafat ruk'ajol ri Ahilud, jari' ri aj-tz'ib richin ri rey;

¹⁶ ri e ka'i' sacerdote ja ri Sadoc ruk'ajol ri Ahitub y ri Ahimélec ruk'ajol ri Abiatar; ri Savsá ja rija' ri etamayon ronojel ri nibebanatej q'ij-q'ij chupan ri ruwach'ulew;

¹⁷ ri Benaías ruk'ajol ri Joiadá, jari' ri k'o pa kiwi' ri quereteo y ri peleteo y ri e ruk'ajol ri David ja rije' ri e tata'al y e to'onel richin rija'.