Sră Jop 12 - Sră Goh 2018

Jop đơs lah khai la phan cau dơñŏ tơnhial

¹ Jop ho wơl lah:

² “Ngan oh mi la ală jơnau đơs làng bol dê, Bơta jak chài rơp chơt bal mơ oh mi.

³ Mơya añ kung gơs bơta git wă be oh mi sơl, Añ ò di gơhuc hơđơm rlau mơ oh mi. Ñcau ò git ală bơta behơ̆ taih?

⁴ Añ la bơta dơñŏ tơnhial ală cau bơyô añ jê; Añ neh hòi guh tus hơ Yàng Tom Trồ, mơ Kơnràñ ho wơl añ; Dô nă cau song ring mơ ò gơs tiah geh lah pơrhơng, añ neh gơkòl cau dơñŏ tơnhial!

⁵ Cau ơm lơngai lơngò sền òsơp di bơta gơtup gơtơl. Neh rcang sir ală cau gơs jơng ò ntào kơ̆.

⁶ Ală sàl ală cau ntung kơñau ơm tòm tiah lơngap lơngai, mơ ală cau bơrcek Yàng Tom Trồ, bol khai ơm ring lơngai. Bol khai cèng yàng tòm tê bol khai dê.

⁷ Mơya lùp tĕ ală phan poan jơng, mơ bol gơ rơp bơto oh mi, Lùp tĕ ală jơi sềm par tòm pah gòi, bol gơ rơp yal oh mi in;

⁸ Lùp tĕ ală chi che tòm ù tiah, gơ rơp bơto sồr oh mi, mơ ală ka tòm dàlềng rơp yal loh oh mi in.

⁹ Tòm ală jơi do, jơi lơi ò git lah tê Yàng Jehôwa dê neh lơh ală bơta do taih?

¹⁰ Tòm tê Kơnràñ dê la bơta kis kòp phan kis dê, Mơ nhơm tă jơh jơi kòn mơnus dê.

¹¹ Trồm tồr ò di lòng jơnau đơs, kung be bơta bơkah liap phan sa ò ơ?

¹² Bơta jak chài ơm mơ cau kra, Mơ bơta git wă ò di ơm mơ cau kis jŏ ò ơ?

¹³ Bơta jak chài mơ pràn kơldang gơrê mơ Yàng Tom Trồ; Kơnràñ gơs bơta cri bơyai mơ bơta git wă.

¹⁴ Bơta lơi Kơnràñ sòr tơrlah, ò gơs cau lơi rgơi bơt bơtào wơl; Dilah Kơnràñ til, ò gơs cau lơi rgơi pò.

¹⁵ Dilah Kơnràñ bơt dà wơl, gen gơ soat; Dilah Kơnràñ sồr gơlik, gen gơlik dà kŏ hơđang ù.

¹⁶ Bơta pràn kơldang mơ bơta jak chài gơrê mơ Kơnràñ; Cau kong pơrlồm mơ cau pơrlồm ơm tòm tê Kơnràñ.

¹⁷ Ală cau kwang bơyai broă, lòt jơng gòi; Lơh ală cau kwang cahrña gơlik bơrngơl gơla.

¹⁸ Kơnràñ hồ ală chèo kơt but ală bơtau dê, Mơ pùt ồi gùt dar but bol khai dê.

¹⁹ Kơnràñ lơh ală cau gơnoar ơn phan duh khoai in lòt jơng gòi; Mơ tuh tơlup ală cau neh gơs gơnoar pràn.

²⁰ Kơnràñ tă tơlik cau chài đơs la ală cau geh dòn kơnòm; Mơ tă tơlik bơta dòp git ală cau kwang kra dê.

²¹ Kơnràñ tuh bơta sền òsơp hơđang cau kwang at bồ; Mơ lơh sơntă che but cau pràn dê.

²² Kơnràñ pò bơta jrô ndơp lik bơh bơta klam jơngo. Mơ cèng bơta jơngo tus hơ bơta àng.

²³ Kơnràñ lơh ală lơgar gơlik dờng, gen tơnroh bol khai; Pò ơnàng nhàr lơgar ală làng bol, gen lơh nrah nring bol khai.

²⁴ Kơnràñ tơnroh bơta git wă ală cau at bồ tòm ù; Lơh bol khai in lòt lềng làng tòm tiah ngềt ngơt ò gơs gùng lòt.

²⁵ Bol khai tơbư tòm jơngo ò gơs bơta àng; Kơnràñ lơh bol khai in lòt gơtòmsèng be cau bơñul ñô.”