Sră Ôse 14 - Sră Goh 2018

Gơjrañ sang glài gen geh lơngai

¹ Ơ Israel, rê wơl tĕ hơ Jehôwa Yàng Tom Trồ mê dê, hơ̆ la tài bơh tồi glài mê dê neh lơh mê in gơplơ̆ gơpừ.

² Bol mê ai tĕ jơnau đơs mơ rê wơl hơ Yàng Jehôwa; đơs tĕ mơ Kơnràñ lah: “Dan toh jơh ală bơta tồi glài bol hi dê; mơ dòp rò tĕ bơta lơi la niam, behơ̆ bol hi rơp ơn jơnau jòng ro bơh sơndồi bol hi ala kơnrồ dam.

³ Asiri ò rgơi dong klàs bol hi; bol hi rơp ò hào ơseh tòmlơh. Bol hi rơp ò tŭ lơi đơs mơ phan bơh tê bol hi lơh gơs lah: Yàng Tom Trồ bol hi dê, bơh tòm Kơnràñ cau kòn đòi jòi bàn bơta kòñ nđàc.”

Jơnau ho nền cê bơh bơta toh glài

⁴ Añ rơp sơmbòi bơta ò dòn song bol khai dê, Añ rơp kòñ gơboh dê bol khai jơh nùs; bơh bơta gơjrañ Añ jê neh pơrlac bơh di bol khai.

⁵ Añ rơp be dà tŭ Israel in; khai rơp gơlik bơkào be bơkào gun, Khai rơp kung be dơr brê srò ryas jrô tòm Liban.

⁶ Ală sơmbut khai dê rơp hòn dờng, bơta hàng mơnĕ khai dê rơp kung be chi ôlibe, ƀô bơlhu khai dê kung be chi blàng Liban dê.

⁷ Bol khai rơp rê wơl mơ ơm tòm tiah mƀur Añ jê; Khai rơp gơlik cồng nha kung be dô nơm suơn. Khai rơp gơlik bơkào kung be tòm ño, mơ bơta ƀô bơlhu bol khai dê rơp kung be tơrnòm ño Liban dê.

⁸ Ơ Epraim, gơs ñchi lơi Añ gơwèt mơ ală rùp ràk taih? Să tòm Añ neh ho jơnau mê mơ sền gàr mê. Añ kung be la dô nơm chi nho tơlir; bơta dòn song mê dê tus bơh Añ.

Jơnau crap wơl

⁹ Ñcau la cau jak chài rơp đal git ală bơta do? Ñcau git kơlôi sơnơng rơp wă wơng ală bơta hơ̆? Bơh ală gùng dà Yàng Jehôwa dê la song ngan; mơ ală cau song ring rơp cơnđòa lòt tòm hơ̆, mơya ală cau tồi glài gen gơplơ̆ gơpừ tòm hơ̆.