Sơnròp Gơlik Gơs 10 - Sră Goh 2018

Jơi bơtiàn ală kòn klau Nôe dê

¹ Do la jơi bơtiàn Sem, Cam mơ Japhet, pe nă kòn klau Nôe dê, bol khai tơnggơs kòn sau, tơnơ̆ mơ tŭ dà kŏ.

Jơi bơtiàn Japhet dê

² Ală kòn klau Japhet dê, la Gômer, Magok, Madai, Jaban, Tubal, Mesek, mơ Tiras.

³ Mơ ală kòn klau Gômer dê la Askena, Riphat, mơ Tôgarma.

⁴ Mơ ală kòn klau Jaban dê la Elisa, Tarsis, Kittim, mơ Dôdanim.

⁵ Bơh bol khai mơ gơs ală cau ơm tòm ală bồt pơlào ală làng bol dê, cah is tòm ală lơgar pơnjat ală jơnau đơs, ală hìu nhă mơ ală làng bol bol khai dê.

Jơi bơtiàn Cam dê

⁶ Ală kòn klau Cam dê la Kus, Ejiptơ, Put, mơ Kanaan.

⁷ Ală kòn klau Kus la Seba, Habila, Sapta, Raema mơ Sapteka; ală kòn klau Raema la Seba mơ Dedan.

⁸ Kus tơnggơs Nimrôt, khai la cau sơnròp gơs gơnoar pràn tòm ù.

⁹ Khai la cau jak mòc khin cha di đap Yàng Jehôwa. Tài bơh hơ̆ gơs jơnau đơs lah: “Be Nimrôt, dô nă cau jak mòc khin cha di đap Yàng Jehôwa!”

¹⁰ Sơnròp lơgar bơtau khai dê gơs Babel, Erek, Akat mơ Kalne tòm lơgar Sinear.

¹¹ Bơh lơgar hơ̆ khai lòt tus hơ lơgar Asiri, gen bơt bơtào Ninibe, Rehôbôt Hir, Kalah,

¹² mơ Resen la ƀòn dờng ngan digùl Ninibe mơ Kalah.

¹³ Ejiptơ la ồng pàng cau Ludim, Anamim, Lehabim, Naptuhim.

¹⁴ Patrusim, Kasluhim (bơh hơ̆ tơnggơs cau Philistin), mơ Kaptôrim.

¹⁵ Kanaan tơnggơs Sidôn, la kòn tơnhoa khai, mơ Het,

¹⁶ mơ cau Jebusit, cau Amôrit, cau Girgasit,

¹⁷ cau Hebit, cau Arkit, cau Sinit,

¹⁸ cau Arbadit, cau Jemarit, mơ cau Hamatit. Mơ tơnơ̆ ală hìu nhă Kanaan lòt gơprah gơpring.

¹⁹ Mơ nhàr Kanaan la bơh Sidôn lòt jat gah Gerar tus hơ Gaja; mơ bơh đah Sôdôm, Gômôrơ, Atma mơ Sebôim lòt tus hơ Lasa.

²⁰ Hơ̆ la ală kòn sau Cam dê pơnjat ală hìu nhă, ală jơnau đơs, ală lơgar mơ ală làng bol bol khai dê.

Jơi bơtiàn Sem dê

²¹ Sem bèp cau Heber mơ bi Japhet dê kung tơnggơs kòn sau.

²² Kòn klau Sem dê la Elam, Asur, Arpaksat, Lut mơ Aram.

²³ Kòn klau Aram dê la Us, Hul, Geter mơ Mas.

²⁴ Arpaksat tơnggơs Selah; Selah tơnggơs Heber,

²⁵ Heber tơnggơs bàr nă kòn klau, sơnđan dô nă la Pelek, tài bơh ù tòm rài khai neh cah is, sơnđan oh khai dê la Jokthan.

²⁶ Jokthan tơnggơs Almôdat, Selep, Hatsarmawet mơ Jerah,

²⁷ Hadôram, Usal, Dikla,

²⁸ Ôbal, Abimael, Seba,

²⁹ Ôphir, Habila mơ Jôbap. Jơh ală cau hơ̆ la kòn klau Jokthan dê.

³⁰ Mơ tiah ơm ală bol khai dê la đah Sephar lòt bơh Mesa tus hơ mơnơm đah mattơngai lik.

³¹ Hơ̆ la kòn sau Sem dê, pơnjat ală hìu nhă, ală jơnau đơs, ală lơgar mơ ală làng bol bol khai dê.

³² Hơ̆ la ală hìu nhă kòn klau Nôe dê pơnjat ală rài bol khai dê mơ ală làng bol bol khai dê, mơ kung bơh ală cau hơ̆ mơ ală làng bol neh cah is tòm ù tơnơ̆ mơ dà kŏ.