Sơnròp Gơlik Gơs 29 - Sră Goh 2018

Jakôp bau mơ Lea mơ Racel, kòn Ùr Laban dê

¹ Gen Jakôp lòt gùng tus hơ lơgar làng bol đah mattơngai lik dê.

² Khai sền gŏ dô nơm tơrlung dà tòm ƀlàng sre, rềp tềng hơ̆ gơs pe mpồl belàt ơm rlô, bơh tềng do la tiah cau ai ală mpồl belàt in hùc dà. Pơnai lŭ dơp bơr tơrlung dà la dờng ngan.

³ Ală mpồl belàt pơjum bal tềng hơ̆, gen cau ê pơrlac pơnai lŭ bơh di bơr tơrlung mơ ai ală mpồl belàt in hùc dà, gen bol khai pơrlac pơnai lŭ dơp wơl di bơr tơrlung dà.

⁴ Jakôp lùp ală cau ê belàt lah: “Ơ ală oh mi! Ntềng đah bol mê ơm taih?” Bol khai ho lah: “Bol hi ơm tòm Caran.”

⁵ Khai lùp tai lah: “Bol mê git Laban kòn klau Nakôr sơl?” Bol khai ho lah: “Bol hi git.”

⁶ Khai lùp tai lah: “Cau hơ̆ niam să sơl?” Bol khai ho lah: “Khai niam să, ne, Racel, kòn ùr khai lòt tus mơ mpồl belàt ne.”

⁷ Khai đơs lah: “Do, mattơngai gam duh ir, òhềt di tŭ nàng pơjum bal ală phan poan jơng, behơ̆ bol mê ai tĕ mpồl belàt in hùc dà gen ai bol gơ in lòt sa.”

⁸ Bol khai ho lah: “Bol hi lơh behơ̆ ò di, bol hi pal gơn ală mpồl pơjum wơl tơl jơh rau, gen sồng pơrlac pơnai lŭ bơh di bơr tơrlung dà mơ ai ală mpồl belàt in hùc dà.”

⁹ Mơ tòm tŭ khai gam tòmbơhbơr mơ bol hơ̆, gen Racel lam mpồl belàt bèp khai lòt tus, bơh khai la cau ê belàt.

¹⁰ Dơ̆ khai gŏ Racel, kòn ùr Laban, bi mè khai dê, gen khai lòt rềp, pơrlac pơnai lŭ bơh di bơr tơrlung dà mơ ai mpồl belàt Laban, bi mè khai dê, hùc dà.

¹¹ Jakôp cum Racel mơ ñìm.

¹² Lồc behơ̆ Jakôp yal Racel git khai la jơi bơtiàn mơ bèp khai, hơ̆ la kòn klau Rebeka dê. Gen Racel ntoat rê yal bèp khai in.

¹³ Dơ̆ Laban kơno jơnau yal bơh Jakôp, kòn klau oh ùr khai dê, gen Laban ntoat tus di khai, koar mơ cum khai, gen jà mut tòm hìu. Jakôp yal Laban ală broă do.

¹⁴ Gen Laban đơs lah: “Ngan behơ̆, mê la poac mhàm añ jê.” Gen Jakôp ơm mơ khai dô kơnhai.

¹⁵ Chòp, Laban đơs mơ Jakôp lah: “Tài bơh mê la jơi bơtiàn añ jê, mê lơh gòi broă añ in sơl ơ? Nđò jền tơngai, yal añ in git.”

¹⁶ Mơ Laban gơs bàr nă kòn ùr, kòn dờng sơnđan la Lea, kòn dềt sơnđan la Racel.

¹⁷ Mơ Lea lơbơn mat, ai Racel la hàng mơnĕ ngan.

¹⁸ Jakôp kòñ gơboh di Racel gen đơs lah: “Bơh Racel, kòn put kồñ, añ rơp lơh broă kồñ in tòm poh nam.”

¹⁹ Laban ho lah: “Chan ai khai mê in la niam rlau mơ ai khai cau ndai in, ơm tĕ mơ añ.”

²⁰ Behơ̆, tài bơh Racel, Jakôp pal lơh broă poh nam, mơ tài bơh khai kòñ gơboh di Racel gen khai sền poh nam kung be bàr pe ngai.

²¹ Tơnơ̆ mơ hơ̆ Jakôp đơs mơ Laban lah: “Tơngai añ neh tơl rau, dan kồñ ai añ in bau, tồ añ in ơm bal mơ khai.”

²² Gen Laban jà jơh ală cau tòm ƀòn mơ lơh dô bơta ñô sa.

²³ Tus di mho, Laban ai Lea kòn ùr khai, ai Jakôp in, gen khai lòt tus hơ Lea.

²⁴ Laban ai Lea in, la kòn ùr khai dê, dĭ ùr la Silpa, nàng lơh broă khai in.

²⁵ Àng drim hìng sồng khai git la Lea, gen Jakôp lùp Laban lah: “Ñchi kồñ neh lơh añ in behơ̆ taih? Tài bơh Racel mơ añ neh lơh broă tòm hìu nhă kồñ in ò ơ? Tài bơh ñchi kồñ pơrlồm añ taih?”

²⁶ Laban ho lah: “Jat be tềng do ò di ai kòn put lài mơ kòn tơnhoa nàng bau.

²⁷ Ơm tĕ bal mơ cau do tơl dô poh, gen añ rơp ai mê in cau ne nàng bau tai, mơ bơh cau ne mê pal lơh broă añ in bơtơl poh nam tai.”

²⁸ Jakôp lơh jat jơnau hơ̆, ơm bal mơ Lea tơl dô poh gen Laban ai khai in Racel, kòn ùr khai nàng bau.

²⁹ Mơ Laban ai Racel in, la kòn ùr khai dê, dĭ ùr la Bilha nàng lơh broă khai in.

³⁰ Jakôp ơm bal mơ Racel, kòñ gơboh di khai rlau mơ Lea. Behơ̆, khai ơm lơh broă Laban in poh nam tai.

Lea deh poan nă kòn klau Jakôp in

³¹ Yàng Jehôwa gŏ Lea gơtìp bơta ò sòc sòr gen ai khai in deh kòn, ai Racel gen kơnền.

³² Lea bun, deh dô nă kòn klau sơnđan la Ruben, bơh khai đơs lah: “Yàng Jehôwa neh gŏ bơta bòl glar añ, tŭ do bau añ rơp kòñ gơboh di añ.”

³³ Khai bun tai, deh dô nă kòn klau sơnđan la Simeôn, bơh khai đơs lah: “Yàng Jehôwa neh kơno añ gơtìp bơta ò sòc sòr gen ai bơtơl dô nă kòn klau do.”

³⁴ Khai bun tai mơ deh dô nă kòn klau, khai đơs lah: “Dơ̆ do bau añ rơp đềt mềr mơ añ bơh añ neh deh khai in pe nă kòn klau,” tài bơh hơ̆ sơnđan kòn klau hơ̆ la Lebi.

³⁵ Khai bun tai, deh dô nă kòn klau mơ đơs lah: “Dơ̆ do añ jòng ro Yàng Jehôwa,” tài bơh hơ̆ khai sơnđan kòn klau hơ̆ la Juda. Gen khai ò bun tai.