Lik Ejiptơ 6 - Sră Goh 2018

Yàng Tom Trồ ho dong tă làng bol Israel

¹ Gen Yàng Jehôwa đơs mơ Môise lah: “Tŭ do mê rơp sền gŏ bơta Añ rơp lơh di Pharaôn; tài bơh tê gơnap gơnoar Añ jê khai rơp lòi làng bol lik lòt; tài bơh tê gơnap gơnoar Añ jê khai rơp ting bơtrơh bol khai lik bơh di lơgar do.”

² Yàng Tom Trồ đơs tai mơ Môise lah: “Añ la Yàng Jehôwa.

³ Añ neh tơlik mat mơ Abraham, mơ Isak bal mơ Jakôp, yal tơlik să tòm Añ la Yàng Tom Trồ Gơnap Gơnoar Dờng; mơya bơh sơnđan Añ la Jehôwa gen Añ òhềt yal tơlik bol khai in git.

⁴ Añ kung neh bơtào bơta ho bal mơ bol khai, ai lơgar Kanaan bol khai in, la lơgar bol khai neh ơm ing be cau nac crih.

⁵ Rlau mơ hơ̆, Añ kung neh kơno jơnau rac ròc cau Israel dê kong cau Ejiptơ kup lơh gơs dĭ, mơ Añ neh kah wơl bơta ho bal Añ jê.

⁶ Behơ̆, mê đơs tĕ mơ cau Israel lah: ‘Añ la Yàng Jehôwa, mơ Añ rơp tă tơlik bol mê klàs bơh di yô cau Ejiptơ dê. Añ rơp toh bol mê klàs bơh di bơta ơm dĭ bol khai, mơ Añ rơp pò tơwòr tê Añ lơh ală broă gơnap gơnoar nàng cahrña mơ tơwài bol mê.

⁷ Añ rơp dòp bol mê lơh gơs làng bol gơrê is mơ Añ, mơ añ rơp lơh gơs Yàng Tom Trồ bol mê dê. Gen bol mê rơp git Añ la Jehôwa Yàng Tom Trồ bol mê dê, neh tă tơlik bol mê klàs bơh di yô cau Ejiptơ dê.

⁸ Mơ Añ rơp cèng bol mê mut tòm lơgar mơ Añ neh pò tê srat să ai Abraham in, ai Isak in, mơ ai Jakôp in. Añ rơp ai gơ bol mê in lơh gơs sre brê. Añ la Yàng Jehôwa.’”

⁹ Môise yal wơl ală jơnau hơ̆ làng bol Israel in; mơya bol khai ò iat khai tài bơh bơta gơplơ̆ nùs mơ bơta duh broă kơnjơ̆ be cau dĭ.

¹⁰ Gen Yàng Jehôwa đơs mơ Môise lah:

¹¹ “Lòt tĕ yal mơ Pharaôn, bơtau Ejiptơ dê, sồr khai lòi làng bol Israel in lik bơh di lơgar khai dê.”

¹² Mơya Môise đơs mơ Yàng Jehôwa lah: “Làng bol Israel rơp ò iat añ tài bơh añ ò jak đơs, gen Pharaôn rơp iat añ ơ?”

Jơi bơtiàn Môise mơ Arôn dê

¹³ Yàng Jehôwa neh đơs mơ Môise bal mơ Arôn bơh làng bol Israel mơ bơh Pharaôn, bơtau lơgar Ejiptơ dê, mơ Kơnràñ ai jơnau sồr bol khai cèng làng bol Israel lik bơh di lơgar Ejiptơ.

¹⁴ Do la ală cau sơnròp gơrê bal mơ ồng pàng bol khai dê. Ruben, kòn tơnhoa Israel dê, gơs ală kòn klau la Henok mơ Phalu, Hesrôn mơ Karmi. Hơ̆ la mpồl hìu nhă Ruben dê.

¹⁵ Ală kòn klau Simeôn dê la Jemuel, Jamin, Ôhat, Jakin, Sôha, mơ Sol la kòn klau dô nă cau ùr Kanaan dê. Hơ̆ la mpồl hìu nhă Simeôn dê.

¹⁶ Do la sơnđan mat ală kòn klau Lebi dê, jat be jơi bơtiàn bol khai dê: Gersôn, Kôhat mơ Merari. Lebi kis dô rhiang pe jơt poh nam.

¹⁷ Ală kòn klau Gersôn, jat jơi bơtiàn khai dê la Lipni, mơ Simei.

¹⁸ Ală kòn klau Kôhat dê la Amram, Isar, Hebrôn, mơ Usiel. Kehat kis dô rhiang pe jơt pe nam.

¹⁹ Ală kòn klau Merari dê la Mali, mơ Musi. Hơ̆ la mpồl hìu nhă Lebi dê, jat be jơi bơtiàn bol khai dê.

²⁰ Amram bau mơ Jôkebet, la oh ùr bèp khai dê; khai tơnggơs Amram in Arôn mơ Môise. Amram kis dô rhiang pe jơt poh nam.

²¹ Ală kòn klau Isar dê la Kôra, Nephek, Jikri.

²² Ală kòn klau Usiel dê la: Misael, Eljaphan, Sitri.

²³ Arôn bau mơ Eliseba, kòn ùr Aminadap dê, oh ùr Nahasôn; khai tơnggơs Arôn in Nađap, Abihu, Eleajar, mơ Ithamar.

²⁴ Ală kòn klau Kôra dê la Assir, Elkana, mơ Abiasap. Hơ̆ la mpồl hìu nhă cau Kôra dê.

²⁵ Eleasa, kòn klau Arôn dê, bau mơ kòn ùr Phetuel dê; khai tơnggơs Phenina Eleajar in. Hơ̆ la ală cau sơnròp bồ dà jơi bơtiàn Lebi dê, jat kòp mpồl hìu nhă.

²⁶ Hơ̆ la Arôn mơ Môise do, la cau mơ Yàng Jehôwa neh đơs lah: “Cèng tơlik tĕ cau Israel bơh di lơgar Ejiptơ, jat mpồl bol khai dê.”

²⁷ Bol khai la ală cau đơs mơ Pharaôn, bơtau lơgar Ejiptơ bơh bơta cèng tơlik làng bol Israel bơh di lơgar Ejiptơ. Hơ̆ la Môise mơ Arôn hơ̆.

Arôn đơs ala Môise

²⁸ Tòm ngai Yàng Jehôwa đơs mơ Môise tòm lơgar Ejiptơ,

²⁹ gen Kơnràñ đơs mơ khai lah: “Añ la Yàng Jehôwa. Đơs tĕ mơ Pharaôn, bơtau Ejiptơ, jơh ală jơnau Añ đơs mơ mê.”

³⁰ Mơya Môise đơs lah: “Tài bơh añ la cau ò jak đơs, Pharaôn rơp iat añ ơ?”