Sơnròp Gơlik Gơs 35 - Sră Goh 2018

Jakôp tơlik sang ală rùp duh khoai bơh tòm hìu

¹ Yàng Tom Trồ đơs mơ Jakôp lah: “Ñă tĕ, guh ơm hơ Betel, mơ lơh tềng hơ̆ dô nơm cơnòng duh khoai Yàng Tom Trồ in, la Bơtau neh tơlik mat mơ mê tòm tŭ mê dô klàs bơh Esau bi mê.”

² Gen Jakôp đơs mơ hìu nhă khai dê mơ jơh ală cau lòt bal mơ khai lah: “Tơlik sang tĕ ală yàng ndai bơh digùl ală bol mê, lơh bol mê in gơs sàng goh mơ bơsoh ào.

³ Gen bol hi ñă, lòt tus hơ Betel, tềng hơ̆ añ rơp lơh dô nơm cơnòng duh khoai Yàng Tom Trồ in, la Bơtau neh ho jơnau añ dan, tòm tŭ añ tìp bơta bòl glar, mơ neh ơm bal mơ añ tòm tŭ lòt gùng.”

⁴ Gen bol khai ai Jakôp in ală rùp ràk yàng làng bol bơdìh mơ bol khai gam gơs mơ ală bơno di tồr, gen khai tơp ală phan hơ̆ di tòm cha rềp Sicem.

Jakôp lơh cơnòng duh khoai di Betel

⁵ Chòp, bol khai lòt gùng, mơ Yàng Tom Trồ tơndùh bơta rngòt rngơt hơđang ală ƀòn gùt dar tềng hơ̆, gen tàng bol khai ò ting jat ală kòn klau Jakôp dê.

⁶ Jakôp mơ ală cau lòt bal mơ khai tus hơ Lus (hơ̆ la Betel) tòm lơgar Kanaan.

⁷ Tềng hơ̆ khai lơh dô nơm cơnòng duh khoai mơ sơnđan tiah hơ̆ la El Betel, bơh tềng hơ̆ Yàng Tom Trồ neh tơlik mat mơ khai tòm tŭ khai dô bơh di bi khai.

⁸ Tŭ hơ̆, Debôra, cau ròng Rebeka chơt mơ tơp hơđơm Betel di tòm cha, tiah hơ̆ cau sơnđan la Alôn Bakut.

⁹ Tòm tŭ khai tus bơh lơgar Padan Aram, Yàng Tom Trồ tơlik mat mơ Jakôp tai, mơ ai lơngai khai in.

¹⁰ Mơ đơs lah: “Sơnđan mê la Jakôp, mơya ò tai sơnđan la Jakôp, mơ rơp sơnđan mê la Israel.” Behơ̆, Kơnràñ tơmoh sơnđan khai in la Israel.

¹¹ Yàng Tom Trồ đơs lah: “Añ la Yàng Tom Trồ Gơnap Gơnoar Làm Jơh, tơnggơs tĕ mơ bơtơl oă, dô nơm làng bol tai rơp bơh mê mơ gơlik gơs, mơ oă cau bơtau rơp bơh să mê mơ lik.

¹² Lơgar Añ neh ai Abraham mơ Isak in, gen Añ rơp ai mê mơ jơi bơtiàn mê in sơl.”

¹³ Gen Yàng Tom Trồ guh bơh di tiah Kơnràñ neh đơs mơ Jakôp.

¹⁴ Khai bơtào dô nơm jrong lŭ di tiah mơ Yàng Tom Trồ neh đơs mơ khai, khai ơn phan pơdơng ñô mơ tuh mơñà hơđang gơ.

¹⁵ Gen Jakôp ai sơnđan tiah Yàng Tom Trồ neh đơs mơ khai la Betel.

Deh Benjamin. – Racel chơt

¹⁶ Bol khai lòt bơh Betel, mơ bol khai gam ngài dô êt bơh Ephrata, gen Racel jê deh. Khai jê oă ngan.

¹⁷ Tòm tŭ Racel deh, cau đơng deh đơs lah: Bañ rngòt, bơh ai rơp gơs dô nă kòn klau tai.

¹⁸ Tòm tŭ Racel mòr tơlik hwềng soàn, tac nhơm. Gen khai sơnđan kòn klau hơ̆ la Benoni, ai bèp khai sơnđan khai la Benjamin.

¹⁹ Behơ̆ Racel chơt, mơ tơp di gah gùng lòt hơ Ephrata, tềng hơ̆ la Betlehem.

²⁰ Jakôp bơtào dô nơm jrong lŭ di bơtô, hơ̆ la jrong lŭ bơtô Racel dê gam jơl ngai do.

²¹ Tơnơ̆ hơ̆, Israel lòt mơ lơh sàl đah ne theng Eder.

²² Tòm tŭ Israel ơm tòm lơgar hơ̆, gen Ruben lòt bic mơ Bilha, bau cồng bèp khai dê, mơ Israel git bơta hơ̆.

Jơt bàr nă kòn klau Jakôp dê

²³ Jakôp gơs jơt bàr nă kòn klau. Ală kòn klau Lea dê la Ruben, kòn tơnhoa Jakôp dê, Simeôn, Lebi, Juda, Issaka mơ Jebulun.

²⁴ Ală kòn klau Racel dê la Jôsep mơ Benjamin.

²⁵ Mơ ală kòn Bilha dê, cau dĭ ùr Racel dê, la Dan mơ Neptali.

²⁶ Ală kòn klau Silpa dê, cau dĭ ùr Lea dê la Gat mơ Aser. Ală cau hơ̆ la ală kòn klau Jakôp dê, deh tòm Padan Aram.

Isak chơt

²⁷ Jakôp tus hơ Isak, bèp khai dê, tòm Mamre, tòm ƀòn Kiriat Arba, hơ̆ la Hebrôn, di tiah Abraham mơ Isak neh ơm ing.

²⁸ Rài kis Isak dê la dô rhiang phàm jơt nam.

²⁹ Mơ Isak jŏ nam kra, tac nhơm chơt, mơ rê tus hơ mò pàng khai dê. Esau mơ Jakôp, bàr nă kòn klau khai dê, tơp khai.