Sơnròp Gơlik Gơs 30 - Sră Goh 2018

Bilha deh Dan mơ Neptali

¹ Dơ̆ Racel gŏ khai ò deh kòn Jakôp in, gen khai ƀoah di bi ùr khai, mơ đơs mơ Jakôp lah: “Ai tĕ añ in kòn, dilah ò gen añ chơt.”

² Jakôp gơhào nùs di Racel mơ đơs lah: “Añ ala Yàng Jehôwa mơ ò ai ai in kòn ơ?”

³ Racel đơs lah: “Do, Bilha, dĭ ùr añ jê, ơm tĕ bal mơ khai nàng khai deh kòn di gơltang añ jê tồ bơh khai añ kung gơs kòn sơl.”

⁴ Behơ̆, Racel ai Bilha Jakôp in nàng bau. Mơ khai ơm bal mơ Bilha.

⁵ Bilha bun, deh dô nă kòn klau Jakôp in.

⁶ Racel đơs lah: “Yàng Tom Trồ neh cahrña song ring añ in, kơno jơnau añ mơ ai añ in dô nă kòn klau,” bơh hơ̆ khai sơnđan kòn klau hơ̆ la Dan.

⁷ Bilha dĭ ùr Racel bun tai, mơ deh dô nă kòn klau dơ̆ bàr Jakôp in.

⁸ Racel đơs lah: “Añ neh tòmdră ngan mơ bi ùr añ, mơ añ neh geh pha,” tài bơh hơ̆ khai sơnđan kòn klau do lah Neptali.

Silpa deh Gat mơ Aser

⁹ Lea gŏ khai jơh bun gen khai ai Silpa, dĭ ùr khai di Jakôp in bau.

¹⁰ Mơ Silpa dĭ ùr Lea dê deh dô nă kòn klau Jakôp in.

¹¹ Lea đơs lah: “Lơngai lơngò ngan!” Gen sơnđan kòn klau hơ̆ la Gat.

¹² Silpa dĭ ùr Lea dê deh dô nă kòn klau dơ̆ bàr Jakôp in,

¹³ gen Lea đơs lah: “Añ gơs nùs chò hòp, bơh hơ̆ tàng ală cau ùr rơp đơs añ la cau chò hòp, mơ sơnđan kòn klau hơ̆ la Aser.

Lea deh Issaka, Jebulun mơ Dina

¹⁴ Tus di kơnhai toès kòi brà, Ruben lik lòt tòm ƀlàng sre gŏ ală plai phồng ya mơ cèng ai Lea mè khai in. Gen Racel đơs mơ Lea lah: Dan ai añ in ală plai phồng ya kòn ai dê.”

¹⁵ Lea đơs lah: “Ai tòmpìt bau añ la dô nơm broă dềt ơ, mơ ai kung kòñ ai plai phồng ya kòn klau añ jê tai ơ?” Racel ho lah: “Do, bau añ rơp bic mơ ai tòm mang do nàng gơl plai phồng ya kòn ai dê.”

¹⁶ Tus di mho, Jakôp rê bơh ƀlàng sre, gen Lea lòt tus mơ khai mơ đơs lah: “Mê lòt tus tĕ mơ añ bơh añ neh ơpah mê mơ plai phồng ya kòn añ jê.” Behơ̆, mang hơ̆ Jakôp bic mơ khai.

¹⁷ Yàng Tom Trồ dòp jơnau Lea dê, khai bun, deh Jakôp in dô nă kòn klau dơ̆ pram

¹⁸ Lea đơs lah: “Yàng Tom Trồ neh ai jền tơngai añ in tài bơh añ neh ai dĭ ùr bau klau añ in,” behơ̆ khai sơnđan kòn klau hơ̆ la Issaka.

¹⁹ Lea bun tai, deh dô nă kòn klau dơ̆ prau Jakôp in.

²⁰ Gen khai đơs lah: “Yàng Tom Trồ neh ai añ in dô bơta dờng màng, dơ̆ do bau añ rơp ơm bal mơ añ bơh añ neh deh khai in prau nă kòn klau rau.” Khai sơnđan kòn klau hơ̆ la Jebulun.

²¹ Tơnơ̆ mơ hơ̆ khai deh dô nă kòn ùr, mơ sơnđan la Dina.

Racel deh Jôsep

²² Yàng Tom Trồ kah wơl Racel, gen dòp jơnau khai mơ ai khai in gơs kòn.

²³ Khai bun, deh dô nă kòn klau mơ đơs lah: “Yàng Tom Trồ neh tă bơta ƀàssìl añ jê rau.”

²⁴ Gen khai sơnđan kòn klau hơ̆ la Jôsep mơ đơs lah: “Dan Yàng Jehôwa bơtơl añ in tai dô nă kòn klau.”

Jơnau ho bal Laban mơ Jakôp dê

²⁵ Tòm tŭ Racel neh deh Jôsep gen Jakôp đơs mơ Laban lah: “Dan kồñ ai añ in rlô nàng rê hơ lơgar añ.

²⁶ Dan ai añ in ală bau mơ kòn mơ añ neh geh tài bơh añ lơh broă kồñ in, mơ ai añ in rê, bơh kồñ git be lơi añ neh lơh broă kồñ in.”

²⁷ Laban đơs lah: “Dan añ in geh bơta nđàc di đap mê. Añ gŏ loh làng Yàng Jehôwa bơh mê mơ neh ai lơngai añ in.”

²⁸ Khai đơs tai lah: “Mê kòp tĕ jền tơngai mê dê gen añ rơp ai mê in.”

²⁹ Jakôp đơs lah: “Kồñ git be lơi añ neh lơh broă kồñ in, mơ be lơi gơlik gơs phan poan jơng kồñ in bơh di añ.

³⁰ Lài mơ tŭ añ òhềt tus, ală phan poan jơng kồñ dê gơs dô êt lơm, mơya bơh di tŭ añ tus mơ ơm gen gơbơtơl oă ngan. Yàng Jehôwa neh ai lơngai kồñ in tòm ală cơnđòa lòt añ jê. Tŭ lơi añ rơp rcang lơh broă hìu añ jê taih?”

³¹ Laban ho lah: “Ñchi añ rơp ai mê in taih?” Jakôp ho lah: “Kồñ rơp ò gơs ai bơta lơi añ in. Dilah kồñ jat be jơnau do, gen añ rơp ê gàr mơ ròng siam ală mpồl phan kồñ dê tai sơl.

³² Ngai do, añ rơp lòt sền đal ală mpồl phan kồñ dê mơ ơn is bơh di ală mpồl belàt, ală belàt gơs sơnràng mơ gơs làng mơ jơh ală belàt jù, mơ bơh di ală mpồl be, añ ơn is ală be gơs sơnràng mơ gơs làng, hơ̆ la jền tơngai añ jê.

³³ Tòm tŭ kồñ lòt sền gŏ jền tơngai añ jê gen nùs song añ rơp lơh cơng di đap kồñ. Dilah tòm phan đah mơ añ, gơs ală be lơi ò gơs làng mơ sơnràng, ală kòn belàt lơi ò jù gen rơp la phan kơñau.”

³⁴ Laban đơs lah: “Behơ̆, di be jơnau mê đơs.”

³⁵ Tòm ngai hơ̆ laban lòi is ală be dam gơs sơnràng mơ gơs làng, ală phan lơi gơs lèl bò mơ ală kòn belàt jù, mơ ai gơ ală kòn klau khai in.

³⁶ Lồc behơ̆, khai ơm ngài mơ Jakôp pơgap pe ngai lòt gùng; gen Jakôp ê gàr ală mpồl phan Laban gam wơl.

³⁷ Jakôp ai ntê chi ris bơh di tòm rdàp, ntê chi tòm gus, mơ tòm jrê, mơ còr lơh ală cơnòr bò tòm gơ.

³⁸ Khai ai ală ntê chi khai neh còr gơs cơnòr ơn tòm bòng dà belàt dê, la di tiah ală phan tus hùc dà, tòm tŭ gơ tus hùc dà gen di di tŭ ală belàt tòmjă.

³⁹ Ală belàt gơs bun tòm tŭ gŏ ală ntê chi hơ̆ gen deh kòn belàt gơs sơnràng, gơs rtep rtèl mơ gơs làng.

⁴⁰ Jakôp lòi is kòn belàt, gen lòi ală belàt me tòm mpồl Laban dê tòm toh mơ ală belàt gơs sơnràng mơ jù, mơya mpồl khai dê ơn is, ò ơn rềp mơ mpồl Laban dê.

⁴¹ Mơ kòp dơ̆ ală belàt pràn kơldang di sơnam bun, gen Jakôp ơn ală ntê chi hơ̆ tòm bòng dà di đap mat bol gơ nàng bol gơ in tòmjă tòm toh di đap ntê chi.

⁴² Mơ tŭ lơi ală belàt òsô, gen khai ò ơn ntê hơ̆, behơ̆ ală belàt òsô gơrê đah mơ Laban, ai ală belàt pràn kơldang gơrê đah mơ Jakôp.

⁴³ Behơ̆ khai gơlik pas sơm ngan, gơs oă mpồl phan poan jơng, dĭ ùr, dĭ klau, làkđa mơ alàng.