Sơnròp Gơlik Gơs 17 - Sră Goh 2018

Yàng Tom Trồ tòmgơl sơnđan Abram la Abraham

¹ Tòm tŭ Abram neh tơl sin jơt sin nam, gen Yàng Jehôwa tơlik mat mơ khai mơ đơs lah: “Añ la Yàng Tom Trồ Gơnap Gơnoar Làm Jơh, mê lòt tĕ di đap Añ mơ lơh gơs dô nă cau wil tơl.

² Añ rơp lơh bơta ho bal digùl Añ mơ mê, mơ rơp lơh jơi bơtiàn mê in gơs rơ̆sơmpài ràipơjềng ò git lơh.”

³ Gen Abram tơmbic să tòm ù, mơ Yàng Tom Trồ đơs mơ khai lah:

⁴ “Do, đah mơ Añ, Añ neh lơh bơta ho bal mơ mê, mê rơp gơlik gơs bèp oă làng bol dê.

⁵ Cau ò tai sơnđan mê la Abram, mơ rơp sơnđan mê la Abraham, bơh Añ sơnđan mê la bèp oă làng bol dê.

⁶ Añ rơp lơh mê in tơnggơs oă ngan, lơh mê in gơlik gơs oă lơgar, mơ ală bơtau rơp bơh mê mơ gơs.

⁷ Añ rơp lơh bơta ho bal digùl Añ mơ mê, mơ jơi bơtiàn mê tòm ală rài bol khai dê, do la dô bơta ho bal kòp rài gam sùm sùm, tồ Añ lơh gơs Yàng Tom Trồ mê mơ jơi bơtiàn mê dê sơl.

⁸ Añ rơp ai mê mơ jơi bơtiàn mê in lơgar mơ mê ơm ing, hơ̆ la làm lơgar Kanaan, lơh gơs sre brê kòp rài gam sùm sùm, mơ Añ rơp lơh gơs Yàng Tom Trồ bol khai dê.”

Sơntòm bơta siat gơltau

⁹ Yàng Tom Trồ đơs mơ Abraham lah: “Pơnah đah mê mơ jơi bơtiàn mê dê rơp prap gàr bơta ho bal Añ jê tòm kòp rài bol mê dê.

¹⁰ Do la bơta ho bal Añ jê mơ rơp prap gàr digùl Añ mơ mê mơ ală jơi bơtiàn tơnơ̆ mê tai, hơ̆ la kòp nă cau klau pal rơp siat gơltau.

¹¹ Ală bol mê pal siat gơltau, bơta hơ̆ rơp la dô nơm tềl bơta ho bal digùl Añ mơ ală bol mê.

¹² Tòm ală rài, kòp nă cau klau tòm ală bol mê bulah deh tòm hìu hala ai jền blơi bơh cau bơdìh, ò di bal mơ jơi bơtiàn mê dê, tòm tŭ neh tơl phàm ngai rau, gen pal siat gơltau.

¹³ Kòn klau lơi deh tòm hìu mê, mơ cau klau lơi mê blơi mơ jền, gen siat tĕ gơltau: behơ̆ bơta ho bal Añ jê rơp gam sùm sùm tòm poac să ală bol mê dê.

¹⁴ Dô nă cau klau lơi ò bài kong siat gơltau tòm poac să khai dê gen rơp bơtrơh tơlik bơh làng bol khai dê, cau hơ̆ la cau gơltac bơta ho bal Añ jê.”

Yàng Tom Trồ ho ai Isak Abraham mơ Sara in

¹⁵ Yàng Tom Trồ đơs mơ Abraham lah: “Ai Sarai bau mê, bañ sơnđan la Sarai tai, mơya sơnđan khai la Sara.

¹⁶ Añ rơp ai lơngai khai in, mơ bơh di khai Añ rơp ai mê in dô nă kòn klau. Añ rơp ai lơngai khai in, mơ bơh khai rơp gơlik gơs oă làng bol; ală cau bơtau ală làng bol dê rơp bơh khai mơ gơlik gơs.”

¹⁷ Gen Abraham tơmbic să tòm ù, khai ñŏ mơ đơs tòm nùs lah: “Gơs dô nă cau neh tơl dô rhiang nam rau mơ tơnggơs dô nă kòn klau di sơl? Ai Sara neh sin jơt nam, rơp deh di sơl?”

¹⁸ Abraham đơs mơ Yàng Tom Trồ lah: “Ơi, dan Ismael geh kis di đap Kơnràñ!”

¹⁹ Yàng Tom Trồ đơs lah: “Ò di behơ̆, Sara, bau mê rơp deh dô nă kòn klau, mê rơp sơnđan la Isak. Añ rơp lơh bơta ho bal mơ khai, nàng lơh bơta ho bal kòp rài gam sùm sùm jơi bơtiàn khai in.

²⁰ Añ kung dòp jơnau mê hòi dan Ismael in. Añ ai lơngai khai in, rơp lơh khai in tơnggơs rơ̆sơmpài ràipơjềng. Khai rơp tơnggơs jơt bàr nă kòn bơtau, mơ Añ rơp lơh khai in gơlik gơs dô nơm lơgar dờng.

²¹ Mơ Añ rơp lơh bơta ho bal Añ jê mơ Isak, mơ Sara rơp deh mê in tòm nam dă, kơnhai do.”

²² Dơ̆ Yàng Tom Trồ neh đơs sir mơ khai rau, gen Kơnràñ guh bơh dê Abraham.

²³ Abraham ai Ismael, kòn klau khai dê, mơ jơh ală cau klau tòm hìu, deh tòm hìu hala blơi mơ jền, mơ tòm ngai hơ̆ khai siat gơltau bol khai in jat be jơnau Yàng Tom Trồ neh sồr.

²⁴ Abraham neh tơl sin jơt sin nam tòm tŭ khai siat gơltau.

²⁵ Ai Ismael, kòn klau khai dê, tơl jơt pe nam tòm tŭ khai siat gơltau.

²⁶ Mơ tòm dô ngai hơ̆ Abraham mơ Ismael, kòn klau khai dê siat gơltau.

²⁷ Mơ tơl nă cau klau tòm hìu, bulah deh tòm hìu hala blơi mơ jền bơh cau bơdìh, siat gơltau bal mơ khai.