Sră Jop 20 - Sră Goh 2018

Jơnau Jôphar đơs bơh bơta lơh glài cau iơh bơsak

¹ Gen Jôphar, cau Naama ho wơl lah:

² “Kơrhia tĕ! Ală bơta kơlôi sơnơng añ jê chồl bơtrut añ ho wơl, Tài bơh bơta wañ lơnggơh tòm dơlam añ.

³ Añ neh kơno jơnau lah sơrpah bơtat bơtròh di añ; mơ dô nơm hwềng rlau mơ bơta git wă añ jê ho wơl añ.

⁴ Oh mi ò git bơta do bơh tòm rài yau, Bơh di tŭ jơi kòn mơnus geh ơn hơđang plai ù,

⁵ bơta hừh nùs cau iơh bơsak dê la liah ngan, Mơ bơta chò hòp cau ò dòn duh di mìng dô ơthoa lơm.

⁶ Bulah bơta pơnhừ să bol khai dê guh jơnhoa be ală tap trồ, Mơ bồ khai ngŏ tus di ală mhwal,

⁷ Bol khai rơp roh rui sùm sùm, kung be è tòm khai dê; Ală cau neh gŏ bol khai rơp đơs lah: ‘Ntềng đah bol khai taih?’

⁸ Bol khai par roh thit kung be dô bơta mpau, mơ jòi ò bàn, bol khai rơp kong sơrbì ngài be dô bơta gơtơnggŏ tòm trồ mang.

⁹ Gar mat neh sền gŏ bol khai rơp ò gŏ bol khai tai, Tiah ơm bol khai dê kung ò đal git bol khai tai.

¹⁰ Kòn sau bol khai dê rơp jòi bơta nđàc bơh di cau rƀah, mơ tê bol khai dê ai wơl phan mơna bol khai dê.

¹¹ Să jan bol khai dê bềng bơta pràn kơldang be gam pơnu. Rơp bic tòm thul ơmul bal mơ bol khai.

¹² Bulah bơta iơh la lơngồt tòm bơr bol khai dê, Mơ gơ pồn hơđơm lơmpiat bol khai dê,

¹³ Bulah bol khai ò bài sang lòi gơ, mơ prap lòi gơtòm bơr bol khai dê,

¹⁴ phan sa bol khai dê gơtòmgơl tòm kơndul bol khai dê, gơ la dà bih ală bơs dê tòm dơlam bol khai.

¹⁵ Bol khai loan jơh ală phan mơna mơ hă gơ wơl; Yàng Tom Trồ rơp tơlik gơ bơh kơndul bol khai dê.

¹⁶ Bol khai rơp jồp dà bih ală bơs dê, Lơmpiat dô nơm bơs tur dê rơp tơnchơt bol khai.

¹⁷ Bol khai rơp ò sền gŏ ală hiòng dà, Ală croh dà gơhòr dà lơwe mơ dơngi dà toh.

¹⁸ Bol khai tơm wơl plai đo broă lơh bòl glar bol khai dê, mơ rơp ò geh sa loan gơ; bơh cồng nha bơta kă bro bol khai dê, bol khai rơp ò geh chò hòp dòp ngui.

¹⁹ Bơh khai neh rồn bơklơn mơ sang lòi cau rƀah, Bol khai tòmpìt hìu mơ bol khai ò bơt.

²⁰ Bol khai git ò gơs bơta ring ngềt tòm nùs bol khai, tòm bơta hàm hà bol khai dê ò gơs dô bơta lơi geh klàs.

²¹ Ò gơs phan lơi gam wơl tơnơ̆ mơ tŭ bol khai neh sa; gen tàng bơta pas gơs bol khai dê ò gam jŏ.

²² Tòm tŭ geh tơngkah tơngkañ, bol khai rơp kong bơta jê sồt bòl glar; Jơh ală bơta dồn sa rƀah rơp dùh hơđang bol khai.

²³ Tơmbềng kơndul bol khai nàng hòm, Yàng Tom Trồ rơp sồr bơta gơjrañ dờng hơđang bol khai, Kơnràñ mìu bơta gơjrañ Kơnràñ dê hơđang khai kung be phan sa.

²⁴ Bol khai rơp dô klàs bơh phan tòmlơh mơ lòs, dô nơm kam mơ kòng rơp srơp bluh bol khai.

²⁵ Gơ sơntă bơh di să bol khai, mơ phan sơmplàñ àng gơcrà lik bơh di plai bơtang bol khai dê. Ală bơta rngòt cù kìr tus hơđang bol khai.

²⁶ Jơh bơta klam jơngo ơm gơn ală phan màng bol khai dê; Dô nơm ồs ò di bơh cau khồm rơp sa bol khai, jơh ală phan lơi gam wơl tòm sàl bol khai dê rơp kong chu jơh.

²⁷ Ală tap trồ rơp ràng tơlik ală bơta tồi glài bol khai neh tìs; mơ plai ù rơp ñă ntào tòmdră mơ bol khai.

²⁸ Phan mơna hìu bol khai dê rơp kòl cèng pơrdô jơh, kòl pơrdô roh thit tòm ngai gơjrañ dờng Yàng Tom Trồ dê.

²⁹ Hơ̆ la pơnah mơ Yàng Tom Trồ prap lòi ală cau iơh bơsak in, La phan jơtài mơ Yàng Tom Trồ neh lơh nền bol khai in.”