Sră Jop 4 - Sră Goh 2018

Eliphas đơs Jop neh tìs glài

¹ Gen Eliphas cau Theman ho wơl lah:

² “Dilah gơs dô nă cau lơi khin đơs dô jơnau mơ ồng, ồng rơp jê nùs sơl ơ? Mơya ñcau rgơi ơm mŏ mŏ taih?

³ Sền ne ồng neh bơto sồr oă cau, ồng neh lơh pràn kơldang ală tê lơbơn lơño.

⁴ Ală jơnau đơs ồng dê neh chồl bơtrut ală cau gơtup pừ, Mơ ồng neh lơh kơ̆ wền ală gơltang lơbơn lơño.

⁵ Mơya tŭ do bơta rung rài tus hơ ồng, gen ồng ò kơ̆ nùs, Gơtup di ồng gen ồng gơdô nùs.

⁶ Bơta ồng duh rngòt di Yàng Tom Trồ ò di la bơta dòn kơnòm ồng dê, Mơ nùs song ngan gùng dà ồng dê la bơta gơn kơnòm ồng dê ò ơ?

⁷ Tŭ do kơlôi sơwì tĕ, gơs tŭ lơi cau ò gơs glài kong roh rui sơl ơ? Hala ntềng đah gơs cau song ring kong tơnroh taih?

⁸ Jat be bơta añ neh sền gŏ, cau lơi lơòr bơta iơh bơsak, Mơ cau lơi sih bơta dơrcul gen toès wơl ală bơta hơ̆.

⁹ Bơh nhơm tă Yàng Tom Trồ dê, bol khai kong roh rui, mơ bơh càl bơta gơjrañ Kơnràñ dê, bol khai kong chu pơrguc.

¹⁰ Bơta ơluh ơhùm klìu triă dê, sap ơluh ơhùm klìu triă jàñ bơsak dê, Mơ sề klìu triă brồ dam dê neh pă.

¹¹ Klìu triă pràn kơldang kong roh rui bơh siơ̆u phan kup geh, Mơ ală kòn dềt klìu triă me dê kong nrah nring.

¹² Gơs dô jơnau be cau kơñau tus mơ añ, tồr añ kơno jơnau đơs chều hơ̆,

¹³ Digùl bơta kơlôi sơnơng bơh bơta gơtơnggŏ trồ mang dê, Tòm tŭ kòn mơnus ơm bic lơhă.

¹⁴ Bơta rngòt rngơt tus hơđang añ mơ bơta rơm să, Bơta hơ̆ lơh jơh ală ntìng añ jê gơ mprơm.

¹⁵ Gơs dô nơm hwềng lòt gan di đap mat añ, Lơh gơrà sơnò tòm să añ.

¹⁶ Hwềng hơ̆ ơm dơh wơl, Mơya añ ò git đal gơ, Gơs dô nơm rùp să ơm di đap mat añ, gơs bơta ring ngềt gen añ kơno dô sap đơs lah:

¹⁷ ‘Kòn mơnus òs chơt rgơi song ring di đap Yàng Tom Trồ sơl? Kòn mơnus rgơi sàng goh di đap Bơtau neh crơng gơs khai sơl?

¹⁸ Tian gơs Kơnràñ ò dòn kơnòm di ală cau duh broă Kơnràñ dê, Mơ Kơnràñ lah pơrhơng ală cau gơnrơh Kơnràñ dê bơh bơta lơh tìs bol khai dê,

¹⁹ Tơ ài lah ală cau ơm tòm ală hìu mơ ù kơnàng, Gơs mơnàng tòm kơmbuh ù, bol khai kong tơnlề be dô nơm mŏ!

²⁰ Digùl àng drim mơ trồ mho, bol khai kong tơnroh; Kong roh rui sùm sùm, ò gơs cau lơi kơlôi bơh bol khai.

²¹ Ală che kơt sàl bol khai dê neh tă tơlik bơh bol khai, Mơ bol khai chơt ò gơs bơta jak chài.’”