Sơnròp Gơlik Gơs 33 - Sră Goh 2018

Jakôp mơ Esau lơh gơtòmsòr wơl

¹ Jakôp tơnggòr sền, ne, Esau tus bal mơ poan rhiang cau klau. Gen khai cah is ală kòn Lea, Racel, mơ bàr nă dĭ ùr in.

² Khai rơndap bàr nă dĭ ùr mơ ală kòn bol khai lòt lài, Lea mơ kòn khai lòt tơnơ̆, mơ lồi dut Racel mơ Jôsep.

³ Ai khai lòt lài mơ bol hơ̆ mơ tơmbic să poh dơ̆ jơl tus di khai tus rềp mơ bi khai.

⁴ Mơya Esau ntoat tus di đap khai, mơ koar di ngko mơ cum khai, gen bàr nă bol khai ñìm bal.

⁵ Gen Esau tơnggòr gŏ ală cau ùr mơ ală kòn, gen khai lùp lah: “Ală cau bal mơ mê hơ̆ la ñcau taih?” Khai ho lah: “Hơ̆ la ală kòn mơ Yàng Tom Trồ neh ai cau dĭ bi in.”

⁶ Bàr nă dĭ ùr mơ ală kòn klau khai lòt rềp mơ tơmbic să.

⁷ Lea mơ ală kòn khai kung lòt rềp mơ tơmbic să, tơnơ̆ mơ hơ̆, Jôsep mơ Racel lòt rềp mơ tơmbic să.

⁸ Esau lùp lah: “Ñchi mê kòñ lơh mơ mpồl phan añ neh tìp lòt lài taih?” Khai ho lah: “Hơ̆ nàng geh bơta nđàc di đap kơnràñ añ.”

⁹ Esau đơs lah: “Ơ oh, añ neh geh tơl rau, behơ̆ ai wơl tĕ ală phan mê dê.”

¹⁰ Khai ho lah: “Ơ bi, ò di behơ̆, dilah añ neh geh bơta nđàc di đap bi, dòp tĕ phan bơh di tê añ, bơh añ gŏ mat bi be cau gŏ mat Yàng Tom Trồ, mơ bi neh niam nùs wă rò añ.

¹¹ Dan bi dòp tĕ phan añ ai bi in bơh Yàng Tom Trồ ai añ in bơta nđàc, mơ bơh añ gơs tơl.” Khai kư̆ pơnđơl gen Esau dòp gơ.

¹² Esau đơs lah: “Bol he lòt gùng lă! Añ rơp lòt lài mơ mê.”

¹³ Mơ Jakôp đơs lah: “Bi git lah ală kòn dềt òsô, mơ ală mpồl belàt mơ mpồl kơnrồ bal mơ añ gơ gơs kòn se, dilah he bơklơn gơ lòt gùng mhar tòm dô ngai, gen chơt jơh ală mpồl gơ.

¹⁴ Dan bi lòt lài mơ cau dĭ bi dê, ai añ rơp lòt rlĕ adàr, jat be cơnđòa ală mpồl lòt lài mơ añ, mơ jat be cơnđòa ală kòn dềt dê, jơl tus di tŭ lơi tus di hìu bi tòm Seir.”

¹⁵ Esau đơs: “Behơ̆ añ dan lòi wơl mê in dô êt cau añ jê ơm bal mơ mê.” Jakôp ho lah: “Ñchi behơ̆? Mìng añ geh bơta nđàc di đap bi la di rau.”

¹⁶ Tòm ngai hơ̆ Esau rê wơl hơ Seir.

Jakôp tus hơ Sukôt mơ lơh sàl tòm toh di ƀòn Sicem

¹⁷ Jakôp lòt tus hơ Sukôt, gen khai lơh dô nơm hìu ơm, mơ ală wàng phan poan jơng in gen tàng cau sơnđan tiah hơ̆ la Sukôt.

¹⁸ Jakôp lòt bơh lơgar Padan Aram tus hơ ƀòn Sicem tòm lơgar Kanaan, mơ geh lơngap lơngai. Khai lơh sàl tòm toh ƀòn hơ̆.

¹⁹ Gen khai blơi bơh di ală kòn Hamor, bèp Sicem dê, tiah khai lơh sàl dô rhiang pet priă.

²⁰ Tềng hơ̆, khai lơh dô nơm cơnòng duh khoai mơ sơnđan la El Elôhe Israel.