Sơnròp Gơlik Gơs 26 - Sră Goh 2018

Isak gơtìp bơta jơgloh rung lòt hơ Gerar

¹ Bơh jơgloh rung sơnròp tòm rài Abraham, tŭ do tòm lơgar gơlik gơs dô dơ̆ tai. Gen Isak lòt tus hơ Abimelek, bơtau Philistin, tòm Gerar.

² Yàng Jehôwa tơlik mat mơ khai mơ đơs lah: “Bañ lòt hơ lơgar Ejiptơ, ơm tĕ tòm lơgar Añ rơp sơnio mê in.

³ Ơm ing tòm lơgar do, Añ rơp ơm mơ mê, ai lơngai mê in, mơ Añ rơp ai mê mơ jơi bơtiàn mê in jơh ală lơgar do, mơ rơp gơlik tòm toh be jơnau Añ neh ho bal mơ Abraham bèp mê.

⁴ Añ rơp bơtơl jơi bơtiàn mê in oă be sơmañ hơđang trồ, rơp ai bol khai in jơh ală ù tiah do, jơh ală làng bol tòm dunnia rơp kơnòm di jơi bơtiàn mê mơ geh lơngai,

⁵ tài bơh Abraham neh dòn bơr Añ mơ neh kơrmap gàr ală bơta Añ bơto sồr, jơnau sồr mơ bơta boh lam Añ jê.”

Rebeka mơ bơtau Abimelek

⁶ Behơ̆, Isak ơm tòm Gerar.

⁷ Bơh Rebeka la hàng mơnĕ gen tàng tŭ cau klau ƀòn hơ̆ lùp Isak bơh bau khai, gen Isak ho lah: “Cau hơ̆ la oh ùr añ,” bơh khai rngòt dilah khai đơs cau hơ̆ la bau ùr khai, gen bol hơ̆ rơp tơnchơt khai.

⁸ Dô ngai ne, tòm tŭ Isak ơm tòm lơgar Philistin, Bơtau Abimelek tơnggòr bơh mpồng dềt, gŏ Isak kơnhơl mơ Rebeka, bau khai.

⁹ Gen Abimelek hòi Isak mơ đơs lah: “Ngan hơ̆ la bau mê, ñchi bơh tài mê neh đơs: ‘Hơ̆ la oh ùr añ’ taih?” Isak ho lah: “Bơh añ đơs: Bañ bơh cau ùr hơ̆ mơ añ chơt.”

¹⁰ Abimelek lùp lah: “Ñchi mê lơh dê bol hi taih? Dilah dô nă cau lòt tus bic mơ bau mê gen mê lơh bol hi in gơlik gơs glài.”

¹¹ Gen Abimelek sồr jơh làng bol lah: “Cau lơi ƀư di cau klau do hala di bau ùr khai gen rơp chơt.”

Isak geh lơngai

¹² Isak sih gar sơntìl tòm lơgar hơ̆, nam hơ̆ toès gơlik dô rhiang cồng, bơh Yàng Jehôwa neh ai lơngai lơngò khai in.

¹³ Khai gơlik gơs pas sơm, phan mơna kòp ngai sơlo bơtơl oă tai jơl tus khai gơlik pas sơm oă ngan.

¹⁴ Khai gơs oă mpồl kơnrồ, mơ cau dĭ oă ngan, tài bơh hơ̆ làng bol Philistin ƀoah.

¹⁵ Ală tơrlung dà bơh tŭ lài cau dĭ Abraham, bèp khai dê, neh tò, làng bol Philistin bồr jơh.

¹⁶ Abimelek đơs mơ khai lah: “Lik tĕ bơh di bol hi, bơh mê la pràn rlau mơ bol hi oă ngan.”

¹⁷ Behơ̆ Isak sang tiah do lòt tus hơ thòng Gerar lơh sàl mơ ơm tềng hơ̆.

¹⁸ Gen Isak tò wơl ală tơrlung dà cau neh tò tòm rài Abraham bèp khai dê, mơ làng bol Philistin neh bồr tòm tŭ Abraham chơt, mơ sơnđan ală tơrlung hơ̆ be sơnđan bèp khai neh sơnđan.

¹⁹ Ală cau dĭ Isak tò tai tòm thòng mơ gŏ dô nơm tơrlung dà cat.

²⁰ Mơya cau ê belàt Gerar tòmpìt mơ cau ê belàt Isak dê, mơ đơs lah: “Hơ̆ la dà bol hi dê,” gen khai sơnđan tơrlung hơ̆ la Esek. Bơh cau ê belàt hơ̆ neh tòmpìt mơ khai.

²¹ Ală cau dĭ tò dô nơm tơrlung ndai, gen kung tòmpìt tai sơl; khai sơnđan tơrlung do la Sitna.

²² Gen khai sang tiah hơ̆ lòt tò dô nơm tơrlung ndai, mơ tơrlung do bol khai ò tòmpìt tai, gen khai sơnđan la Rehôbôt, mơ đơs lah: “Tŭ do Yàng Jehôwa neh lòi bol hi in gơs tiah ơm, mơ bol hi rơp gơlik cồng nha tòm lơgar.”

Yàng Tom Trồ ho bal mơ Isak

²³ Isak bơh hơ̆ lòt hơ Beerseba.

²⁴ Mang hơ̆ Yàng Jehôwa tơlik mat mơ khai, mơ đơs lah: “Añ la Yàng Tom Trồ Abraham bèp mê dê, bañ rngòt, bơh Añ ơm bal mơ mê, Añ rơp ai lơngai mê in mơ bơtơl jơi bơtiàn mê in, tài bơh Abraham cau dĭ gơna Añ jê.”

²⁵ Isak lơh dô nơm cơnòng duh khoai hòi dan di sơnđan Yàng Jehôwa mơ lơh sàl tềng hơ̆. Mơ ală cau dĭ tò dô nơm tơrlung dà ndai tai.

Isak mơ Abimelek tòmho bal

²⁶ Bơtau Abimelek bơh Gerar lòt còp Isak, gơs Ahusat, oh mi bơyô khai, mơ Pikôl, cau gơnoar dờng at bồ ling khai dê lòt jat.

²⁷ Isak lùp lah: “Bol mê gơjrañ kơuềng dê añ, neh bơtrơh añ bơh tiah bol mê, ñchi bơh tài bol mê kòñ lòt tus hơ añ taih?”

²⁸ Bol khai ho lah: “Bol hi neh gŏ loh làng Yàng Jehôwa ơm bal mơ mê, gen bol hi đơs bal lah: Pal gơs dô jơnau ho bal digùl hi mơ mê, ai bol hi in lơh bơta ho bal mơ mê!

²⁹ Ho bal tĕ lah mê ò tŭ lơi lơh iơh di bol hi, be bol hi neh ò ƀư di mê, mìng sồr niam mê mơ lòi mê lòt lơngap lơngai. Tŭ do mê geh Yàng Jehôwa ai lơngai mê in.”

³⁰ Isak yò bơta ñô sa, mơ ală bol khai ñô sa bal.

³¹ Ngai hìng, bol khai guh bơh drim, bơtào jơnau ho bal. Gen Isak lòt jun bol hơ̆ rê lơngap lơngai.

³² Mơ tòm ngai hơ̆, ală cau dĭ Isak tus yal khai in bơh tơrlung bol khai neh tò, lah: “Bol hi neh gŏ gơs dà.”

³³ Gen bol khai sơnđan tơrlung hơ̆ la Siba. Tài bơh hơ̆ gen sơnđan ƀòn hơ̆ la Beerseba jơl ngai do.

Esau bau

³⁴ Tòm tŭ Esau neh tơl poan jơt sơnam gen khai bau mơ Judit kòn ùr Beeri cau Het mơ Basmat kòn ùr Elôn cau Hetit.

³⁵ Bàr nă ƀan hơ̆ la dô bơta sràt bơtang tòm nùs Isak mơ Rebeka in.