Ruth 1 - Korafe-Yegha

1:1-5 Elimelech Nunda Ghagurude Moab Iseri.

^1-2 Anakora beká, God giti jighari gategeari Israel embo kaifa edo ghuseri. Ainda sifoda, reighi Judah aminda baimara sirorusira. Sifo aminda, Bethlehem embo, oro Ephrat ondi, genembo javo Elimelech noaro Naomi ghae iriari. Nenda sasingu vide jamena etoto Mahlon nengae Kilion ghaeri. Baimara sirorusira aindae sedo, Elimelech noaro ghae sasingu budo, reighi teria eni Moab aminda iseri. Era aminda irise,

³ Elimelech ambiri, Naomi nunda sasingu vide jamena etoto ainde nesuka irise,

⁴ nengae bajido Moab embo, adejamena etoto, Orpah nengae Ruth ghae ava fifituseri. Fitido irise, ghaeko ghabu soveni soveni avaga dadabetiri,

⁵ Mahlon nengae Kilion ghae barago ambero, Naomi foivo bate beká ava edo irei.

1:6-22 Naomi Nengae Ruth Ghae Jovereghe Era Bethlehem Buvurutuseri.

⁶ Irise sifo eni, Naomi nu, Bajari nunda natofo Israel embo esimbugetiri vare eveva govetero beká jijighusira, ainda bino ava iri ningido, reighi Moab dodo jovereghe yari dae, nunda mamandisiride javi useri.

⁷ Ne isambu javi edo dabade Judah yari dae iseri, avata emboro soroda,

⁸ nunda mamandisiri bureguse sisira, “Nengae jovereghe ivu, natida nei manede irove! Bajari nemokena veka eveva, kau nengae namokena, kotugo amomonjegusera aikena, useva, daba ava are!

⁹ A Bajari sonembari nengae isambu sekago vai edo totofo nenda ofo kamboda irove!” Aminge sedo, avori, Naomi nengae ategi use muno usira. Avata nengae tuturo edo sorara use,

¹⁰ numokena siseri, “Tefo! Namane namonde karona ninda totofokena yarera.”

¹¹ Setero, Naomi mino sisira, “Nanda mamandisiri, nengae jovereghareva. Nengae redae namonde yari resevu? Ne erekoteva, na sasingu vide jamena sekago baono nemokena vai areva?

¹² Jovereghe, natida ivu! Na evetako eteni, jo sekago vai ari da kaugo iraeri. Vai ari da kau iraetira, oroko tumbaghae vai aono sasingu vide jamena siroraetera amo,

¹³ nengae rekato nemo kaifa ururovo bajaeteri? A rekato nemo kaifa use gegenembo mendenikena jo vai ae irarevu? Tefo, nanda mamandisiri, ne kasama ereva, jo amingari da kaugo iraeri. Bajari nandae osogo iri, ainda mema nembarago eretafeva aindae, na nendae joka erena.”

¹⁴ Ava setiri nengae ningido, sekago tuturo edo, sorara ererare. Use, Orpah nunda imboti ategi use, muno e dodo jovereghe natida isira. O Ruth mo, nu jo Naomi do jovereghaeri.

¹⁵ Amingetiri aindae, Naomi numokena sisira, “Ruth, ninda oso jovereghe nunda totofo a nunda god kena erira. Nimbarago jovereghe, nengae dabade natida ivu!”

¹⁶ Avata Ruth mino sisira, “Na buregeose! Na ninda karona nangae yaréra. Ni reda yarésa, nangae yaréra. Ni reda irarésa, na nangae aminda iraréra. Ninda totofo nanda tofo ava baréna, a ninda God nanda God dae sedo ava baréna.

¹⁷ Ni reda ambaso furegaréra, na ambono aminda furegaréra. Nangae dabade irarera, ambari tano. Na resena e jo ae arena amo, Bajari namokena bouvu mema mutari itatamaeteni!”

¹⁸ Ruth nengae yari dae besiga usira ágido, Naomi nu buregari dodo, nengae dabade iseri.

¹⁹ Nengae erusera, reighi Bethlehem buvurutuseri. Nengae buvurutero, natofo aminda ivuga beká use, evevetu aminda aimi eminge siseri, “Emo Naomi ri ai, mavejori?”

²⁰ Naomi mino eminge sisira, “Erá nandae Naomi seove! Nandae Marah sevu! Ai resira, Bajari Fakina kato aimi nanda irari etiri fakarago etira.

²¹ Na eminda ghedo isena amo, avughaegori. Avata Bajari nasuka namoá bu jovereghe refira. Bajari na imboe edo bouvu mema futusira emo, redae nandae Naomi sarévu?”

²² Naomi nunda mandaro, Moab embo Ruth ghae Moab dodo fera Bethlehem buvurutusera amo, ne farava javo bali (barley) je sijari da sifoda fera buvurutuseri.