Sơnròp Gơlik Gơs 48 - Sră Goh 2018

Jakôp mòr chơt, khai ai lơngai Epraim mơ Manase in, bàr nă kòn klau Jôsep dê

¹ Tơnơ̆ mơ tŭ ală broă hơ̆ neh rlau rau, gơs dô nă cau đơs mơ Jôsep lah: “Do, bèp ồng kòp,” gen Jôsep lam bal mơ khai bàr nă kòn klau khai dê la Manase mơ Epraim.

² Gơs dô nă cau yal Jakôp in git mơ đơs lah: “Do Jôsep, kòn klau ồng neh tus mơ ồng.” Israel pơnđơl nggui hơđang cơnòng bic.

³ Jakôp đơs mơ Jôsep lah: “Yàng Tom Trồ Gơnap Gơnoar Làm Jơh neh tơlik mat mơ ai lơngai añ in tòm Lus, lơgar Kanaan,

⁴ mơ đơs lah: ‘Do, Añ rơp lơh mê in tơnggơs rơ̆sơmpài ràipơjềng, mơ lơh mê in gơlik dô mpồl làng bol oă. Añ rơp ai jơi bơtiàn mê in lơgar do nàng lơh gơs sre brê sùm sùm kòp rài.’

⁵ Tŭ do bàr nă kòn klau mê neh deh tòm lơgar Ejiptơ lài mơ tŭ añ tus, la Epraim mơ Manase, kung rơp gơrê bal mơ añ be Ruben mơ Simeôn hơ̆ sơl.

⁶ Mơ ală kòn mê tơnggơs tơnơ̆, gơrê đah mơ mê; bol khai rơp geh sơnđan jat sơnđan ală bi bol khai tòm phan jơtài bol khai dê.

⁷ Tòm tŭ añ rê bơh Padan hơ lơgar Kanaan, gen Racel chơt di gah añ tòm gùng, rềp mơ Ephrata, mơ añ neh tơp khai di gah gùng lòt hơ Ephrata hơ̆ la Betlehem.”

⁸ Israel gŏ ală kòn klau Jôsep gen lùp lah: “Bol hơ̆ la ñcau taih?”

⁹ Jôsep đơs lah: “Hơ̆ ală kòn klau añ jê mơ Yàng Tom Trồ neh ai añ in tòm lơgar do.” Israel đơs lah: “Cèng tĕ bol khai hơ do nàng añ ai lơngai bol khai in.”

¹⁰ Mơ mat Israel dê lu li tài bơh kra khai ò gŏ, gen khai sồr bol hơ̆ tus rềp, mơ koar cum.

¹¹ Israel đơs mơ Jôsep lah: “Bơh lài añ tồnlah añ ò gŏ muh mat mê, mơya tŭ do Yàng Tom Trồ neh ai añ in gŏ jơi bơtiàn mê dê tai sơl.”

¹² Jôsep lam bol khai lik bơh di gơltang bèp khai dê, gen tơmbic să di ù.

¹³ Gen Jôsep lam bàr nă kòn tus rềp mơ bèp, tê ma Jôsep lam Epraim tus hơ đah kiau Israel dê, mơ tê kiau tề Manase tus hơ đah ma Israel dê.

¹⁴ Israel ai tê ma khai dê mơ ƀư hơđang bồ Epraim kòn oh, ai tê kiau khai ƀư hơđang bồ Manase. Khai gơs dô bơta kơlôi is mơ ƀư tê behơ̆, tài bơh Manase la cau bi.

¹⁵ Gen khai ai lơngai Jôsep mơ lah: “Dan Yàng Tom Trồ ồng pàng añ jê la Abraham mơ Isak neh duh khoai, la Yàng Tom Trồ neh ròng gàr añ bơh tŭ deh jơl tus di ngai do,

¹⁶ cau gơnrơh neh dong añ klàs bơh di jơh ală bơta iơh, dan ai lơngai bàr nă kòn do in mơ bol khai gơs tơrbŏ sơnđan jat añ mơ ồng pàng añ la Abraham mơ Isak, mơ ai bol khai in gơlik gơs rơ̆sơmpài ràipơjềng hơđang ù.”

¹⁷ Mơya Jôsep gŏ bèp khai ƀư tê ma hơđang bồ Epraim gen khai ò niam nùs, mơ khai tă tê bèp neh ƀư bồ Epraim nàng ơn wơl di bồ Manase.

¹⁸ Gen Jôsep đơs mơ bèp lah: “Ò di behơ̆, ơ bèp, oh do la kòn tơnhoa, ƀư tê ma bèp hơđang bồ khai dê.”

¹⁹ Mơya bèp khai ò bài mơ đơs lah: “Añ git, ơ kòn, añ git. Khai rơp gơlik gơs dô nơm làng bol, khai kung rơp gơs dờng, mơya oh khai kung rơp gơs dờng rlau, mơ jơi bơtiàn khai dê rơp gơlik gơs oă ngan làng bol.”

²⁰ Ngai hơ̆ khai ai lơngai bàr nă kòn klau hơ̆ in mơ đơs lah: “Hơ̆ la bơh bol mê mơ làng bol Israel rơp ai lơngai bal lah: ‘Dan Yàng Tom Trồ ai mê in be Epraim mơ Manase.’” Behơ̆, Jakôp ơn Epraim lài mơ Manase.

²¹ Mơ Israel đơs mơ Jôsep lah: “Do, añ rơp chơt mơya Yàng Tom Trồ rơp ơm bal mơ mê mơ lam bol mê rê wơl hơ lơgar mò pàng he dê.

²² Añ ai mê in rlau mơ ală oh mi mê dê, dô pơnah añ neh ai bơh di tê cau Amôrit bơh đào mơ àtak.”