Jonah 2 - Korafe-Yegha

2:1-10 Jonah da Banungari

¹ Jonah oka tini jokáda irise, nunda Bajari God kena banunguse

² sisira, “Na eko tafuse, Bajari nimokena kori seteno, ni mino setesi. Ambarida uroda fefetuse, na sonembadae kori seteno, nine nanda kori ningesi.

³ Na nine fugeteso, kafuru duru bekáda vosaena. Kafuru duru duru bekáda buveno, taito na bu siviri, ninda eva nanda etoda afufedo aira.

⁴ Na seteni, na ninda dombuda dadabari beká eteni. Nanda kotari ni na imboe beká ariá seteni. Avata na sekago ninda tafaroro kambo kakara diti fuge garena.

⁵ Eva anje ojira na fati tifughedo, afurugari beká etiri; ghaevoimi na jiroda eghetira.

⁶ Na tifughedo vosaena, doriri mane iritirira ainda duru bekáda buveni. Enda duruda aimi na gajari beká gajetira. Avata nine nanda jebuga Ambari da uro bekada sekago mutesi. Arie, Bajari, nanda God!

⁷ Nanda jebuga darigiri, na nimoá koteteni, Bajari, ã nanda banungari ninda tafaroro kambo kakara nimokena buvira.

⁸ Mave kosi, ove yeye tangoro bu jighirise, nimoá tumondaetera ava, guka futuseri.

⁹ Avata namo, yaruimi sakai sise, nanda joba nindae dedo dungono avari, na rea ava ari dae beka gagojusena amo, ava aono eveva arira. Jebuga beká Bajari kena ghe foa gheraira.”

¹⁰ Aminge banungetiri, Bajari oka aikena setiri, okaá Jonah tugetiri ghonesada vivitusira.