Sơnròp Gơlik Gơs 37 - Sră Goh 2018

Jôsep mơ ală bi khai

¹ Jakôp ơm tòm lơgar bèp khai ơm ing la lơgar Kanaan.

² Do la jơnau yal bơh jơi bơtiàn Jakôp dê. Tŭ hơ̆ Jôsep neh tơl jơt poh nam, ê belàt bal mơ ală bi khai dê. Khai lơh yô mơ ală kòn Bilha mơ ală kòn Silpa dê, bàr nă bau bèp khai dê. Jôsep yal mơ mè bèp ală bơta iơh bol khai dê.

³ Israel kòñ gơboh dê Jôsep rlau mơ ală kòn klau ndai khai dê, tài bơh geh kòn hơ̆ tòm tŭ khai neh kra, gen jing khai in dô blah ào jrùh oă bơnga.

⁴ Ală bi khai gŏ bèp kòñ gơboh di Jôsep rlau mơ ală bol khai, gen gơs nùs gơjrañ kơuềng di khai, mơ ò bài đơs niam mơ khai.

Bơta mpau Jôsep dê

⁵ Jôsep gŏ dô bơta mpau, mơ yal wơl mơ ală bi khai in kơno; bol khai sơlo gơjrañ kơuềng di khai tai.

⁶ Khai đơs lah: “Añ neh gŏ dô bơta mpau, dan ală bi iat añ yal:

⁷ Bol he ơm tòm ƀlàng cap kòi, dô cap kòi añ gơ ntào, ai cap kòi ală bi dê tus ơm gùt dar, tơmbic să di đap cap kòi añ jê.”

⁸ Gen ală bi khai ho lah: “Mê rơp at bồ bol hi ơ? Mê rơp geh gơnoar hơđang bol hi ơ?” Bol hơ̆ sơlo gơjrañ kơuềng di khai oă tai, tài bơh ală bơta mpau mơ jơnau đơs khai dê.

⁹ Jôsep gŏ dô bơta mpau tai, mơ yal mơ ală bi khai in lah: “Añ gŏ dô bơta mpau tai! Do, mattơngai, kơnhai, mơ jơt dùl nơm sơmañ tus tơmbic să di đap añ.”

¹⁰ Khai yal mpau hơ̆ mè bèp mơ ală bi khai in iat, mơya bèp khai lah pơrhơng mơ lùp: “Bơta mpau mê dê hơ̆ la ñchi taih? Añ, mè mê, mơ ală bi mê rơp tus tơmbic să di đap mê ơ?”

¹¹ Ală bi khai ƀoah gơjrañ di khai, mơya bèp ò hŭi bơta hơ̆.

Ală bi Jôsep sơrbì khai tòm tơrlung

¹² Ală bi Jôsep dê lòt ê mpồl phan poan jơng bèp bol khai dê tòm Sicem.

¹³ Israel đơs mơ Jôsep lah: “Ală bi mê dê ê belàt tòm Sicem sơl? Lòt hơ do nàng añ sồr mê lòt tus hơ bol khai.” Jôsep ho lah: “Do añ.”

¹⁴ Israel sồr khai lah: “Mê lòt tĕ, sền ală bi mê mơ ală mpồl phan mbe lơi, gen yal wơl añ in git.” Behơ̆, bơh thòng Hebrôn khai sồr Jôsep lòt tus hơ Sicem.

¹⁵ Jôsep lòt lềng làng tòm ƀlàng, gơs dô nă cau klau tìp mơ khai, mơ lùp khai lah: “Ñchi mê jòi taih?”

¹⁶ Jôsep ho lah: “Añ jòi ală bi añ jê. Dan sơnio añ in git tiah lơi bol khai ê mpồl phan.”

¹⁷ Khai ho lah: “Ală bi mê neh lòt bơh tềng do rau, tài bơh añ neh kơno bol khai đơs lah: ‘Bol he lòt lă tus hơ Dôthan.’” Behơ̆, Jôsep lòt jòi ală bi khai mơ bàn bol khai tòm Dôthan.

¹⁸ Ală bol hơ̆ gŏ khai gam ngài, òhềt tus rềp, gen tòmbơyai jòi kai gơrmơ̆i nàng tơnchơt khai.

¹⁹ Bol hơ̆ đơs bal lah: “Ne, klau mpau neh tus!

²⁰ Tŭ do bol he tơnchơt tĕ khai, mơ sang tòm dô nơm tơrlung gen bol he rơp yal lah: ‘Khai neh gơtìp phan brê crè sa,’ gen bol he rơp kơp sền ală bơta mpau khai dê rơp gơlik gơs be lơi.”

²¹ Ruben kơno ală jơnau hơ̆, gen dong khai bơh tê bol hơ̆ mơ đơs lah: “Bol he bañ tơnchơt khai.”

²² Mơ khai đơs tai lah: “Bol he bañ lơh gơhòr mhàm, sơrbì tĕ khai tòm tơrlung tòm ƀlàng bràs ne, mơ bañ ƀư di să khai.” Khai đơs behơ̆ tài bơh khai kòñ dong klàs Jôsep bơh tê bol hơ̆ dê, nàng ai wơl Jôsep bèp khai in.

²³ Tòm tŭ Jôsep neh tus mơ ală bi khai dê, gen bol khai hồ ào khai dê, la ào oă bơnga khai gam soh di să.

²⁴ Lồc behơ̆, bol hơ̆ kup khai, cèng sơrbì tòm tơrlung dà.

Tac Jôsep mơ cau Ismael

²⁵ Gen bol khai nggui mơ sào. Bol khai pò mat tơnggòr, gŏ dô bơnòr cau Ismael tus bơh Galaat, hơđang ngkòi làkđa bol khai dê pơdiang phan ƀô bơlhu, sơnơm kơlhô, mơ cài trŭ nàng cèng tus hơ lơgar Ejiptơ.

²⁶ Gen Juda đơs mơ ală oh mi khai lah: “Ñchi kwơ he in dilah he tơnchơt oh he mơ pồn mhàm khai taih?

²⁷ Do, cèng tac tĕ khai mơ cau Ismael, mơ bañ ƀư tê di să khai tài bơh khai la oh he, poac mhàm he dê.” Ală oh mi khai kơno mơ lơh jat jơnau khai đơs.

²⁸ Mơ dơ̆ ală cau kă bro Midian lòt gan, ală bi tă tơngguh Jôsep bơh tơrlung dà, mơ tac khai bàr jơt pet priă mơ cau Ismael, gen bol hơ̆ cèng khai hơ lơgar Ejiptơ.

²⁹ Ruben rê wơl hơ tơrlung, Jôsep ò gam tềng hơ̆ tai, gen crè ào he.

³⁰ Khai rê wơl hơ ală oh khai dê mơ đơs lah: “Oh hơ̆ ò gŏ tai, gen ntềng đah añ rơp lòt taih?”

Jakôp ñìm rac, tồnlah kòn khai neh chơt ngan

³¹ Bol khai siat dô nơm be dam, gen iurŭ ào Jôsep tòm mhàm,

³² mơ pơyoa ào oă bơnga hơ̆ tus hơ bèp bol khai dê mơ sồr đơs lah: “Do la phan bol hi neh bàn. Behơ̆ bèp git ào do la ào kòn klau bèp dê sơl?”

³³ Jakôp đal mơ đơs lah: “Hơ̆ la ào kòn klau añ jê, dô nơm phan brê jàñ bơsak neh kap khai! Ngan Jôsep neh gơkòl crè rpot rpet rau!”

³⁴ Khai crè ào di să he mơ ai ồi dur pùt gùt dar but khai, mơ moat jrùng ñìm rac jŏ ngai bơh kòn klau khai dê.

³⁵ Jơh tơl nă kòn klau kòn ùr khai dê pơjum nàng pơndòm pơniang khai, mơya khai ò bài mơ đơs lah: “Añ kơlôi moat sùm jơl tus di tŭ añ mù tòm lơgar làng ƀồc tus mơ kòn añ!” Behơ̆ bèp Jôsep ñìm rac bơh kòn khai dê.

³⁶ Ală cau kă bro Midian cèng Jôsep tus hơ lơgar Ejiptơ, tac khai mơ Pôtiphar, kwang ling sền gàr Pharaôn dê.